នាវាចំនួន២គ្រឿងរបស់កងកម្លាំងស្វ័យការពារជើងទឹកជប៉ុននឹងចូលចតនៅកំពង់ផែស្វយ័តក្រុងព្រះសីហនុចាប់ពីថ្ងៃទី២៥ ដល់២៨ ខែកុម្ភៈ ឆ្នាំ២០១៩។
យោងតាមសេចក្ដីប្រកាសព័ត៌មានរបស់ស្ថានទូតជប៉ុនប្រចាំប្រទេសកម្ពុជាកាលពីម្សិលមិញ គឺនាវាចំនួន២គ្រឿងរបស់កងកម្លាំងស្វ័យការពារជើងទឹកជប៉ុនដែលមានឈ្មោះថា សេតូយុគិ និងសេម៉ាយុគិ ដឹកនាំដោយមេបញ្ជាការកងពលធំហ្វឹកហ្វឺនលេខ១នៃកងកម្លាំងស្វ័យការពារជើងទឹក វរសេនីយឯក យ៉ូស៊ីយូគិ ណាកាហ្គាម៉ា នឹងមកធ្វើទស្សនកិច្ចនៅកម្ពុជាចាប់ពីថ្ងៃទី២៥ ដល់២៨ ខែកុម្ភៈ ឆ្នាំ២០១៩។
សេចក្តីប្រកាសព័ត៌មានបញ្ជាក់ថា ដំណើរទស្សនកិច្ចនេះគឺក្នុងគោលបំណងពង្រឹងទំនាក់ទំនងមិត្តភាពរវាងជប៉ុន និងកម្ពុជា និងផ្ដល់ឱកាសឲ្យនាវិកកម្មសិក្សាការីជប៉ុនចំនួន ១០៩នាក់បានស្វែងយល់ពីវប្បធម៌ព្រមទាំងវិស័យយោធានៅកម្ពុជាផងដែរ។
កាលពីខែមករាកន្លងទៅ នាវាចម្បាំងចិន៣គ្រឿងក៏បានចូលចតនៅកំពង់ផែស្វយ័តក្រុងព្រះសីហនុដើម្បីពង្រឹងកិច្ចសហប្រតិបត្តិការយោធាប្រទេសទាំងពីរ។
