មនុស្ស៦នាក់រងរបួស ដោយសារអគ្គិភ័យឆេះអាគារកាស៊ីណូ កម្ពស់១៨ជាន់របស់ឧកញ៉ា កុក អាន ដែលមានទីតាំងស្ថិតនៅក្នុងភូមិក្បាលស្ពាន សង្កាត់ប៉ោយប៉ែត ខេត្តបន្ទាយមានជ័យ។
អភិបាលក្រុងប៉ោយប៉ែត លោក សាន សៀងហូ បានប្រាប់ វី.អូ.ឌី នៅថ្ងៃទី៨ ខែមករានេះ ថា អគ្គិភ័យនេះបានចាប់ផ្តើមឆាបឆេះនៅម៉ោងប្រហែល៨យប់ កាលពីម្សិលមិញ ប៉ុន្តែត្រូវបានសមត្ថកិច្ចប្រើរថយន្តពន្លត់អគ្គិភ័យ១០គ្រឿង រហូតពន្លត់បានជោគជ័យនៅម៉ោងប្រហែល១២រំលងអធ្រាត។
លោក សៀងហូ បន្តថា ដើមចមដែលនាំឲ្យមានអគ្គីភ័យឆាប់ឆេះ ដោយសារឆ្លងចរន្តអគ្គិសនីជណ្តើរយន្តនៅជាន់ទី៤នៃអាគារ ហើយបណ្តាលឲ្យមនុស្សរងរបួសស្រាល៦នាក់ និងបញ្ជូនទៅសង្គ្រោះបន្ទាន់នៅមន្ទីរពេទ្យ។
អភិបាលក្រុងរូបនោះ បញ្ជាក់ថា រហូតមកដល់ថ្ងៃទី៨ ខែមករានេះ សមត្ថកិច្ចមិនទាន់កំណត់ពីទំហំខូចខាតទ្រព្យសម្បត្តិកាស៊ីណូនោះទេ ដោយថា សមត្ថកិច្ចពាក់ព័ន្ធកំពុងចុះស្រាវជ្រាវនឹងធ្វើរបាយការណ៍ជុំវិញករណីនេះ៕
