រថភ្លើងដឹកទំនិញបានបុកជាមួយរថយន្តដឹកដីមូយគ្រឿង នៅខេត្តបន្ទាយមានជ័យ កាលពីព្រឹកមិញដែលបណ្តាលឲ្យខូចខាតទាំងសងខាង ប៉ុន្តែមិនបណ្តាលឲ្យនរណាម្នាក់គ្រោះថ្នាក់នោះទ។
អធិការនគរបាលស្រុកមង្គលបុរី លោក ស៊ិន ណារ៉ាក់ បា្រប់ វីអូដី ឲ្យដឹងថា រថយន្តដឹកដីមួយគ្រឿងបើកបរឆ្លងកាត់ផ្លូវដែកដោយខ្វះការប្រុងប្រយ័ត្នបានបុកជាមួយរថភ្លើងដឹកទំនិញមួយគ្រឿង ក្នុងស្រុកមង្គលបុរី ខេត្តបន្ទាយមានជ័យ នៅព្រឹកថ្ងៃទី៣១ ខែមករា ឆ្នាំ២០១៩នេះ ។
ប្រភពដដែលបានឲ្យដឹងថា រថភ្លើងដឹកទំនិញនេះចេញដំណើរពីខេត្តបន្ទាយមានជ័យ ឆ្ពោះទៅកាន់ខេត្តបាត់ដំបង លុះដល់ចំណុចកើតហេតុក៏បុកជាមួយរថយន្តដឹកដីដែលបណ្តាលឲ្យខូចខាតទាំងសងខាង ប៉ុន្តែគ្មានអ្នករងរបួសនោះទេ។
លោក ស៊ិន ណារ៉ាក់ បានបន្ថែមថា បន្ទាប់ពីហេតុការណ៍នេះកើតឡើង លោកបានយករថយន្តមករក្សាទុកនៅអធិការដ្ឋាននគរបាលស្រុក ចំណែកឯរថភ្លើងចរាចរណ៍បន្ត។ ភាគីទាំងពីរនឹងដោយស្រាយការខូចខាតនៅពេលបន្ទាប់។
កាលពីខែមេសា ឆ្នាំ២០១៨កន្លងទៅ មានករណីរថភ្លើងនិងរថយន្តបុកគ្នាដែលបណ្តាលឲ្យបុរសម្នាក់រងរបួស នៅក្នុងក្រុងប៉ោយប៉ែត ខេត្តបន្ទាយមានជ័យ។