ក្រសួងការបរទេសម៉ាឡេស៊ី ស្នើសុំឲ្យដោះលែងជនជាតិរបស់ខ្លួនចំនួន៤៧នាក់ ដែលអាជ្ញាធរកម្ពុជាចាប់ខ្លួនករណីបើកល្បែងស៊ីសងតាមអនឡាញ ដោយថា ពួកគេភាគច្រើនចាញ់បោកក្រុមហ៊ុនដែលសន្យាថាផ្ដល់ការងារដែលមានប្រាក់ខែខ្ពស់។
សេចក្តីប្រកាសព័ត៌មានរបស់ក្រសួងការបរទេសម៉ាឡេស៊ី ចុះផ្សាយកាលពីម្សិលម្សិញ ឲ្យដឹងថា ស្ថានទូតប្រទេសនេះប្រចាំកម្ពុជាទទួលបានដំណឹងពីការចាប់ខ្លួនពួកគេទាំង៤៧នាក់ កាលពីថ្ងៃទី២៨ ខែធ្នូ ឆ្នាំ២០១៨ តាមរយៈអាជ្ញាធរខេត្តបន្ទាយមានជ័យ។ ក្រោយពេលចុះទៅជួបពួកគេនៅពន្ធនាគារ មន្ត្រីទូតម៉ាឡេស៊ីរកឃើញថា អ្នកដែលត្រូវបានចាប់ខ្លួនភាគច្រើនមកធ្វើការដោយសារតែការសន្យាផ្ដល់ប្រាក់ខែខ្ពស់។
ប្រភពដដែល ឲ្យដឹងថា ស្ថានទូតម៉ាឡេស៊ីក៏បានផ្ញើកំណត់ទូតមួយទៅក្រសួងការបរទេសកម្ពុជា ដើម្បីស្នើសុំដោះលែងពួកគេ ។
សារព័ត៌មាន News Strait Times បានចុះផ្សាយនៅថ្ងៃនេះថា សមាជិករដ្ឋសភាម៉ាឡេស៊ី លោក ឡារី សង (Larry Sng) លើកឡើងក្នុងសន្និសីទសារព័ត៌មានកាលពីម្សិលមិញថា អ្នកទាំង៤៧នាក់នោះត្រូវបាននាំមកធ្វើការនៅកម្ពុជាតាមរយៈក្រុមហ៊ុនរើសពលករ ដែលលោកជឿថាគ្រប់គ្រងដោយក្រុមអ្នករកស៊ីជួញដូរមនុស្ស។ លោកថា ពួកគេទាំងនោះត្រូវបង់ប្រាក់ឲ្យក្រុមហ៊ុនចន្លោះពី១០០ទៅ២០០ដុល្លារ។
សមាជិកសភារូបនេះ ក៏បានបង្ហាញក្តីព្រួយបារម្ភផងដែរថា អាជ្ញាធរកម្ពុជាអាចឃុំខ្លួនជនជាតិម៉ាឡេស៊ីទាំងនោះរហូតដល់៣ឆ្នាំ ដោយគ្មានការចោទប្រកាន់ ឬ បញ្ជូនទៅតុលាការដើម្បីចោទប្រកាន់ពីបទឧក្រិដ្ឋណាមួយ។
វី.អូ.ឌី មិនអាចទាក់ទងសុំការអត្ថាធិប្បាយពីអ្នកនាំពាក្យក្រសួងការបរទេសកម្ពុជាបានទេ រហូតមកដល់រសៀលនេះ។
អ្នកនាំពាក្យសាលាដំបូងខេត្តបន្ទាយមានជ័យ លោក រឿន លីណា មានប្រសាសន៍ថា កាលពីពេលថ្មីៗនេះ មន្ត្រីទូតម៉ាឡេស៊ីបានចុះសួរសុខទុក្ខអ្នកជាប់ឃុំទាំង៤៧នាក់នោះដែរ ប៉ុន្តែ លោកថា មិនបានទទួលលិខិតស្នើសុំដោះលែងឲ្យមានសេរីភាពនោះទេ។
ដោយឡែក ទាក់ទងការឃុំខ្លួន អ្នកនាំពាក្យតុលាការរូបនោះបញ្ជាក់ថា ចៅក្រមស៊ើបសួរកំពុងបន្តនីតិវិធីសាកសួរ ប៉ុន្តែ លោកថា មិនដឹងចៅក្រមស៊ើបបញ្ចប់ការសាកនៅពេលណានៅឡើយ។
លោកមានប្រសាសន៍ថា៖ «ខ្ញុំធ្លាប់សួរថា ចំនួនអ្នកជាប់ឃុំម៉ាឡេច្រើននាក់ គាត់ត្រូវសួរព័ត៌មានម្តងមួយៗ អាចប្រើពេលយូរ។ ប៉ុន្តែ គ្រាន់តែថាកំណត់ពេលណា ខ្ញុំអត់ទាន់ច្បាស់ដែរ »។
មន្ត្រីឃ្លាំមើលសិទ្ធិមនុស្សសមាគមអាដហុក លោក ស៊ុំ ចន្ទគា មានប្រសាសន៍ថា តាមនីតិវិធិច្បាប់កម្ពុជា ការឃុំខ្លួនមិនអាចលើសនីតិវិធីច្បាប់ដូចការបារម្ភរបស់សមាជិកសភាម៉ាឡេស៊ីនោះឡើយ។ ករណីនេះ លោកថា កម្ពុជាមិនអាចឲ្យបរទេសរំលោភអធិបតេយ្យភាពរបស់កម្ពុជាបានទេ។ ប៉ុន្តែ លោកថា បើម៉ាឡេស៊ីចង់ឲ្យកម្ពុជាដោះលែងជនជាតិរបស់ខ្លួនទៅស្រុកកំណើតវិញ លុះត្រាតែភាគីនៃប្រទេសទាំងពីរ ព្រមធ្វើបច្ចាប័នបញ្ជូនអ្នកទោស ដោះដូរគ្នាទៅវិញទៅមក ទើបមានយុត្តិធម៌ និងតម្លាភាព។
លោកមានប្រសាសន៍ថា៖ «លុះត្រាតែមានការធ្វើបច្ចាប័នណាមួយ ដោះដូរអ្នកទោស ឬក៏បញ្ជូនអ្នកទោសដែលជាប់ ទៅឲ្យជាប់នៅប្រទេសម៉ាឡេ វាជាការសមជាង ប៉ុន្តែការដោះលែងដោយផ្អែកលើថា កម្ពុជាឃុំខ្លួនយូរដោយពុំមានការជំនុំជម្រះ ឬក៏ច្បាប់កម្ពុជា ចេះមួយចុះមួយ! វាហាក់ដូចជា រំលោភលើអធិបតេយ្យកម្ពុជាហើយ»។
កាលពីចុងខែធ្នូ ឆ្នាំ២០១៨ សមត្ថកិច្ចខេត្តបន្ទាយមានជ័យ ចុះឃាត់ខ្លួនជនជាតិម៉ាឡេ៤៧នាក់ និងជនជាតិចិន៨នាក់ នៅភូមិសាមគ្គីមានជ័យ និងភូមិព្រៃព្រិច សង្កាត់ប៉ោយប៉ែត ក្រុងប៉ោយប៉ែត បន្ទាប់ពី រកឃើញថា ជនជាតិបរទេសទាំងនោះបើកល្បែងអនឡាញខុសច្បាប់នៅកម្ពុជា៕
