មន្ត្រីសាលាដំបូងខេត្តព្រះសីហនុ អះអាងថា តុលាការខេត្តនេះកំពុងសាកសួរមន្ត្រីអាវុធហត្ថម្នាក់និងយោធិនម្នាក់ ពាក់ព័ន្ធការប្រើប្រាស់អំពើហិង្សាលើពលរដ្ឋ អំឡុងពេលចុះអនុវត្តសាលដីការបស់តុលាការក្នុងសំណុំរឿងជម្លោះដីធ្លីមួយ ស្ថិតនៅស្រុកព្រៃនប់ ខេត្តព្រះសីហនុ។
ព្រះរាជអាជ្ញារងសាលាដំបូងខេត្តព្រះសីហនុ លោក លឹម ប៊ុនហេង ប្រាប់ វីអូឌី នៅថ្ងៃនេះថា កងរាជអាវុធហត្ថបានបញ្ជូនសំណុំរឿង រួមទាំងមន្ត្រីអាវុធហត្ថឈ្មោះ សុខ ភារិទ្ធិ និងយោធិនឈ្មោះ ចាន់ ម៉ៅ មកដល់តុលាការរួចហើយ។ លោកបន្តថា តុលាការកំពុងសាកសួរមន្ត្រីទាំងពីរទាំងនេះ ពាក់ព័ន្ធការប្រើប្រាស់អំពើហិង្សាលើពលរដ្ឋផងដែរ។
លោកថា៖ «គាត់បញ្ជូនទាំងសំណុំរឿង ទាំងមនុស្សពីរនាក់មកតុលាការ។ ឥឡូវមកដល់ម៉ោងនេះ អយ្យការទទួលទាំងសំណុំរឿង ទទួលទាំងយោធិនម្នាក់ ហើយនិងអាវុធហត្ថម្នាក់។ ឥឡូវខ្ញុំកំពុងពិនិត្យ និងចាត់ការ អត់ទាន់បានលទ្ធផលយ៉ាងម៉េចទេ»។
កាលពីថ្ងៃទី២៤ ខែមករា សមត្ថកិច្ចចម្រុះខេត្តព្រះសីហនុប្រមាណ ៣០០នាក់ ដឹកនាំដោយព្រះរាជអាជ្ញា ហួត វិចិត្រ និងអភិបាលរងខេត្ត លោក ផៃ ប៊ុនវណ្ណៈ បានចុះអនុវត្តសាលដីការបស់តុលាការកំពូល ដើម្បីវាស់វែងដីឲ្យអ្នកស្រី ហុង សួន ភរិយារបស់ឧកញ៉ា ស៊ីវ គង់ទ្រីវ ស្ថិតភូមិគគីរ ប៉ុន្តែ ត្រូវបានអ្នកភូមិរាប់រយនាក់តវ៉ាប្រឆាំងនឹងការចុះអនុវត្តនោះ ដោយនាំគ្នាដុតកង់ឡានបិទផ្លូវរហូតផ្ទុះអំពើហិង្សា។
ក្នុងហេតុការណ៍ប៉ះទង្គិចគ្នានោះ បណ្តាញសង្គមបង្ហាញបុរសម្នាក់ស្លៀកពាក់ឯកសណ្ឋានជាកងរាជអាវុធហត្ថ បានធាក់ច្រំទៅលើបុរសម្នាក់ទៀតក្នុងសម្លៀកបំពាក់ស៊ីវិលទាំងដៃជាប់ខ្នោះ និងកំពុងដេកដួលលើដី ហើយបុរសម្នាក់ទៀតស្លៀកពាក់ឯកសណ្ឋានជាយោធា បានយកស្វ័យកាំភ្លើង AK វាយបន្ថែមទៀតទៅលើពលរដ្ឋរូបនោះ។
