ក្រសួងបរិស្ថានកាលពីម្សិលមិញបានបញ្ជាក់ថាកម្ពុជាមិនទទួលរងឥទ្ធិពលខ្យល់ពុលពីប្រទេសថៃឬប្រទេសជិតខាងនោះទេ ដោយអំពាវនាវប្រជាពលរដ្ឋកុំឲ្យមានការព្រួយបារម្ភ។
យោងតាមទំព័រហ្វេសប៊ុករបស់ក្រសួងបរិស្ថានបានឲ្យដឹងថា គុណភាពខ្យល់នៅប្រទេសកម្ពុជាមានគុណភាពល្អ ហើយភាគល្អិតនៅក្នុងខ្យល់ធម្មតាដោយមិនមានការព្រួយបារម្ភឡើយ។ មន្ត្រីជំនាញក្រសួងបរិស្ថានកំពុងធ្វើការតាមដានពីគុណភាពខ្យល់រៀងរាល់២៤ម៉ោងម្ដងដើម្បីពិនិត្យមើលស្ថានភាពខ្យល់។
នៅចុងសប្តាហ៏នេះការចែកចាយសំឡេងលើបណ្តាញសង្គមដោយនិយាយថាកម្ពុជាកំពុងរងឥទ្ធិពលខ្យល់ពុលពីប្រទេសថៃ ប៉ុន្តែក្រសួងបរិស្ថានអំអាងថា កម្ពុជាមិនទទួលរងឥទ្ធិពលខ្យល់ពុលពីប្រទេសជិតខាងនោះឡើយ។
ក្រសួងបរិស្ថានបានបញ្ជាក់ថា៖ «សូមអំពាវនាវដល់បងប្អូនកុំមានការព្រួយបារម្ភអ្វីឡើយហើយក្រសួងនឹងផ្តល់ព័ត៌មានជាប្រចាំ ប្រសិនបើមានបញ្ហាអ្វីមួយគួរកត់សម្គាល់ពាក់ព័ន្ធនឹងគុណភាពខ្យល់នេះ»។
ស្ថានទូតកម្ពុជាប្រចាំប្រទេសថៃកាលពីថ្ងៃទី៣១ មករា ឆ្នាំ២០១៩ បានចេញសេចក្ដីជូនដំណឹងឲ្យប្រជាពលរដ្ឋខ្មែរដែលកំពុងរស់នៅនិងធ្វើការក្នុងប្រទេសថៃឲ្យមានការប្រុងប្រយ័ត្នដោយពាក់ម៉ាសដើម្បីការពារសុខភាព។
រដ្ឋាភិបាលប្រទេសថៃកាលពីសប្តាហ៍មុន បានសម្រេចបិទសាលាចំនួន៤៣៧ រយៈពេល២ថ្ងៃដើម្បីបញ្ចៀសពីបញ្ហាខ្យល់កខ្វក់នេះ បន្ទាប់ពីខ្យល់កខ្វក់ធ្លាក់ដល់កម្រិតប្រកាសអាសន្ននៅក្រុងទីក្រុងបាងកក និងខេត្តមួយចំនួន។
