ក្រសួងយត្តិធម៌អះអាងថា ចៅក្រមស៊ើបសួរអាចបន្ដនីតិវិធីស៊ើបអង្កេតរបស់ខ្លួនដោយគ្មានកាលកំណត់នោះទេ នៅក្នុងសំណុំរឿង «ក្បត់ជាតិ» ប្រឆាំងលោក កឹម សុខា បើទោះបីជាការស៊ើបអង្កេតនេះប្រើពេលអស់ជាង ១ឆ្នាំហើយក្ដី។
ក្នុងសេចក្ដីថ្លែងការណ៍មួយកាលពីថ្ងៃម្សិលមិញ អតីតគណបក្សសង្គ្រោះជាតិបានទាមទារជាថ្មីម្ដងទៀតឲ្យដោះលែងលោក កឹម សុខា ជាបន្ទាន់ និងគ្មានលក្ខខណ្ឌ ដោយថា មេបក្សប្រឆាំងរូបនេះត្រូវបានគេចាប់ឃុំឃាំង «ទាំងអយុត្តិធម៌» អស់រយៈពេល ១៨ខែមកហើយ គិតត្រឹមថ្ងៃទី៣ ខែមីនាម្សិលមិញនេះ។
ក្នុងសេចក្ដីថ្លែងការណ៍ អតីតគណបក្សសង្គ្រោះជាតិក៏ស្នើសុំឲ្យសហគមន៍អន្ដរជាតិចាត់វិធានការបន្ថែមទៀត ដើម្បីជម្រុញឲ្យរដ្ឋាភិបាលរបស់លោកនាយករដ្ឋមន្ដ្រី ហ៊ុន សែន ងាកមកស្ដារលទ្ធិប្រជាធិបតេយ្យ និងគោរពសិទ្ធិមនុស្សឡើងវិញ។
ប្រធានលេខាធិការដ្ឋានរដ្ឋបាល និងជាអ្នកនាំពាក្យសាលាដំបូងរាជធានីភ្នំពេញ លោក អ៊ី រិន ប្រាប់ VOD នៅថ្ងៃនេះថា ចៅក្រមស៊ើបសួរកំពុងបន្ដនីតិវិធីរបស់ខ្លួននៅក្នុងសំណុំរឿងនេះ។
លោកបន្ដថា៖ «កំពុងចំណាត់ការនីតិវិធីរបស់គាត់។ អត់ដឹងទេ ចាំមើលកម្រិតប៉ុណ្ណា ចាំមើលសិន ចាំមើលខ្ញុំទាក់ទងទៅគាត់តិចសិន»។
អ្នកនាំពាក្យក្រសួងយុត្ដិធម៌លោក ជិន ម៉ាលីន មានប្រសាសន៍ថា ក្នុងករណីដែលលោក កឹម សុខា ត្រូវបានគេដាក់ឲ្យស្ថិតក្រោមការត្រួតពិនិត្យតាមផ្លូវតុលាការ គឺចៅក្រមស៊ើបសួរ អាចបន្ដនីតិវិធីស៊ើបអង្កេតរបស់ខ្លួនបានដោយមិនមានរយៈពេលកំណត់ ដោយផ្អែកតាមការចាំបាច់ និងភាពស្មុគស្មាញនៃសំណុំរឿងមួយនេះ។
ប៉ុន្ដែ លោកមិនអាចបញ្ជាក់បានទេថា តើចៅក្រមស៊ើបសួរត្រូវការពេលវេលាប៉ុន្មានទៀត ដើម្បីបញ្ចប់នីតិវិធីរបស់ខ្លួននោះ។
លោកបន្ដថា៖ «ប៉ុន្ដែ លោក កឹម សុខា នីតិវិធីច្បាប់អត់ស្ថិតនៅក្រោមការឃុំខ្លួនបណ្ដោះអាសន្នទេ គឺនៅក្រៅឃុំស្ថិតក្រោមការត្រួតពិនិត្យតាមផ្លូវតុលាការ។ នីតិវិធីនេះ បានន័យថា មិនមានរយៈពេលកំណត់ទេ បានន័យថា ចៅក្រមស៊ើបសួរកំពុងដំណើរការនីតិវិធីស៊ើបសួរ។ កាលណាគេសាកសួរចប់ពេលណា គេរុញទៅសវនការ។ អញ្ចឹងរយៈពេលនេះ មិនមានពេលកំណត់ទេ។ ការស៊ើប យើងមិនអាចកំណត់បានទេ វាអាស្រ័យទៅលើភាពស្មុគស្មាញនៃសំណុំរឿង»។
មេធាវីម្នាក់ដែលការពារក្ដីឲ្យលោក កឹម សុខា គឺអ្នកស្រី ម៉េង សុភារី មានប្រសាសន៍ថា ឆ្លងតាមការស៊ើបអង្កេតជាង ១៨ខែមកនេះ ចៅក្រមស៊ើបសួរនៅតែមិនទាន់អាចបង្ហាញភស្ដុតាងណាមួយបញ្ជាក់ថា លោក កឹម សុខា បានឃុបឃិតជាមួយបរទេសនោះទេ។
មេធាវីរូបនេះបន្ដថា ទោះបីជាច្បាប់កម្ពុជាមិនបានកំណត់អំពីថិរវេលានៃដំណើរការស៊ើបអង្កេតក្នុងករណីនេះក៏ដោយ ប៉ុន្ដែ អ្នកស្រីថា ភាគីពាក់ព័ន្ធអាចដាក់ស្នើសុំដើម្បីបិទបញ្ចប់នីតិវិធីស៊ើបសួរនេះ។
អ្នកស្រីបន្ដថា៖ «ករណីជនត្រូវចោទមិនស្ថិតនៅក្រោមការឃុំខ្លួនទេ ការស៊ើបអង្កេត គឺនៅក្នុងច្បាប់របស់យើងអត់មានកំណត់ថា តើត្រូវបិទការស៊ើបសួរនៅពេលណានោះទេ ក៏ប៉ុន្ដែ មានមាត្រាមួយក៏បានចែងផងដែរថា បើសិនជាការស៊ើបអង្កេតហ្នឹងរយៈពេល ១ឆ្នាំកន្លងផុតទៅហើយ ភាគីពាក់ព័ន្ធមានសិទ្ធិស្នើសុំឲ្យចៅក្រមស៊ើបសួរបិទការស៊ើបអង្កេតបាន […] ការបិទការស៊ើបសួរនេះ វាមានចេញជាលទ្ធផលដូចជា ចៅក្រមស៊ើបសួរអាចេញដីកាដំណោះស្រាយថា តើបញ្ជូនទៅជម្រះ ឬលើកលែងបទចោទ»។
នៅក្នុងពិធីមួយនៅព្រឹកថ្ងៃនេះ លោកនាយករដ្ឋមន្ត្រី ហ៊ុន សែន បានថ្លែងជាសាធារណៈថា លោកនឹងមិនដោះលែង ឬលើកលែងទោសដល់នរណានោះឡើយ ហើយលោកក៏បញ្ជាក់ផងដែរថា នឹងមិនមានការសម្របសម្រួលនយោបាយផងដែរ។
លោក ហ៊ុន សែន ថ្លែងថា៖ «រាជរដ្ឋាភិបាលបានខិតខំបើកទ្វារសម្រាប់អស់លោកអ្នក ប៉ុន្ដែរឿងអស់លោកចូល ឬមិនចូលជារឿងរបស់អស់លោកអ្នក។ ហើយអស់លោកអ្នកកុំសង្ឃឹមថា នឹងមានការលើកលែងទោស ឬលើកលែងការចោទប្រកាន់ចំពោះអ្នកណានោះទេ […] ហើយកុំរងចាំថា នឹងមានការសម្របសម្រួលនយោបាយ នេះមិនមែនជារឿងនយោបាយទេ តែជារឿងផ្លូវច្បាប់។ តុលាការត្រូវកាត់ទោសជនដែលកំពុងស្ថិតនៅក្រោមការស៊ើបអង្កេតពីសំណាក់តុលាការជាបន្ដ»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា យល់ថា ដំណើរការក្ដីប្រឆាំងនឹងលោក កឹម សុខា បានប៉ះពាល់ដល់កិត្ដិយស និងសិទ្ធិសេរីភាពរបស់លោក ក្នុងនាមជាអ្នកនយោបាយមួយរូប។
លោកយល់ថា ការថ្លែងរបស់លោកនាយករដ្ឋមន្ដ្រី ហ៊ុន សែន ក៏អាចមានឥទ្ធិពលលើការសម្រេចចិត្តរបស់តុលាការផងដែរ ដោយលោកថា ស្ថាប័នមួយនេះនៅមិនទាន់អាចធានាឯករាជ្យរបស់ខ្លួនបាននៅឡើយ។
លោកបន្ដថា៖ «ប៉ុន្ដែ ជាទូទៅ យើងតែងកត់សម្គាល់ថា អំណាចនេះមិនមានភាពឯករាជ្យ ឬអព្យាក្រឹត្យក្នុងការបំពេញតួនាទីទេ ដោយសារតែស្ថាប័នេះហាក់ដូចជាគ្មានទំនុកចិត្ត ដោយសារតែជាប់ពាក់ព័ន្ធនឹងបម្រើនិន្នាការនយោបាយ ហើយអ្នកនយោបាយមានឥទ្ធិពលដឹកនាំប្រទេសទៅទៀត ហើយមានប្រសាសន៍បែបនេះ វាធ្វើឲ្យប៉ះពាល់ដល់ការសម្រេចចិត្តរបស់អ្នកជាចៅក្រម ឬតុលាការហ្នឹង គាត់ពិបាកក្នុងការសម្រេចចិត្ត»។
កាលពីថ្ងៃទី១១ ខែកុម្ភៈកន្លងមក សហភាពអឺរ៉ុបបានប្រកាសពីការចាប់ផ្ដើមនីតិវិធីដែលឈានទៅព្យួរជាបណ្ដោះអាសន្ននូវប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ពីកម្ពុជា បន្ទាប់ពីមើលឃើញការធ្លាក់ចុះនៃលទ្ធិប្រជាធិបតេយ្យ បញ្ហាសិទ្ធិមនុស្ស និងនិតិរដ្ឋនៅក្នុងរយៈពេល ១៨ខែចុងក្រោយមកនេះ។
មិនប៉ុន្មានថ្ងៃក្រោយចំណាត់ការរបស់អឺរ៉ុបនេះ សហរដ្ឋអាមេរិក តាមរយៈស្ថានទូតរបស់ខ្លួនប្រចាំនៅកម្ពុជា បានបង្ហោះរូបរបស់អតីតមេដឹកនាំគណបក្សប្រឆាំង លោក កឹម សុខា ដោយអះអាងថា លោកត្រូវបានគេចាប់ឃុំឃាំងជាង១ឆ្នាំ ដោយ «អយុត្តិធម៌» និងគ្មានភស្ដុតាងណាមួយសោះ។
ប៉ុន្ដែ ក្រសួងការបរទេសកម្ពុជាបានចេញសេចក្ដីថ្លែងការណ៍សម្ដែងនូវការខកចិត្ត ដោយចាត់ទុកសកម្មភាពនេះ ថា «មិនមានលក្ខណៈការទូត» និង «មិនគោរពអធិបតេយ្យរបស់កម្ពុជា»។
ចំណែក ក្រសួងយុត្ដិធម៌ក៏បានចេញមុខបកស្រាយករណីនេះផងដែរថា លោក កឹម សុខា ត្រូវព្រះរាជអាជ្ញាដោះលែងឲ្យនៅក្រៅឃុំ តាំងពី៦ខែមុនមកម៉្លេះ ពោលគឺនៅពេលលោកត្រូវបានគេផ្ទេរពីការជាប់ឃុំឃាំងក្នុងពន្ធនាគារត្រពាំងផ្លុង ខេត្តត្បូងឃ្មុំ មកជាការជាប់ឃុំនៅក្នុងផ្ទះវិញ កាលពីខែកញ្ញា ឆ្នាំ២០១៨នោះ។
លោក កឹម សុខា ត្រូវបានសមត្ថកិច្ចចាប់ខ្លួនទាំងយប់កាលពីដើមខែកញ្ញា ឆ្នាំ២០១៧ ដោយត្រូវបានរដ្ឋាភិបាលចោទថា បានឃុបឃិតជាមួយសហរដ្ឋអាមេរិក ចង់ផ្តួលរំលំរដ្ឋាភិបាល។ មេដឹកនាំបក្សប្រឆាំងរូបនេះ ត្រូវបានសមត្ថកិច្ចបញ្ជូនទៅឃុំខ្លួនបណ្តោះអាសន្ននៅពន្ធនាគារត្រពាំងផ្លុងជាប់ព្រំដែនវៀតណាមអស់រយៈពេលជិត ១ឆ្នាំ ទើបបញ្ជូនមកឃុំខ្លួនក្នុងផ្ទះវិញ នៅរាជធានីភ្នំពេញ៕
