អគ្គស្នងការដ្ឋាននគរបាលសិង្ហបុរីនឹងបញ្ជូនមន្ត្រីជំនាញរបស់ខ្លួនមកបណ្ដុះបណ្ដាលដល់នគរបាលកម្ពុជា នូវជំនាញប្រយុទ្ធប្រឆាំងបទល្មើសបច្ចេកវិទ្យា និងការគ្រប់គ្រងល្បែងពាណិជ្ជកម្ម ។
យោងតាមអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន បានឲ្យដឹងថា នៅព្រឹកថ្ងៃចន្ទនេះ អគ្គស្នងការនគរបាលជាតិ លោក នេត សាវឿន បានទទួលជួបពិភាក្សាការងារជាមួយ អគ្គស្នងការនគរបាលសិង្ហបុរី លោក HOONG WEE TECK ។ លោកថា ភាគីសិង្ហបុរីបានសន្យាថា នឹងបើកវគ្គបណ្តុះបណ្តាលដល់នគរបាលកម្ពុជានូវជំនាញប្រយុទ្ធប្រឆាំងបទល្មើសបច្ចេកវិទ្យា និងការគ្រប់គ្រងល្បែងពាណិជ្ជកម្ម ប៉ុន្តែ មិនទាន់បានកំណត់ពេលវេលាជាក់លាក់នោះទេ។
លោក ឆាយ គឹមខឿន បានមានប្រសាសន៍ថា៖ « នេះជាការឯកភាពគ្នា និងការប្តេជ្ញាចិត្តរវាងអគ្គស្នងការទាំងពីរ ដោយឡែកការបណ្ដុះបណ្ដាលរបៀបម៉េច អីរបៀបម៉េច អាហ្នឹងខាងបច្ចេកទេសពិសេស » ។
អគ្គស្នងការនគរបាលជាតិទាំងពីរ ក៏បានធ្វើការប្ដេជ្ញាថា នឹងប្រយុទ្ធប្រឆាំងអំពើភេរវកម្ម និងឧក្រិដ្ឋកម្មឆ្លងដែន ដើម្បីជាផលប្រយោជន៍រួមនៃប្រទេសទាំងពីរ និងផលប្រយោជន៍ប្រទេសក្នុងតំបន់ផងដែរ៕
