ការនាំចេញអង្ករកម្ពុជានាខែមករានៃឆ្នាំ២០១៩នេះ ថយចុះ៥ភាគរយ បើធៀបនឹងរយៈពេលដូចគ្នាកាលពីឆ្នាំមុន តែក្រសួងកសិកម្មថាមិនមានអ្វីភ្ញាក់ផ្អើលនោះទេ។
របាយការណ៍ស្ដីពីស្ថានភាពនៃការនាំចេញអង្ករកម្ពុជាក្នុងខែមករា ឆ្នាំ២០១៩ ដែលចេញដោយក្រសួងកសិកម្ម បានឲ្យដឹងថា កម្ពុជានាំចេញអង្ករបានជិត៦ម៉ឺនតោន ក្នុងខែមករា ឆ្នាំ២០១៩នេះ ដោយបានធ្លាក់ចុះចំនួន ៥ភាគរយ បើធៀបនឹងទំហំនៃការនាំចេញអង្ករ ជាង៦ម៉ឺន២ពាន់តោន ក្នុងរយៈពេលដូចគ្នាកាលពីឆ្នាំ២០១៨។
បើតាមរបាយការណ៍នោះ ក្នុងខែមករានេះ កម្ពុជានាំចេញអង្ករជិត២ម៉ឺន៤ពាន់តោន ទៅកាន់សហភាពអឺរ៉ុប និងចិនជាង១ម៉ឺន៨ពាន់តោន ប្រទេសនៅតំបន់អាស៊ានជាង៩ពាន់តោន និងទៅកាន់ប្រទេសផ្សេងទៀតជាង៧ពាន់តោន។
ប្រធាននាយកដ្ឋានការពារដំណាំនាំនៃអគ្គនាយកដ្ឋានកសិកម្ម លោក កែវ មុន្នីវុធ មានប្រសាសន៍ថា ការថយចុះគឺជារឿងធម្មតាទេនៅក្នុងទីផ្សារពិភពលោក ហើយក៏មិនពាក់ព័ន្ធទៅលើវិធានការយកពន្ធអង្កររបស់អឺរ៉ុបដែរ តែវាអាចពាក់ព័ន្ធនឹងការរៀបចំកុងត្រាថ្មីរបស់អ្នកបញ្ជាទិញដែលធ្វើឲ្យមានការរអាក់រអួលក្នុងខែនេះ។
លោកថា៖ «យើងមានស្អីបន្តិច ទាក់ទាញចូលតែរឿងនយោបាយ តែចលនាទីផ្សារវាមិនមែនថេររហូតទេ! វាមានឡើងចុះបន្តិចបន្តួចធម្មតាទេ បើខ្ញុំៗមិនទាញទៅឲ្យពាក់ព័ន្ធនឹងរឿងហ្នឹងទេ» ។
ទោះជាយ៉ាងប្រធានសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា បញ្ហាការយកពន្ធរបស់អឺរ៉ុប ទោះចង់មិនចង់ក៏ជាចំណែកមួយដែលធ្វើឲ្យការនាំចេញអង្ករកម្ពុជាថយចុះផងដែរ។ លោក ក៏បានជំរុញដល់រដ្ឋាភិបាលគួរមានវិធានការបន្ថែមទៀត ដើម្បីបញ្ចុះថ្លៃដើមនៃការផលិតអង្ករនៅកម្ពុជា ការបញ្ចេញថវិកាដើម្បីប្រមូលទិញអង្ករពីកសិករ និងការស្វែងរកទីផ្សារអង្ករបន្ថែម។
លោកថា៖ «តម្លៃស្រូវរបស់ប្រជាពលរដ្ឋនៅតាមជនបទបានធ្លាក់ចុះខ្លាំង ដោយសារតែ ព័ត៌មាននៃការលើកឡើងថា ការនាំចេញអង្ករទៅកាន់សហភាពអឺរ៉ុបត្រូវបានគេគិតពន្ធ។ អញ្ចឹង ធ្វើឲ្យប្រជាពលរដ្ឋមានបញ្ហាទីផ្សារពិបាកក្នុងការលក់។ អញ្ចឹង ប្រសិនជាវានៅតែបន្តធ្លាក់ចុះ គឺវាប៉ះពាល់ដូចពេលបច្ចុប្បន្ន អញ្ចឹងវាធ្វើឲ្យតម្លៃស្រូវរបស់ប្រជាកសិករកាន់តែធ្លាក់ថ្លៃផងដែរ! អញ្ចឹង វាកាន់តែមានបញ្ហា ដូច្នេះចំណូលនៃការលក់ស្រូវ និងចំណាយក្នុងការផលិតនោះវាមិនសមាមាត្រ មិនរួចថ្លៃដើមនិងមិនរួចថ្លៃបង់(ធនាគារ)»។
បើពិនិត្យលើរបាយការណ៍នាំចេញរបស់កម្ពុជា៥ឆ្នាំចុងក្រោយនេះ ចាប់ពីពាក់កណ្ដាលឆ្នាំ២០១៨ មកការនាំចេញអង្ករថយចុះជាបន្តបន្ទាប់ ហើយមានតែខែធ្នូមួយប៉ុណ្ណោះដែលមានកំណើន។
កម្ពុជានាំចេញអង្ករបានជាង ៦២ម៉ឺនតោន ក្នុងឆ្នាំ២០១៨ដោយបានធ្លាក់ចុះចំនួន ១.៥ភាគរយ បើធៀបនឹងទំហំនៃការនាំចេញអង្ករ ៦៣ម៉ឺនតោនកាលពីឆ្នាំ២០១៧៕
