ក្រុមសង្គមស៊ីវិលមួយចំនួនដែលធ្វើលើកាងារពាក់ព័ន្ធនឹងធនធានធម្មជាតិ បានលើកឡើងថាការប្តេជ្ញាចិត្តជាថ្មីក្នុងការទប់ស្កាត់បទល្មើសព្រៃឈើរបស់គណៈកម្មការជាតិទប់ស្កាត់និងបង្ក្រាបបទល្មើសធនធានធម្មជាតិ នឹងមិនមានប្រសិទ្ធិភាពនោះទេ បើគ្មានការទោសឧក្រិដ្ឋជនធំៗនៅពីក្រោយ។
មន្រ្តីកម្មវិធីពង្រឹងអំណាចសហគមន៍នៃសមាគមការពារសិទ្ធិមនុស្ស និង អភិវឌ្ឍន៍នៅកម្ពុជា លោក ប៉ែន ប៊ុណ្ណារ៍ មានប្រសាសន៍ថា ដើម្បីឱ្យការប្តេជ្ញាក្នុងការថែរក្សារធនធានធម្មជាតិមានប្រសិទ្ធភាព លុះត្រាតែគណៈកម្មការនេះ រួមនឹងស្ថាប័នពាក់ព័ន្ធ ត្រូវចាត់វិធានលើសំណុំរឿងឧក្រិដ្ឋជនព្រៃឈើធំៗ នៅពីក្រោយខ្នងជនល្មើស ដែលកើតឡើងកន្លងមកជាមុនសិន។
លោកបន្ថែមថា៖ «បាទ! អីចឹងទាល់តែគណៈកម្មការហ្នឹង បង្កសំណុំរឿង ដែលជាបទល្មើសមិនទាន់ហួសអាជ្ញាយុកាលហ្នឹង ដាក់ទៅតុលាការអតិបរមា។ អីចឹង បានវាជាកម្លាំងមួយជំរុញឱ្យ ទៅធ្វើការប្តេជ្ញាចិត្តក្នុងការអនុវត្តការងារទៅមុខទៀត។ ហើយប្រសិនបើបទល្មើសឧក្រិដ្ឋដែលកន្លងមកមិនទាន់បានបង្កសំណុំរឿង ឬបានតិចតួច ឬស្ទើរតែមិនបាន ហើយបានតិចទៅតុលាការផង។ យើងសួរថា តើអាការប្តេជ្ញាទៅមុខទៀតអាចបានទៅជោគជ័យអត់?»។
អ្នកសម្របសម្រួលលេខាធិការដ្ឋានបណ្តាញការពារព្រៃឡង់ លោក សេង សុខហេង ឱ្យដឹងថាតាំងពីបង្កើតគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិមក សកម្មភាពបទល្មើសព្រៃឈើនៅតំបន់ព្រៃឡង់ និងតំបន់ផ្សេងទៀតគ្មានការថយចុះទេ។ លោកថា ការប្តេជ្ញាចិត្តជាថ្មីទៀតរបស់គណៈកម្មការជាតិនៅពេលនេះ នឹងមិនមានប្រសិទ្ធិភាពឡើយ ដោយលោកថា ជាប្រកាសឱ្យតែល្អមើលប៉ុណ្ណោះ។
លោកបន្តថា ៖ «អាចំណុចខំប្រឹងប្រែងរបស់គាត់ហ្នឹង វាខំហើយ គ្រាន់តែថា ការអន្តរាគមជាប្រព័ន្ធ បែបឃុបឃិតគ្នាជាប្រព័ន្ធទៅលើវិស័យព្រៃឈើនេះ តាមការប្រព្រឹត្តអំពើពុករលួយ ។ តាមរយៈការឱ្យក្រុមមួយចំនួន បន្តរកស៊ីឈើដោយស្របច្បាប់ទៅក្រៅហ្នឹង។ អីចឹង ខ្ញុំគិតថា ការអន្តរាគម ការប្តេជ្ញាចិត្តហ្នឹង វាគ្មានប្រសិទ្ធភាព វាដូចតែពីមុនមក »។
កាលពីថ្ងៃម្សិលមិញ ក្នុងកិច្ចប្រជុំការងារ ប្រធានគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ លោក សៅ សុខា បានបញ្ជាឱ្យទប់ស្កាត់ និងបង្ក្រាប ការកាប់បំផ្លាញព្រៃឈើ ការដឹកជញ្ជូនឈើ និងការនាំចេញឈើដោយខុសច្បាប់។
លោកក៏បានប្រាប់មន្ត្រីពាក់ព័ន្ធត្រូវទប់ស្កាត់ការកាប់ទន្ទ្រាន និងកាន់កាប់ដីរបស់រដ្ឋ ព្រមទាំងការរុករករ៉ែដោយខុសច្បាប់ទូទាំងប្រទេសឲ្យមានប្រសិទ្ធភាព ដោយត្រូវស៊ើបអង្កេតរកជនល្មើស និងជនពាក់ព័ន្ធ ដើម្បីចាប់ខ្លួន និងកសាងសំណុំរឿងបញ្ជូនទៅតុលាការផងដែរ។
អ្នកនាំពាក្យគណៈកម្មការជាតិទប់ស្កាត់និងបង្ក្រាបបទល្មើសធនធានធម្មជាតិ លោក អេង ហ៊ី បញ្ជាក់ថា ក្នុងកិច្ចប្រជុំដែលមានអាជ្ញាធរខេត្ត និងមន្ត្រីពាក់ព័ន្ធចូលរួមកាលពីម្សិលមិញ លោក សៅ សុខា បានដាក់បទបញ្ជាម៉ឹងមាត់ ដោយថា បើមានល្មើសធនធានធម្មជាតិនៅតំបន់ណា អង្គភាព ឬ ស្ថាប័ន និងបុគ្គលនោះ នឹងទទួលខុសត្រូវចំពោះមុខច្បាប់។
លោកមានប្រសាសន៍ថា៖ «ហើយសុំឱ្យតាមបណ្តារាជធានី-ខេត្ត ដែលជាឯកឧត្តមអភិបាល គឺមានឆន្ទៈធ្វើណា។ ទាំងស្ថាប័នដែលពាក់ព័ន្ធទាំងអស់ ជំនាញពាក់ព័ន្ធទាំងអស់ គឺមានឆន្ទៈ និងមានការទទួលខុសត្រូវ » ។
គណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ ត្រូវបានរាជរដ្ឋាភិបាលបង្កើតឡើង កាលពីថ្ងៃទី១៥ ខែមករា ឆ្នាំ២០១៦ ដោយមានគោលដៅចាត់វិធានការរាល់បទល្មើសធនធានធម្មជាតិនៅតំបន់ភូមិភាគឦសាន ដែលមានបទល្មើសព្រៃឈើច្រើនជាងគេ។ ក្រោយមកគណៈកម្មការនេះ បានពង្រីកវិសាលភាពរបស់ខ្លួននៅទូទាំងប្រទេស។
ក្រោយការបង្កើតប្រមាណ៣ខែ គណៈកម្មការជាតិមួយនេះ ចាប់បានឈើខុសច្បាប់ ប្រភេទឈើប្រណិតជាង ៧ម៉ឺនម៉ែត្រគូប និងប្ដឹងឈ្មួញរកស៊ីចំនួន ៥៧ ករណីទៅតុលាការ ប៉ុន្តែមកទល់ពេលបច្ចុប្បន្ន សង្គមស៊ីវិលអះអាង គ្មានឧក្រិដ្ឋជនធំៗណាម្នាក់ត្រូវបានចាប់ខ្លួន និងយកទៅផ្តន្ទាទោសតាមច្បាប់ឡើយ៕
