មន្ត្រីនគរបាលខេត្តបន្ទាយមានជ័យ បានឲ្យដឹងថា ស្ត្រីម្នាក់បានស្លាប់ ហើយកូន ៣នាក់របស់ស្ត្រីរូបនោះ ត្រូវបានបញ្ជូនទៅសង្គ្រោះនៅមន្ទីរពេទ្យរបង្អែកស្រុក ក្រោយពីពួកគេបរិភោគត្រីក្រពត។
អធិការស្រុកព្រះនេតព្រះ លោក មាស ឫទ្ធី ប្រាប់ វីអូឌី នៅថ្ងៃនេះថា ក្រុមគ្រួសារដែលរងគ្រោះបានហូបត្រីក្រពត រស់នៅភូមិនៅភូមិស្រេះគោកស្រុក ឃុំព្រះនេត្រព្រះ។
លោកបន្តថា គ្រួសារនេះ បានហូបតាំងពីថ្ងៃទី១៥ រហូតដល់ថ្ងៃទី១៧ ខែកុម្ភៈ ទើបបានពុល បណ្ដាលឲ្យស្ត្រីដែលជាម្ដាយបានស្លាប់ និងកូន ៣នាក់ កំពុងស្រាយព្យាបាលនៅមន្ទីរបង្អែកស្រុកព្រះនេតព្រះ។
លោក មាស ឫទ្ធី ប្រាប់ថា៖ «គាត់យកពីគេបង់ត្រីតាមស្រះ ដែលគេបោះចោល។ អញ្ចឹង គាត់យកអាត្រីហ្នឹងមកធ្វើម្ហូបអាហារ។ គេបានប្រាប់ហើយថា មិនឲ្យយក ត្រីហ្នឹងពុល ប៉ុន្តែ គាត់ថា មិនអីទេ។ គេថា ប្រាប់គាត់ដែរ ប៉ុន្តែ គាត់មិនស្ដាប់»។
មន្ត្រីនគរបាលរូបនេះ ឲ្យដឹងថា នេះជាលើកទី២ហើយដែលប្រជាពលរដ្ឋនៅក្នុងស្រុកព្រះនេត្រព្រះ បានស្លាប់ ក្រោយពីហូបពុលត្រីក្រពត។
កាលពីខែមករាឆ្នាំមុន ក្រសួងសុខាភិបាលបានចេញសេចក្ដីប្រកាសព័ត៌មានមួយ ដោយក្រើនរំលឹកប្រជាពលរដ្ឋ កុំឲ្យបរិភោគត្រីក្រពតចំនួន ៣ប្រភេទ បន្ទាប់ពីរកឃើញថា ផ្ទុកទៅដោយជាតិពុលខ្ពស់ អាចបណ្ដាលឲ្យមានជំងឺធ្ងន់ធ្ងរ និងសម្លាប់ជីវិតមនុស្សបាន ដោយសារតែជាតិពុលក្នុងខ្លួនត្រីក្រពត នឹងបង្កផលប៉ះពាល់ប្រព័ន្ធសរសៃប្រសាទកណ្ដាល និងធ្វើឲ្យស្លាប់តែម្ដង៕
