សាលាដំបូងរាជធានីភ្នំពេញ បានច្រានចោលសំណើរបស់ក្រុមកម្មករោងចក្រ W&D ដែលស្នើទៅតុលាការ សុំឲ្យលុបចោលដីការក្សារការពារសម្រេចចាត់ចែងជាបណ្តោះអាសន្ន ដោយតុលាការមួយនេះ រក្សាសេចក្តីសម្រេចនោះទុកជាបានការដដែល។
កាលពីម្សិលមិញនេះ តំណាងកម្មករ៦នាក់បម្រើការងារនៅរោងចក្រ W&D បានចូលទៅបំភ្លឺនៅសាលាដំបូងរាជធានីភ្នំពេញ ដើម្បីទាញហេតុផលដោយផ្ទាល់មាត់ ជុំវិញការប្តឹងតវ៉ាចំពោះដីកាសម្រេចចាត់ចែងបណ្ណោះអាសន្នរបស់តុលការទៅតាមបណ្តឹងរបស់ភាគីក្រុមហ៊ុនពេលកន្លងមក។
ក្នុងដីកាសម្រេចចុះថ្ងៃទី២៥ ខែកុម្ភៈ ចៅក្រមសាលាដំបូងរាជធានីភ្នំពេញ លោក ធាម ច័ន្ទពិសិដ្ឋ បានសម្រេចតម្កល់ដីកាចាត់ចែងជាបណ្តោះអាសន្នរបស់សាលាដំបូងរាជធានីភ្នំពេញ ទុកជាបានការដដែល និងបានទុកពេលឲ្យភាគីមិនពេញចិត្តអាចប្តឹងជំទាស់បន្តទៀត។
តំណាងកម្មករ លោក សឿង ប្រុស មានប្រសាសន៍ថា ការសម្រេចរបស់តុលាការនេះ គឺមិនបានផ្តល់ភាពយុត្តិធម៌សម្រាប់កម្មករនោះទេ ដោយថា ការធ្វើកូដកម្មរបស់ពួកគេ គឺធ្វើឡើងស្របតាមច្បាប់។
លោក បន្ថែមថា៖ «ការដែលតុលាការសម្រេចអញ្ចឹង គឺជាការដាក់សំពាធលើបងប្អូនកម្មករ ព្រោះអីពួកគាត់ធ្វើកូដកម្មតាមសន្តិវិធី ដោយគាត់បានចូលបម្រើការងារវិញតាមការកំណត់របស់តុលាការហើយ។ ដល់ពេលកម្មករតវ៉ាឲ្យលុបចោល មិនលប់ចោល! ខ្ញុំគិតថា អយុត្តិធម៌ វាអត់សាកសម គៀបសង្កត់លើកម្មករ។ ហើយកម្មករពួកគាត់នឹងផ្តិតមេដៃតវ៉ាជំទាស់នឹងដីកានេះម្តងទៀត»។
ក្នុងកំណត់ហេតុរបស់តុលាការ ក្រុមមេធាវីតំណាងឲ្យភាគីក្រុមហ៊ុន បានអះអាងថា ក្រុមកម្មករបានធ្វើកូដកម្មដោយខុសច្បាប់ ដោយថា បានបិទផ្លូវសាធារណៈ បិទផ្លូវច្រកចេញចូលរោងចក្រ និងមានការញុះញង់ឲ្យធ្វើសកម្មភាពដែលផ្ទុយពីច្បាប់ស្តីពីការងារ។
ក្រុមមេធាវីទាំងនោះលើកឡើងថា ដីកាសម្រេចចាត់ចែងបណ្តោះអាសន្នរបស់សាលាដំបូងរាជធានីភ្នំពេញគឺមានលក្ខណៈត្រឹមត្រវតាមច្បាប់ និងបានស្នើទៅតុលាការឲ្យរក្សាទុកជាបានការដដែល។
កាលពីថ្ងៃទី២០ ខែកុម្ភៈ លោកនាយករដ្ឋមន្ត្រី ហ៊ុន សែន បានបញ្ជាទៅក្រសួងការងារឲ្យសហការជាមួយភាគីរោងចក្រធ្វើការដោះស្រាយជាបន្ទាន់ ករណីថៅកែបញ្ឈប់កម្មករក្នុងរឿងវិវាទការងារនេះ ដោយលោកថា ការបញ្ឈប់នោះមិនមែនជាជម្រើសរើសល្អឡើយ។
លោកបន្ថែមថា៖ «សូមឲ្យក្រសួងការងារនិងបណ្ដុះបណ្ដាលវិជ្ជាជីវៈ ធ្វើការកិច្ចការងារនេះ ជាមួយនឹងកម្មករ អាចជាមួយនឹងម្ចាស់រោងចក្រ សូមកុំអាលយកវិធានការប្រញាប់ប្រញាល់បញ្ឈប់កម្មករ ត្រូវខិតខំសម្របសម្រួលឲ្យពួកគេបានទទួលការងារធ្វើ។ នេះ វាមិនមែនជា កំហុសធ្ងន់ធ្ងរដែលជាប្រភេទនៃកំហុសព្រហ្មទណ្ឌនោះទេ។ បើសិនជាកំហុសព្រហ្មទណ្ឌតុលាការ គេនឹងចាត់វិធានការទៅលើបញ្ហានោះ ប៉ុន្តែ ក្នុងវិវាទការងារ មិនគួរឈានទៅដល់បណ្ដេញចេញនូវអ្នកធ្វើការ»។
តំណាងកម្មករលោក សឿង ប្រុស ឲ្យដឹងថា នៅថ្ងៃនេះ ក្រុមកម្មករបានបន្តប្រមូលផ្តុំគ្នាតវ៉ាមុខរោងចក្រ ដោយគ្រោងនាំគ្នាហែរជាក្បួនទៅរកកិច្ចអន្តរាគមន៍ពីនាយករដ្ឋមន្រ្តី ហ៊ុន សែន ប៉ុន្តែ ត្រូវបានអាជ្ញាធរខណ្ឌមានជ័យចុះទៅសម្របសម្រួល ដោយសន្យាកោះហៅភាគីពាក់ព័ន្ធមកដោះស្រាយដល់រោងចក្រនៅរសៀលនេះ។
លោកបន្ថែមថា៖ «តែប្រសិនជានៅម៉ោង៣រសៀលនេះ គាត់អត់ទទួលបានសារជាចំណុចណាមួយ ក្នុងការដោះស្រាយរបស់ក្រសួងការងារទេ ស្អែកគាត់នឹងហែរញត្តិទៅរកកិច្ចអន្តរាគមន៍ពីលោកនាយករដ្ឋមន្រ្តីឲ្យជួយដោះស្រាយ ទោះមានរឿងអីកើតឡើងក៏ពួកគាត់ត្រូវតែហែរញត្តិដែរ ព្រោះពួកគាត់តវ៉ាជិត៣ខែហើយ»។
វីអូឌី មិនអាចសុំការឆ្លើយតបពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានទេជុំវិញវិវាទការងារនៅរោងចក្រ W&D នេះ។
ក្រុមកម្មករអះអាងថា ដំណោះស្រាយដែលពួកគេចង់បាន គឺពួកគេសុំចូលបំពេញការងារទាំងអស់គ្នាវិញ ដោយគ្មានការរើសអើង និងទាមទារឲ្យក្រុមហ៊ុនត្រូវដោះស្រាយសំណងជូនកម្មករប្រាំចំណុចតាមច្បាប់ស្តីពីការងារ ប្រសិនបើក្រុមហ៊ុនបដិសេធមិនទទួលយកកម្មករមួយចំនួនឲ្យត្រឡប់ចូលធ្វើការវិញនោះ៕
