លោកនាយករដ្ឋកមន្ត្រី ហ៊ុន សែន រំឭកយុវជនកុំឲ្យយកទិវានៃសេចក្តីស្រឡាញ់ ដែលជាវប្បធម៌បរទេសនោះ រំលងប្រពៃណីទំនៀមទម្លាប់ខ្មែរ។
ទិវានៃក្ដីស្រឡាញ់ ឬហៅជាភាសាអង់គ្លេសថា Valentine’s Day ដែលជាវប្បធម៌របស់បស្ចឹមលោក ត្រូវបានរៀបចំឡើងនៅរៀងរាល់ថ្ងៃទី១៤ ខែកុម្ភៈ។
លោក ហ៊ុន សែន បានសរសេរនៅលើហ្វេសប៊ុករបស់លោកថា បើនិយាយពីថ្ងៃ១៤ ខែកុម្ភៈ ប្រហែលជាមានអ្នកចាប់អារម្មណ៍ច្រើន។ លោករំឭកថា ចៅៗ និងក្មួយៗទើបពេញវ័យសុទ្ធតែដឹងហើយថា អ្វីដែលគួរធ្វើ និងអ្វីដែលមិនគួរធ្វើ។
មេដឹកនាំរូបនេះ បញ្ជាក់ថា៖ «សុភមង្គលត្រូវតែកើតចេញពីការរៀបចំគ្រួសារមួយត្រឹមត្រូវតាមច្បាប់ និងទំនៀមទម្លាប់ប្រពៃណីខ្មែរ។ អំពើផ្សេងពីនេះ នឹងមិននាំមកនូវសុភមង្គលឡើយ ទាំងខាងចៅស្រី ក៏ដូចជាខាងចៅប្រុស»។
នៅថ្ងៃនេះដែរ ក្រសួងអប់រំ យុវជន និងកីឡា ក៏បានណែនាំទៅគ្រឹះស្ថានសិក្សាទាំងអស់ឲ្យទប់ស្កាត់សកម្មភាពមិនប្រក្រតីក្នុងទិវានៃក្តីស្រឡាញ់ថ្ងៃ១៤ ខែកុម្ភៈនេះ។
ក្រសួងអះអាងថា ប៉ុន្មានឆ្នាំចុងក្រោយនេះ ទិវានៃក្តីស្រឡាញ់កាន់តែមានឥទ្ធិពលធំឡើងៗ ធ្វើឱ្យយុវវ័យភ្លេចការសិក្សា បាត់បង់សេចក្តីថ្លៃថ្នូររបស់ខ្លួន និងប្រពៃណីជាតិដ៏ផូរផង់របស់ខ្មែរ។
ចំណែករដ្ឋមន្ត្រីក្រសួងសុខាភិបាល លោក ម៉ម ប៊ុនហេង ក្នុងពិធីមួយក្នុងរាជធានីភ្នំពេញនាថ្ងៃនេះ បានអំពាវនាវទៅប្រជាពលរដ្ឋខ្មែរ និងយុវវ័យ ឲ្យយកទិវានៃក្តីស្រឡាញ់នេះ រួមគ្នាបរិច្ចាគឈាមទុកសង្គ្រោះជីវិតមនុស្សដែលរងគ្រោះ៕
