ភ្ញៀវទេសចរអន្តរជាតិប្រមាណ ៦.២លាននាក់ បានមកទស្សនាកម្ពុជាក្នុងឆ្នាំ២០១៨នេះ ដោយកើនឡើង ១១ភាគរយ បើប្រៀបធៀបឆ្នាំ២០១៧។
យោងតាមទំព័រហ្វេសប៊ុករបស់ក្រសួងទេសចរណ៍ចេញផ្សាយនៅថ្ងៃនេះ បានឲ្យដឹងថា ភ្ញៀវទេសចរបរទេសមកទស្សនាកម្ពុជានៅឆ្នាំ២០១៧ មាន៥.៦លាននាក់ ហើយបានកើនឡើងដល់ ៦.២លាននាក់ ក្នុងឆ្នាំ២០១៨ ក្នុងនោះភ្ញៀវទេសចរចិនឈរលំដាប់ទី១។
ប្រភពដដែលបានឲ្យដឹងថា ភ្ញៀវទេសចរចិនមានប្រមាណ២លាននាក់ ក្នុងចំណោមទេសចរបរទេស ៦.២លាននាក់ ដោយទេសចរចិនកើនឡើង ៧០ភាគរយ នៅក្នុងឆ្នាំ២០១៨កន្លងទៅនេះ។ ការកើនឡើងនៃភ្ញៀវទេសចរចិននេះ ដោយសារមានជើងហោះហើរច្រើនពីចិនមកកម្ពុជា ដោយមានក្រុមហ៊ុនអាកាសចរចិន១២ ដែលក្នុងមួយសប្តាហ៍មានការហោះហើរមកកម្ពុជា២០៧ជើង។
ក្រសួងទេសចរណ៍កំពុងរៀបចំយុទ្ធសាស្រ្តដើម្បីទាក់ទាញភ្ញៀវទេសចរបរទេស និងជាពិសេសទេសចរចិន មកទស្សនាកម្ពុជាឲ្យកាន់តែច្រើន និងស្នាក់នៅបានយូរ ក្នុងនោះរួមមាន ការបង្កើតផលិតផលទេសចរណ៍ថ្មីប្រកបដោយការច្នៃប្រឌិត ពង្រឹងគុណភាពផលិតផល និងសេវាកម្មទេសចរណ៍។
កម្ពុជាព្យាករណ៍ថា ក្នុងឆ្នាំ២០២០ នឹងមានភ្ញៀវទេសចរបរទេសមកទស្សនាប្រមាណ ៧លាននាក់ ក្នុងនោះទេសចរចិន ៣លាននាក់ ហើយក្នុងឆ្នាំ២០២៥ មានចំនួន ១១លាននាក់ ក្នុងនោះទេសចរចិន ៥លាននាក់៕
