ប្រជាពលរដ្ឋរាប់សិបនាក់មកពីបណ្ដាខេត្តនានា បានសម្រុកទៅចាក់វ៉ាក់សាំងប្រឆាំងនឹងជំងឆ្កែឆ្កួតនៅឯវិទ្យាស្ថានប៉ាស្ទ័រក្នុងរាជធានីភ្នំពេញ ក្រោយមានការផ្សព្វផ្សាយថា ក្មេងស្រីម្នាក់បានស្លាប់កាលពីពាក់កណ្ដាលខែនេះ ដោយសារឆ្លងជំងឺឆ្កែឆ្កួតក្រោយពីឆ្មាខាំ និងក្រញ៉ៅ។
បើតាមព័ត៌មានលើបណ្តាញសង្គមចែករំលែកតៗគ្នា ក្មេងស្រីម្នាក់អាយុ ១០ឆ្នាំ រស់នៅខេត្តស្វាយរៀង ត្រូវបានឆ្មាខាំ និងក្រញៅ បណ្តាលឲ្យឆ្លងជំងឺឆ្កែឆ្កួតស្លាប់ កាលពីយប់ថ្ងៃទី១៣ ខែកុម្ភៈ ឆ្នាំ២០១៩។
ករណីនេះអ្នកស្រី ហេង ឡូត ដែលអះអាងថា មកពីស្រុកកំពង់សៀម ខេត្តកំពង់ចាម បានរៀបរាប់ថា ចៅរបស់គាត់ត្រូវបានឆ្កែខាំប្រហែលជា ៥ថ្ងៃមកហើយ ប៉ុន្តែ អ្នកស្រីថា ដើមចមដែលនាំយកមកព្យាបាលនៅវិទ្យាស្ថានប៉ាស័្ទរ ដោយសារខ្លាចចៅគាត់ឆ្លងជំងឺឆ្កែឆ្កួតបណ្តាលឲ្យស្លាប់ដូចវីដេអូបង្ហោះលើបណ្តាញសង្គម។
អ្នកស្រីមានប្រសាសន៍ថា៖ «គេបង្ហោះហ្វេសប៊ុកទៅឃើញខ្លាច ភ័យយកចៅមក ខ្លាចងាប់ ឮគេថា ងាប់គ្រប់គ្នា ខ្លាចភ័យ ឮតគ្នា ភ័យ ឆ្មាខាំ ឆ្កែខាំភ័យ សុខចិត្តអស់លុយម៉េចក៏ដោយ សុខចិត្តយកចៅមក»។
ការចែករំលែកតៗគ្នានូវព័ត៌មានមួយនេះនៅលើបណ្ដាញសង្គមហ្វេសប៊ុក បានជំរុញឲ្យពលរដ្ឋជាច្រើនរយនាក់ សម្រុកមកស្វែងរកព្យាបាល និងចាក់ថ្នាំបង្ការនៅរាជធានីភ្នំពេញ ហើយក៏ជំរុញឲ្យពួកគេប្រឈមបញ្ហាច្រើនផងដែរ។
អ្នកស្រី ផៃ វ៉េង មកពីស្រុកបារាយណ៍ ខេត្តកំពង់ធំ បានរៀបរាប់ថា គាត់ឡើងមករាជធានីភ្នំពេញចំនួន ២យប់ ៣ថ្ងៃមកហើយ ដើម្បីចាំឲ្យគ្រូពេទ្យចាក់ថ្នាំឲ្យកូន ប៉ុន្តែ រហូតមកដល់ថ្ងៃទី២១ ខែកុម្ភៈនេះ មិនទាន់បានចាក់នៅឡើយ។ ករណីនេះ អ្នកស្រី រិះគន់កន្លែងផ្តល់សេវាថា មានមនុស្សច្រើនពេក នឹងមានភាពយឺតយ៉ាវ ធ្វើឲ្យគាត់ខាតពេលវេលាធ្វើសំណើរ និងការងាររកស៊ីជាដើម។
អ្នកស្រីនិយាយពីការលំបាកថា៖«មកទីនេះ ២ ទៅ ៣ដងហើយមិនទាន់បានផង អស់ទាំងលុយ អស់ទាំងអីទៀត អត់បានចាក់កូនប្រាំថ្ងៃហើយ»។
លោក ប៉ាង ណាត មកពីស្រុកពារាំង ខេត្តព្រៃវែង បានត្អូញត្អែរថា មានការលំបាកច្រើនពេលធ្វើដំណើរពីខេត្តមករាជធានីភ្នំពេញ ដើម្បីយកកូនស្រីអាយុប្រហែលជា ១០ឆ្នាំ ដែលឆ្កែខាំ មកចាក់ថ្នាំនៅវិទ្យាស្ថានប៉ាស័្ទរ។ លោកអំពាវនាវទៅក្រសួងសុខាភិបាល ឲ្យចែកចាយថ្នាំការពារជំងឺឆ្កែឆ្កួតនេះ ទៅគ្រប់បណ្តារាជធានី-ខេត្ត ទើបដោះស្រាយបញ្ហាទាំងនោះបាន។
លោកអំពាវនាវថា៖ «ក្រសួងសុខាភិបាលពន្លឿនចែកចាយថ្នាំទៅតាមទីរួមខេត្ត។ បើថា មន្ទីរពេទ្យបង្អែកស្រុកច្រើន មួយខេត្តមានតែមួយក៏បានដែរ ឲ្យទូទាំង ២៥ខេត្ត-ក្រុងតែម្តងទៅ ដើម្បីកាត់បន្ថយប្រជាពលរដ្ឋកុំឲ្យមានគ្រោះថ្នាក់ដោយសារជំងឺឆ្កែឆ្កួត ឬជំងឺផ្សេងៗ ដោយសារតេតាណុស»។
អ្នកនាំពាក្យក្រសួងសុខាភិបាល លោក លី សូវ៉ាន់ មិនអាចទាក់ទងសុំការបំភ្លឺបានទេនៅថ្ងៃនេះ។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី ពន្យល់ថា នៅពេលឆែខាំ ត្រូវទៅចាក់ថ្នាំ ៤ដង ដោយក្នុងមួយដងតម្លៃ ១០ដុល្លារ និង៣ដងទៀតតម្លៃសរុប ២៤ដុល្លារ។ លោកថា ថ្នាំវ៉ាក់សាំងនេះជាជំនួយរបស់រដ្ឋ ប៉ុន្តែ លោកបង្ហាញជាចម្ងល់ថា ហេតុអ្វីគ្រូពេទ្យយកតម្លៃថ្លៃ និងធ្វើការបន្លំម៉ោង ដើម្បីរកស៊ីក្រៅទៅវិញ។
លោកមានប្រសាសន៍ថា៖ «មួយឆ្នាំៗ គេចំណាយលុយរាប់រយដុល្លារ លុយជាតិ ដើម្បីជួយដល់ផ្នែកសុខភាព ផ្នែកវ៉ាក់សាំង។ ដល់ពេលទៅរកគាត់ សេវាយ៉ាប់ ហើយអត់ទាន់ដល់ម៉ោងផង គាត់បិទមុនម៉ោងក៏មានដែរនៅប៉ាស្ទ័រជិតកាល់ម៉ែតត្រ ត្រូវម៉ោង ៥គាត់ចេញ គាត់ចេញម៉ោង ៣ គាត់ប្រញាប់ទៅរកស៊ីនៅគ្លីនិកផ្ទះរបស់គាត់ រហូតដល់គាត់ធ្វើកាតឲ្យទៅចាក់នៅផ្ទះរបស់គាត់ក៏មានដែរ»។
វិទ្យាស្ថានប៉ាស្ទ័រកម្ពុជា បានរៀបរាប់នៅលើទំព័រហ្វេសប៊ុករបស់ខ្លួនកាលពីថ្ងៃម្សិលមិញថា ស្ថាប័នមួយនេះកំពុងព្យាយាមផ្ដល់សេវាដល់ប្រជាពលរដ្ឋទូទៅ ប៉ុន្តែ ថា ផ្ដល់អទិភាពដល់ពលរដ្ឋដែលត្រូវបានឆ្កែខាំធ្ងន់ធ្ងរ កុមារតូចៗ ព្រះសង្ឈ ជនពិការ មនុស្សចាស់ជរា និងស្រ្តីមានផ្ទៃពោះ៕
