តុលាការក្រុងភ្នំពេញកោះហៅលោក រ៉ុង ឈុន ឲ្យចូលបំភ្លឺនៅចុងខែកុម្ភៈនេះ ករណីប្ដឹងសុំមោឃភាពសេចក្ដីប្រកាសរបស់ក្រសួងអប់រំដែលបានលុបឈ្មោះគ្រូបង្រៀនជាង១០នាក់។
កាលពីថ្ងៃទី១៦ ខែមករា លោករ៉ុង ឈុន រួមជាមួយអតីតគ្រូបង្រៀន១០នាក់ផ្សេងទៀតបានដាក់ពាក្យប្ដឹងរដ្ឋមន្ត្រីក្រសួងអប់រំ លោក ហង់ ជួនណារ៉ុន ដោយស្នើឱ្យតុលាការបដិសេធសេចក្ដីប្រកាសរបស់ក្រសួងអប់រំកាលពីថ្ងៃទី៣០ ខែមករា ឆ្នាំ២០១៨ និងផ្ដល់ក្របខណ្ឌជាគ្រូបង្រៀន ដល់ពួកគេវិញ។
ក្នុងដីកាកោះចុះថ្ងៃទី៨ ខែកុម្ភៈ ចៅក្រមសាលាដំបូងរាជធានីភ្នំពេញ លោក រស់ ពិសិដ្ឋ បានកោះហៅលោក រ៉ុង ឈុន ឲ្យចូលឆ្លើយបំភ្លឺនាថ្ងៃទី២៧ ខែកុម្ភៈ ឆ្នាំ២០១៩ វេលាម៉ោង៩ព្រឹក។
តុលាការបានបញ្ជាក់ក្នុងលិខិតនោះថា៖ «ចំពោះសាម៉ីភាគី បើពុំចូលខ្លួននោះ តុលាការអាចទទួលស្គាល់ថា សេចក្ដីអះអាងអំពីចំណុចសាកសួររបស់ភាគីម្ខាងទៀតជាការពិតបាន»។
កាលពីដើមឆ្នាំ២០១៨ រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន បានសម្រេចលុបឈ្មោះគ្រូបង្រៀន និងបុគ្គលិកអប់រំចំនួន១១នាក់ ដែលជាអតីតមន្ត្រីជាប់ឆ្នោត និងមន្ត្រី គ.ជ.ប កូតា មកពីបក្សប្រឆាំង ចេញពីក្របខ័ណ្ឌក្រសួងអប់រំ ក្រោមហេតុផលថាគ្រូបង្រៀនទាំងនោះអវត្តមានពីការងារដោយគ្មានច្បាប់អនុញ្ញាត។
ក្រោយការលុបឈ្មោះចេញពីក្របខ័ណ្ឌរដ្ឋ ក្រុមគ្រូបង្រៀនទាំងនោះបានដាក់លិខិតអន្តរាគមន៍ជាច្រើនទៅក្រសួងអប់រំ ទៅលោកនាយករដ្ឋមន្ត្រី និងទៅសហគមន៍អន្តរជាតិផងដែរ៕
