មន្ត្រីជំនាញបសុសត្វ បានអះអាងថា សមត្ថកិច្ចកំពុងតែពង្រឹងការត្រួតពិនិត្យការនាំចូលជ្រូកតាមច្រកព្រំដែនវៀតណាម បន្ទាប់ពីផ្ទុះជំងឺប៉េស្តជ្រូកអាហ្រ្វិកនៅប្រទេសជិតខាងកម្ពុជាមួយនេះ។
អគ្គនាយកនៃអគ្គនាយកដ្ឋានសុខភាព និងផលិតកម្មសត្វ លោក តាន់ ផាន់ណារ៉ា បានប្រាប់VOD នៅព្រឹកនេះថា បន្ទាប់ពីផ្ទុះឡើងនៃជំងឺនេះនៅភាគខាងជើងប្រទេសវៀតណាម អគ្គនាយកដ្ឋានបានសហការជាមួយសមាគមអ្នកចិញ្ចឹមជ្រូក ដើម្បីផ្សព្វផ្សាយពីវិធីការពារក្នុងស្រុក ខណៈបញ្ជាទៅកាន់មន្ត្រីត្រួតពិនិត្យទៅលើជ្រូកនាំចូលពីប្រទេសនេះផងដែរ។
លោកបន្ថែមថា បច្ចុប្បន្ន ក្រៅពីទាមទារលិខិតបញ្ជាក់សុខភាពសត្វនាំចូលពីប្រទេសវៀតណាមហើយនោះ មន្ត្រីនៅតាមព្រំដែននឹងពិនិត្យទៅលើសត្វដែលនាំចូលនោះបន្ថែមផងដែរ។
លោកថា៖ «យើងក៏មើលពីសុខភាពសត្វជាក់ស្ដែងផងដែរ មុននឹងឡើងឡានមកកម្ពុជា។ មើលលើស្ថានភាពជាក់ស្ដែង តើសត្វហ្នឹងដង្ហក់ឬអត់? ធម្មតា ជំងឺហ្នឹងវាក្ដៅធ្វើឲ្យសត្វក្ដៅ ដង្ហក់ និងមានរោគសញ្ញាពណ៌ស្វាយនៅពោះ ហើយបន្ថែមលើពីនេះ ឥឡូវ យើងមានវិធានការបន្ថែមទៀត គឺយើងធ្វើតេស្ដឈាមដែលនាំចូល គឺធ្វើជា Random ចន្លោះៗ យកមកពិសោធនៅមន្ទីរពិសោធន៍នៃអគ្គនាយកដ្ឋាន»។
លោកបន្ថែមថា ជំងឺប៉េស្តជ្រូកអាហ្វ្រិកនេះ ជាជំងឺថ្មីដែលមិនទាន់មានថ្នាំព្យាបាលនោះទេ ដោយវាចម្លងតាមរយៈការទំលើសំលៀកបំពាក់របស់មនុស្ស និងសាច់សត្វជ្រូក ហើយប្រសិនជាវាឆ្លងដល់កសិដ្ឋានណាហើយ ជ្រូកក្នុងកសិដ្ឋាននោះនឹងឆ្លងងាប់ស្ទើរតែទាំងអស់ ដែលធ្វើឲ្យអ្នកចិញ្ចឹមខាតបង់ជាខ្លាំង។
បើតាមលោក តាន់ ផាន់ណារ៉ា បច្ចុប្បន្ន កម្ពុជានាំចូលជ្រូកចន្លោះពី ១៥០០ ដល់ ២០០០ក្បាលពីប្រទេសវៀតណាម។
អគ្គនាយកក្រុមហ៊ុន ម៉ុង ឬទ្ធី និងជាម្ចាស់កសិដ្ឋានចិញ្ចឹមជ្រូកដ៏ធំមួយនៅកម្ពុជា លោក ម៉ុង ឫទ្ធី បានលើកឡើងពីក្តីបារម្ភអំពីការរីករាលដាលនៃជំងឺនេះ ហើយក៏បានជំរុញដល់អ្នកចិញ្ចឹមជ្រូកផ្សេងទៀតឲ្យមានការប្រុងប្រយ័ត្ន និងចូលរួមរាយការណ៍ពីករណីនេះផងដែរ ប្រសិនជាសង្ស័យ ឬឃើញមានការចរាចរជ្រូកទាំងនេះ។
លោក ម៉ុង ឫទ្ធី ប្រាប់ថា៖ «គ្មានអ្នកណាម្នាក់អាចធ្វើរឿងហ្នឹងម្នាក់ឯងបានទេ ទាល់តែទាំងអស់គ្នារួមគ្នាការពារ បានអាចទប់ស្កាត់បាន។ តែបើចេះតែឆ្លើយដាក់គ្នា អ្នកនេះអ្នកនោះ អត់បានទេ ហើយកុំចាំតែរដ្ឋាភិបាល ព្រោះសមត្ថកិច្ចរបស់រដ្ឋតិចជាងអ្នកដែលរត់ពន្ធ ហើយច្រករបៀងវាច្រើន។ អញ្ចឹង កុំចាំតែបន្ទោស សូមឲ្យជួយទាំងអស់គ្នាបានអាចទៅរួច»។
ទោះជាយ៉ាងណា សម្រាប់ប្រធានសមាគមអ្នកចិញ្ចឹមសត្វ លោក ស្រ៊ុន ពៅ នៅតែលើកឡើងពីក្តីបារម្ភពីការលួចនាំចូលសត្វជ្រូកនៅតាមច្រករបៀង ដែលពុំមានសមត្ថកិច្ចយាមកាមតឹងរ៉ឹងនោះ ដោយលោកស្នើដល់អាជ្ញាធរ ជាពិសេសពេទ្យសត្វត្រូវចុះធ្វើសកម្មភាពឲ្យបានខ្លាំងក្លា ដើម្បីធានាថា គ្មានជ្រូកមានជំងឺនេះឆ្លងចូលមកកម្ពុជាបាន។
លោក ស៊្រុន ពៅ មានប្រសាសន៍ថា៖ «សមាគមបានផ្សព្វផ្សាយដល់អ្នកចិញ្ចឹមរាប់ខែមកហើយ មិនមែនទើបតែឥឡូវទេ តែព្រោះតែឥឡូវមានការផ្ទុះនៅវៀតណាម ដែលធ្វើឲ្យពួកយើងមានការបារម្ភបន្ថែមទៀត»។
កាលពីខែសីហា ឆ្នាំ២០១៨កន្លងទៅ ជំងឺប៉េស្តជ្រូកអាហ្វ្រិក បានរីករាលដាលក្នុងខេត្ត និងតំបន់ចំនួន ២៥ នៅប្រទេសចិន ដែលពេលនោះ អាជ្ញាធរចិនបានសម្លាប់ជ្រូកចោលរាប់ម៉ឺនក្បាល។
ក្រោយផ្ទុះជំងឺនេះ អង្គការស្បៀងអាហារ និងកសិកម្ម ហៅកាត់ថា FAO បានព្រមានថា ជំងឺប៉េស្តជ្រូកអាហ្វ្រិកដែលកើតឡើងនៅចិន អាចរីករាលដាលដល់ប្រទេសផ្សេងទៀតនៅតំបន់អាស៊ី។ អង្គការនេះ ក៏បានឲ្យដឹងដែរថា មេរោគនេះធន់ខ្លាំង ហើយអាចរស់នៅបានយូរ ពោលគឺវាអាចស៊ាំនឹងអាកាសធាតុក្តៅខ្លាំង ត្រជាក់ខ្លាំង ហើយមិនត្រឹមតែប៉ុណ្ណោះ វាថែមទាំងអាចរស់នៅបានក្នុងផលិតផលសាច់ជ្រូកក្រៀមផងដែរ។
ប៉េស្តជ្រូកអាហ្វ្រិកនេះ បានផ្ទុះខ្លាំងកាលពីទសវត្សឆ្នាំ១៩៦០នៅអឺរ៉ុប និងអាមេរិក។ ដោយសារតែមានប្រវត្តិនៃការផ្ទុះ និងការសាយភាយនៅតំបន់ផ្សេងៗគ្នាបែបនេះ ទើបអង្គការស្បៀងអាហារ និងកសិកម្ម យល់ថា ជំងឺនេះអាចរីករាលដាលដល់ប្រទេសជិតខាង ជាពិសេសប្រទេសនៅតំបន់អាស៊ីអាគ្នេយ៍ និងឧបទ្វីបកូរ៉េ ព្រោះប្រទេសក្នុងតំបន់ទាំងនេះមានតម្រូវការសាច់ជ្រូកខ្ពស់៕
