កសិករនៅតាមបណ្ដាខេត្តមួយចំនួន អះអាងថា តម្លៃស្រូវបន្តធ្លាក់ចុះបន្ថែមទៀតនាដើមខែកុម្ភៈនេះ ខណៈរដ្ឋមន្ត្រីក្រសួងកសិកម្មលើកថា បញ្ហានេះកើតឡើងដោយសារវៀតណាមរវល់ប្រារព្ធពិធីចូលឆ្នាំ តែវាមិនប៉ះពាល់ដល់ចំណូលកសិករនោះទេ។
កសិករនៅក្នុងស្រុកភ្នំស្រុក ខេត្តបន្ទាយមានជ័យ លោក សុខ កាក់ បានឲ្យដឹងថា តម្លៃស្រូវ IR ៥៤ ដែលកសិករប្រមូលផលបានក្នុងខែកុម្ភៈនេះបានបន្តធ្លាក់ថ្លៃបន្តទៀត ដែលធ្វើឲ្យកសិករមួយចំនួនប្រឈមមុខនឹងការខាតបង់ដោយសារការមិនងើបឡើងនៃតម្លៃនេះ។
លោកបន្ថែមថា តម្លៃស្រូវ IR បច្ចុប្បន្នមានតម្លៃប្រមាណ ៦១ម៉ឺនរៀលក្នុងមួយតោន ខណៈកាលពីខែមករា តម្លៃស្រូវក្នុងមួយតោន លោកអាចលក់បានតម្លៃជាង ៦៦ម៉ឺនរៀល។
លោក សុខ កាក់ ប្រាប់ថា៖ «តម្លៃស្រូវចុះថោកប៉ុណ្ណឹង មិនអាចរស់បានទេ ចង់និយាយថា មិនអាចទូទាត់ថ្លៃឈ្នួល ថ្លៃស្រែ ថ្លៃជី ហើយនិងថ្លៃថ្នាំបានទេ! បើទោះបីជាយើងធ្វើស្រែរហូតដល់ទៅ ៤ ទៅ ៥តោនក៏ដោយ ក៏មិនអាចទូទាត់បានគ្រប់ទេ អត់រួចខ្លួន!»។
ពលរដ្ឋរស់នៅស្រុកកោះធំ ខេត្តកណ្ដាល អ្នកស្រី សែម ភា មានប្រសាសន៍ថា ស្រូវក្នុងស្រុកអ្នកស្រី បច្ចុប្បន្ន ចុះថ្លៃពីក្នុងមួយតៅជាង ១ម៉ឺនរៀលក្នុងខែមករា មកនៅតម្លៃពី ៨២០០រៀលដល់ ៨៤០០រៀលប៉ុណ្ណោះ ហើយលើសពីនោះ គ្មានឈ្មួញចុះមកទិញនោះទេ។
អ្នកស្រីថា៖ «បើខ្មែរយើងអត់មានឃើញ(អ្នក)ណាគេចុះទិញទេ មានតែវៀតណាមទេ ជញ្ជូនទៅរាល់ឆ្នាំ ហើយឆ្នាំនេះស្ងាត់ឈឹង»។
កសិកររស់នៅស្រុកព្រៃឈរ ខេត្តកំពង់ចាម លោក ភិន សុផល មានប្រសាសន៍ថា តម្លៃស្រូវក្នុងស្រុកលោកនៅមានតម្លៃថេរនៅឡើយ បើធៀបនឹងខែមករាដែលមានតម្លៃ ៦រយរៀលក្នុងមួយគីឡូ។ ទោះជាយ៉ាងណា ស្រូវក្នុងតម្លៃនេះ លោកថា មិនអាចធ្វើឲ្យពលរដ្ឋក្នុងភូមិស្រុកលោកអាចរួចខ្លួន ឬចំណេញនោះទេ។
លោកថា៖ « ឥឡូវហ្នឹង ប្រជាកសិករមួយចំនួនបង្ខំចិត្តលក់ស្រូវដែលទើបតែបាច់ជីបានម្ដងហ្នឹង ត្រូវបង្ខំចិត្តលក់ទាំងដីទាំងស្រូវតែម្ដង លក់ឲ្យអ្នកដែលនៅក្បែរៗហ្នឹង (អ្នកជាប់ដី) ដោយគាត់ថា ទុកទៅក៏មិនចំណេញដដែល លក់ស្រែប្រាំងហ្នឹងចោលហ្មង » ។
VOD មិនអាចទាក់ទងអ្នកនាំពាក្យក្រសួងពាណិជ្ជកម្ម លោក ស៊ាង ថៃ បាននៅឡើយទេ។
កាលពីថ្ងៃ៣០ ខែមករាកន្លងមកនេះ រដ្ឋមន្ត្រីក្រសួងកសិកម្មកម្ពុជា លោក វេង សាខុន បានស្នើទៅកាន់ក្រុមឈ្មួញ និងប្រទេសវៀតណាម ឲ្យប្រទេសនេះប្រមូលទិញស្រូវពីកសិករកម្ពុជានាពេលបច្ចុប្បន្ន។
លោកក៏បានលើកឡើងក្នុងហ្វេសបុករបស់លោកកាលពីចុងសប្ដាហ៍មុន ក្នុងពេលដែលលោកចុះជួបពលរដ្ឋនៅខេត្តតាកែវថា បញ្ហាតម្លៃស្រូវធ្លាក់ថ្លៃនេះ គឺបណ្ដាលមកពីឈ្មួញវៀតណាមរវល់រៀបចំពិធីបុណ្យចូលឆ្នាំប្រពៃណីជាតិខ្លួន ខណៈឈ្មួញក្នុងស្រុកឆ្លៀតឱកាសទម្លាក់តម្លៃក្នុងស្រុក។
លោកសរសេរថា៖ «តម្លៃស្រូវធ្លាក់ចុះ មកពីក្នុងអំឡុងពេលចូលឆ្នាំចិន–វៀតណាម ឈ្មួញវៀតណាមមិនបានចុះប្រមូលទិញស្រូវ រួមជាមួយប្រជាកសិករយើងខ្វះឃ្លាំងស្តុក ឡសម្ងួត និងចំពេលវេលាដែលចាំបាច់ត្រូវតែប្រមូលផល បានផ្តល់ឱកាសឱ្យឈ្មួញកណ្តាលទម្លាក់តម្លៃស្រូវ។ តែទោះជាយ៉ាងណា ការធ្លាក់ចុះតម្លៃស្រូវនាពេលនេះមិនទាន់ដល់កម្រិតមួយថាខាតបង់កម្រៃនៅឡើយ គ្រាន់តែថា ចំណូលបានតិចជាងបើប្រៀបធៀបទៅឆ្នាំ២០១៨ »។
ប្រធានសម្ព័ន្ធសហគមន៍កសិករកម្ពុជាលោក ថេង សាវឿន បារម្ភថាបើបញ្ហានេះនៅតែបន្តនោះនឹងធ្វើឲ្យប៉ះពាល់កាន់តែខ្លាំងដល់កសិករដែលជាប់បំណុលនៅធនាគារកាន់តែខ្លាំង។ លោកឲ្យជាយោបល់ថា រដ្ឋាភិបាលគួរតែរកទីផ្សារជាក់លាក់ណាមួយសម្រាប់កម្ពុជាកុំពឹងតែវៀតណាម និងថៃ ជាពិសេសគួរតែត្រៀមថវិកាជាតិដើម្បីត្រៀមទិញស្រូវកសិករទុក។
កម្ពុជាបានបង្កើតស្ថាប័នអភិវឌ្ឍន៍កសិកម្មចំនួនពីរតាំងពីចុងទសវត្ស១៩៩០ ដែលរួមមាន ធនាគារអភិវឌ្ឍន៍ជនបទ និងក្រុមហ៊ុនកសិកម្មហ្គ្រីនត្រេដ តែសម្រាប់លោក ថេង សាវឿន យល់ថាស្ថាប័នពីរនេះហាក់មិនទាន់មានភាពទូលំទូលាយនៅឡើយ ហើយពលរដ្ឋកម្ពុជាភាគច្រើនក៏មិនស្គាល់ស្ថាប័ននេះច្បាស់នៅឡើយទេ។
លោកថា៖ « ហើយបើមានការបង្កើតហើយ មិនមានការចូលរួមពីប្រជាពលរដ្ឋ ឬកសិករដែលផលិតទេ! ខ្ញុំគិតថា កសិករគាត់នៅតែកង្វះព័ត៌មានក្នុងការទទួលអត្ថប្រយោជន៍នៃការបង្កើត ឬក៏មិនអាចចូលរួមយន្តការដែលរដ្ឋបានផ្ដល់ឲ្យនោះ។ អញ្ចឹង កន្លងមកហ្នឹង យើងទទួលស្គាល់ការបង្កើត ក៏ប៉ុន្តែព័ត៌មាននៃការបង្កើតឬក៏វិធីសាស្ត្រ ឬក៏នីតិវិធីបែបណាដែលពលរដ្ឋអាចទទួលយកបាននូវសេវាកម្មហ្នឹង នៅមិនទាន់បានផ្សព្វផ្សាយបានទូលំទូលាយ » ។
កាលពីថ្ងៃទី១៦ ខែមករា សហភាពអឺរ៉ុបបានសម្រេចយកពន្ធនាំចូលអង្ករពីកម្ពុជា។ ទាំងរដ្ឋាភិបាលកម្ពុជា និង អ្នកស្រាវជ្រាវចាត់ទុកថា ការសម្រេចនេះធ្វើឲ្យប៉ះពាល់តម្លៃស្រូវ និងជីវភាពកសិករ។ បើតាមកសិករតម្លៃស្រូវដែលគាត់អាចទទួលយកបាន ដែលអាចឲ្យគាត់ចំណេញពីការផលិតស្រូវលុះត្រាតែតម្លៃចាប់ពី១០០០ រៀលឡើងទៅ៕
