កម្មករប្រមាណ ៨០០នាក់បម្រើការងារនៅរោងចក្រ W&D បានប្រមូលផ្តុំគ្នាមុខសាលាដំបូងរាជធានីភ្នំពេញ ខណៈតំណាងពួកគេចំនួន ៦រូបចូលបំភ្លឺនៅតុលាការនៅថ្ងៃនេះ ជុំវិវាទការងារដែលបានអូសបន្លាយជិត ៣ខែមកហើយនោះ។
ចៅក្រមសាលាដំបូងរាជធានីភ្នំពេញ លោក ធាម ច័ន្ទពិសិដ្ឋ បានកោះហៅតំណាងកម្មករចំនួន ៦នាក់បម្រើការងារនៅរោងចក្រ W&D ឲ្យចូលរួមក្នុងនីតិវិធីត្រៀមទាញហេតុផលដោយផ្ទាល់មាត់ ជុំវិញការប្តឹងតវ៉ាចំពោះដីកាសម្រេចចាត់ចែងបណ្តោះអាសន្នរបស់តុលាការទៅតាមបណ្តឹងរបស់ភាគីក្រុមហ៊ុនពេលកន្លងមក។
លោក សឿង ប្រុស ដែលអះអាងថា ជាតំណាងកម្មករប្រាប់អ្នកសារព័ត៌មានបន្ទាប់ចេញពីតុលាការថា តំណាងកម្មករបាននិយាយលើកហេតុផលជាច្រើនប្រាប់ទៅតុលាការ និងស្នើទៅតុលាការឲ្យលុបចោលដីការក្សាការពារសម្រេចចាត់ចែងជាបណ្តោះអាសន្នរបស់តុលការ និងក្រុមប្រឹក្សាអាជ្ញាកណ្តាល ដោយថា ការតវ៉ារបស់ក្រុមកម្មករនោះ គឺធ្វើតាមនីតិវិធី និងស្របច្បាប់ រួមទាំងគ្មានអំពើហិង្សា។
លោក សឿង ប្រុស បន្ថែមថា៖ «ព្រោះថា កម្មករធ្វើកូដកម្មដោយសន្តិវិធី អត់មានទៅបំផ្លិចបំផ្លាញរបស់សាធារណៈ និងរបស់អ្នកណាទេ គឺគាត់ធ្វើកូដកម្មនេះ ទាមទារអត្ថប្រយោជន៍ការងាររបស់គាត់តែប៉ុណ្ណោះ»។
បើតាមកំណត់ហេតុស្តីពីនីតិវិធីទាញហេតុផលផ្ទាល់មានចុះថ្ងៃទី២៥ ខែកុម្ភៈនេះ លោក គឹម ពេជ្យដា មេធាវីតំណាងឲ្យភាគីក្រុមហ៊ុន បានច្រានចោលការលើកឡើងរបស់តំណាងកម្មករ ដោយចោទថា ក្រុមកម្មករបានធ្វើកូដកម្មដោយខុសច្បាប់ ដោយថា ក្រុមកម្មករបានធ្វើកូដកម្មបិទផ្លូវសាធារណៈ និងបិទផ្លូវច្រកចេញចូលរោងចក្រ ហើយមានការញុះញង់ដែលធ្វើផ្ទុយពីច្បាប់ស្តីពីការងារ។
ចំណែកលោក តាំង ម៉េង មេធាវីតំណាងឲ្យភាគរោងចក្រ បានស្នើទៅតុលាការឲ្យតម្កល់ដីកាសម្រេចចាត់ចែងបណ្តោះអាសន្នរបស់តុលាការនោះ ទុកជាបានការដដែល។
ប៉ុន្តែ បើតាមកម្មករ គឺតុលាការមិនទាន់សម្រេចថាយ៉ាងណានៅឡើយទេ ដោយទុកពេលពិនិត្យ និងពិចារណាសិន។
តំណាងកម្មករម្នាក់ទៀត អ្នកស្រី ជា សុខា ឲ្យដឹងថា នៅរសៀលម៉ោង៣នេះ គឺក្រសួងការងារបានកោះហៅតំណាងកម្មករឲ្យចូលចរចារកដំណោះស្រាយផងដែរ។
កម្មការនីរូបនេះបន្តថា ក្រុមកម្មករទាមទារចូលបំពេញការងារទាំងអស់គ្នាវិញ ដោយគ្មានការរើសអើង និងទាមទារឲ្យក្រុមហ៊ុនត្រូវដោះស្រាយសំណងជូនកម្មករប្រាំចំណុចតាមច្បាប់ស្តីពីការងារ ប្រសិនបើក្រុមហ៊ុនបដិសេធទទួលយកកម្មករមួយចំនួនឲ្យត្រឡប់ចូលធ្វើការវិញនោះ។
អ្នកស្រីបន្ថែមថា៖ «ប្រសិនបើប្រជុំនៅក្រសួងពេលម៉ោង ៣ហ្នឹង ពុំមានដំណោះស្រាយអ្វីទាំងអស់ទេ ដំណាក់ការចុងក្រោយ គឺពួកខ្ញុំសុំហែរញត្តិនៅថ្ងៃទី២៦ហ្នឹងហើយ ហើយការហែរញត្តិហ្នឹង គឺពួកខ្ញុំជម្រាបទៅដល់ថ្នាក់លោកពូ ដែលជាអ្នកគ្រប់គ្រងខណ្ឌ ពូៗដែលជាកងកម្លាំងតាមផ្លូវទាំងអស់ គឺពួកខ្ញុំមិនសុំឲ្យគាត់ជួយជាយានជំនិះអីទេ គឺពួកខ្ញុំនឹងធ្វើដំណើរដោយថ្មើរជើងទៅផ្ទះសម្តេចផ្ទាល់តែម្តង ប្រហែលទៅខាងតាខ្មៅ ទោះឆ្ងាយយ៉ាងណាក៏ដោយ ដើម្បីឲ្យសម្តេចជួយរកយុត្តិធម៌ជូនពួកខ្ញុំ ទោះបីឆ្ងាយក៏ពួកខ្ញុំទ្រាំដែរ»។
មន្រ្តីដោះស្រាយវិវាទនៅសម្ព័ន្ធសហជីពស៊ីខៅឌូ លោក ស៊ាង យ៉ូត មានប្រសាសន៍ថា តុលាការគួរតែលុបចោលដីកាសម្រេចចាត់ចែងបណ្តោះអាសន្នរបស់ខ្លួននោះចោល ដោយលោកថា វាបានធ្វើឲ្យប៉ះពាល់ដល់សិទ្ធិនៃការតវ៉ាដោយសន្តិវិធីរបស់កម្មករ និងប៉ះពាល់ដល់ជីវភាពរស់នៅរបស់កម្មករ។
លោកបន្ថែមថា៖ «គួរតែភាគីពាក់ព័ន្ធមានវិធានការក្នុងការដោះស្រាយសម្របសម្រួលដោយក្រសួងការងារ ឬក៏ស្ថាប័នដែលពាក់ព័ន្ធ ដើម្បីបញ្ចប់រឿងហ្នឹង មិនគួរណាចេញដីកាដើម្បីដាក់សម្ពាធលើបងប្អូនកម្មករអញ្ចឹងទេ អញ្ចឹងតុលាការគួរតែលប់ចោលដីកាសម្រេចរបស់ខ្លួនចោល»។
កាលពីចុងឆ្នាំ២០១៨ កម្មករជិត ២ពាន់នាក់បម្រើការងារនៅរោងចក្រ W&D ស្ថិតក្នុងភូមិឬស្សី សង្កាត់ស្ទឹងមានជ័យ ខណ្ឌមានជ័យ បានផ្ទុះការតវ៉ាដើម្បីទាមទារទៅថៅកែឲ្យបើកប្រាក់អតីតភាពការងារជូនពួកគេជាកញ្ចប់មុនឆ្នាំ២០១៩ រហូតថៅកែរោងចក្រសម្រេចបញ្ឈប់កម្មករជាង ១ពាន់នាក់ ដោយសារមិនគោរពតាមការសម្រេចរក្សាការពាររបស់តុលាការ។ ប៉ុន្តែ ក្រោយមករោងចក្រនេះ បានប្រកាសទទួលយកកម្មករឲ្យចូលបម្រើការងារវិញ ដោយលើកលែងកម្មករជាង ១០០នាក់។
កាលពីថ្ងៃទី២០ ខែកុម្ភៈ លោកនាយករដ្ឋមន្ត្រី ហ៊ុន សែន បានបញ្ជាទៅក្រសួងការងារឲ្យសហការជាមួយភាគីរោងចក្រធ្វើការដោះស្រាយបន្ទាន់ ករណីថៅកែបញ្ឈប់កម្មករក្នុងរឿងវិវាទការងារនេះ ដោយលោកថា ការបញ្ឈប់នោះមិនមែនជាជម្រើសរើសល្អឡើយ៕
