ប្រជាសហគមន៍ឡពាងនៅថ្ងៃនេះ បានស្នើទៅក្រសួងយុត្តិធម៌ជួយអន្តរាគមន៍ទៅស្ថាប័នពាក់ព័ន្ធដើម្បីឲ្យក្រុមហ៊ុន ខេ.ឌី.ស៊ី ប្រគល់ដីឲ្យពួកគាត់វិញ ដោយចោទថា ក្រុមហ៊ុនទន្ទ្រានយកទាំងមិនផ្តល់សំណងត្រឹមត្រូវតាំងពីឆ្នាំ២០០៨។
នៅព្រឹកនេះប្រជាសហគមន៍ឡពាង ស្ថិតនៅក្នុងឃុំតាជេស ស្រុកកំពង់ត្រឡាច ខេត្តកំពង់ឆ្នាំងប្រមាណ៤០នាក់ ប្រមូលផ្តុំនៅមុខក្រសួងយុត្តិធម៌ ក្នុងរាជធានីភ្នំពេញ ដើម្បីសុំកិច្ចអន្តរាគមន៍។
តំណាងសហគមន៍ឡពាង អ្នកស្រី អ៊ុំ សុភី ប្រាប់អ្នកសារព័ត៌មាននៅកន្លែងប្រមូលផ្តុំថា ប្រជាសហគមន៍រង់ចាំដំណោះស្រាយពីតុលាការ និងស្ថាប័នពាក់ព័ន្ធផ្សេងទៀតច្រើនឆ្នាំមកហើយ ប៉ុន្តែមិនមានលទ្ធផល។
អ្នកស្រីបន្តថា ពួកគាត់ប្រមូលផ្តុំថ្ងៃនេះ ដាក់ញត្តិរកកិច្ចអន្តរាគមន៍ពីក្រសួងយុត្តិធម៌ ជួយជំរុញទៅតុលាការពន្លឿននីតិវិធីបើកក្នុងសំណុំរឿងដែលពួកគាត់បានប្ដឹងនេះឲ្យបានឆាប់ ដោយថា ការអូសបន្លាយពេលមិនដោះស្រាយធ្វើឲ្យជីវភាពរបស់ពួកគាត់កាន់តែលំបាកខ្លាំង។
អ្នកស្រីថា៖ «ធ្វើឲ្យជីវភាពយើងកាន់តែលំបាក ធ្វើយើងអត់បានរកស៊ីអី យើងគិតតែខំប្រឹងតវ៉ា ដើម្បីអនាគតកូនចៅ។ អញ្ចឹង ធ្វើឲ្យជីវភាពយើងកាន់តែលំបាក ការអូសបន្លាយ ការមិនព្រមដោះស្រាយហ្នឹង។ ទុកកាន់តែយូរជីវភាពកាន់តែលំបាក យើងត្រូវចំណាយច្រើន ចំណាយទាំងការដើរតវ៉ា ចំណាយទាំងការចិញ្ចឹមកូនចៅ ហើយខាត់ទាំងពេលវេលារកស៊ី»។
ពលរដ្ឋម្នាក់អ្នកស្រី កែវ វណ្ណៈ លើកឡើងថា អ្នកស្រីចង់ឲ្យក្រសួងយុត្តិធម៌ជួយជំរុញទៅតុលាការពន្លឿនបើកសវនាការសំណុំរឿងពួកគាត់ឲ្យបានឆាប់ ដោយថា បច្ចុប្បន្ននេះ គ្មានប្រាក់ និងដីសម្រាប់ធ្វើស្រែនោះទេ ធ្វើឲ្យពួកគាត់ជួបការលំបាកកាន់ខ្លាំង។
អ្នកស្រីថា៖ «អញ្ចឹង លុយ ១ម៉ឺនរៀល ខ្ញុំបែងចែក ទិញអង្ករផង ទិញម្ហូបហូបផង ហូបដោយវេទនា ហូបដូចជា ប្រហុក ពងទា ជូនកាលទិញពងទា២ គ្រាប់ បីនាក់ចៅអញ្ចឹងទៅ ស្ងោរដាក់ទឹកត្រីទៅ។ ថ្ងៃណាទៅ កូនចេញពីរៀន ឆ្លៀតទៅរកត្រីអីបានទៅដាក់ស្លហូបទៅ ។ ក្រៅពីហ្នឹង កូនប្រុស៣នាក់ធ្វើចំណាកស្រុក ទៅអត់បានលុយទេ ដំបូងផ្ញើរមកឲ្យម្ដាយ ទៅ១ ទៅ ២ឆ្នាំ ចាប់ផ្ដើមបែកឆ្វេងជក់ថ្នាំ ត្រូវថៅកែបោករត់ពីទូកមួយទៅទូកមួយ»។
មន្ត្រីសម្របសម្រួលនៃសមាគការពារសិទ្ធិមនុស្សអាដហុកប្រចាំខេត្តកំពង់ឆ្នាំង លោក សំ ចាន់គា មើលឃើញថា ប្រព័ន្ធតុលាការបច្ចុប្បន្នមានស្ដង់ដារពីរ ករណីនេះ ធ្វើឲ្យប្រជាពលរដ្ឋដែលរងគ្រោះដោយបញ្ហាវិវាទដីធ្លីមិនងាយទទួលបានយុត្តិធម៌នោះទេ។ លោកស្នើទៅក្រសួងយុត្តិធម៌ពិនិត្យមើលចំពោះបញ្ហានេះឡើងវិញ ដើម្បីកុំឲ្យប្រជាពលរដ្ឋបាត់បង់ជំនឿលើប្រព័ន្ធយុត្តិធម៌នៅកម្ពុជា ។
លោកថា៖ «ចំពោះពាក្យបណ្ដឹងអ្នកក្រីក្រប្ដឹងជាមួយអ្នកមាន គេចាត់ការលឿនតែលើតែបណ្ដឹងអ្នកមាននិងមានអ្នកមានអំណាចទេ ចំពោះអ្នកដែលក្រីក្រហ្នឹង គេមិនដែលចាប់អារម្មណ៍ទេ អាហ្នឹងធម្មតាទៅហើយ ។ ដូច្នេះ ក្រសួងយុត្តិធម៌ដែលប្រឹងកែទម្រង់ គួរតែផ្ដល់ ជំរុញឲ្យតុលាការចាត់ការរឿងនេះ ដើម្បីយករឿងនេះ ធ្វើជារឿងគំរូ មួយប្រាប់ទៅមហាជន ក៏ដូចជា សហគមអន្តរជាតិអំពីការចោទប្រកាន់កន្លងដែរ»។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា ក្រសួងនឹងពិនិត្យមើលចំពោះករណីនេះ។
លោកថា៖ «ជាទូទៅ បើគាត់ដាក់ញត្តិមកក្រសួងយុត្តិធម៌។ ក្រសួងយុតិ្តធម៌ជាសមត្ថកិច្ចគ្រប់គ្រងទៅលើការងាររដ្ឋបាលរបស់តុលាការ ក្រសួងនឹងបញ្ជូនសំណើនេះទៅខាងតុលាការ ហើយអនុវត្តទៅតាមនីតិវិធីជាក់ស្ដែង។ អានេះ ជាក្របខណ្ឌដែលក្រសួងអាចធ្វើបាន ព្រោះក្រសួងមិនអាចជ្រៀតជ្រែកទៅនឹងការសម្រេចរបស់តុលាការបានទេ ប៉ុន្តែក្រសួងជាអ្នកគ្រប់គ្រងការងាររដ្ឋបាល អញ្ចឹងក្រសួងអាចបញ្ជូនសំណើហ្នឹងទៅខាងតុលាការ ហើយតុលាការពិនិត្យមើល អនុវត្តទៅតាមនីតិវិធីជាធរមាន»។
ជម្លោះដីធ្លីរវាងពលរដ្ឋឃុំតាជេសនិងក្រុមហ៊ុន ខេ.ឌី.ស៊ី របស់លោកស្រី ជា ខេង ដែលជាភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានអូសបន្លាយរយៈពេលជាង១០ឆ្នាំមកហើយ ហើយជម្លោះនេះបានឈានដល់ការចាប់ខ្លួនពលរដ្ឋដាក់គុក និងប្រើហិង្សាបណ្ដាលឲ្យរបួសជាច្រើននាក់។
កាលពីថ្ងៃទី១៧ ខែមិថុនា ឆ្នាំ២០១៤ ក្រុមអ្នកភូមិ និងកម្មករស៊ីឈ្នួលធ្វើរបងឲ្យក្រុមហ៊ុន បានប៉ះទង្គិចគ្នាដោយចម្ពាមកៅស៊ូប្រើគ្រាប់ដែក និងដុំថ្ម បណ្ដាលឲ្យរបួសទាំងសងខាងជាង២០នាក់។ ក្រោយមក តុលាការខេត្តកំពង់ឆ្នាំង បានចេញដីកាតាមចាប់ខ្លួនពលរដ្ឋជាច្រើននាក់ដាក់ពន្ធនាគារ តាមបណ្ដឹងរបស់ភាគីកម្មករក្រុមហ៊ុន។
