ព័ត៌មានទាន់ហេតុការណ៌, សេដ្ឋកិច្ច

ទីភ្នាក់ងារអភិវឌ្ឍន៍បារាំងផ្ដល់ជំនួយជាង១២លានដុល្លារដល់ក្រសួងធនធានទឹក

កញ្ញា ស៊ីម ដាណេ
| ០៧ មីនា ២០១៩
ម៉ោង ១០:៥៥

នាព្រឹកថ្ងៃទី៦ ខែមីនា នេះការចុះហត្ថលេខាបន្តរវាងឯកឧត្តមរដ្ឋលេខាធិការប្រចាំការ វង្សី វិស្សុត ជាមួយភាគី AFD លើកញ្ចប់ថវិកាចំនួន ១១,៥លានអឺរ៉ូ បន្ថែមដោយមានការចូលរួមពី លោកជំទាវឯកអគ្គរដ្ឋទូតបារាំង អេវ៉ា ង្វៀងបុិញ។ រូបភាព៖ ហ្វេសប៊ុក ក្រសួងធនធានទឹក និងឧតុនិយម/Ministry of Water Resources and Meteorology

ទីភ្នាក់ងារអភិវឌ្ឍន៍បារាំង AFD ផ្ដល់ជំនួយ១១.៥លានអឺរ៉ូ ឬប្រហែល១២លានដុល្លារ ដល់កម្ពុជាសុំម្រាប់ស្ដារឡើងវិញនូវប្រព័ន្ធធារាសាស្ត្រនៅតាមតំបន់ជនបទ។ នេះបើតាមក្រសួងធនធានទឹក និងឧតុនិយម។

ក្រសួងធនធានទឹក និងឧតុនិយម បានរៀបរាប់នៅលើទំព័របណ្ដាញសង្គមរបស់ខ្លួនបន្ថែមទៀតថា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក វង្ស៊ី វិសុទ្ធ បានចុះហត្ថលេខាទទួលយកជំនួយពីទីភ្នាក់ងារអភិវឌ្ឍន៍បារាំង AFD នូវឥណទានជាង១២លានដុល្លារ កាលពីថ្ងៃម្សិលមិញនេះ។

បើតាមក្រសួងធនធានទឹក និងឧតុនិយម ជំនួយរបស់បារាំងនេះ នឹងត្រូវយកទៅប្រើប្រាស់សម្រាប់ស្ដារឡើងវិញនូវហេដ្ឋារចនាសម្ព័ន្ធទឹក ដែលគ្រោងនឹងចាប់ផ្ដើមនៅក្នុងខែវិច្ឆិកាចុងឆ្នាំនេះ។

ក្រសួងបានរៀបរាប់ទៀតថា រដ្ឋាភិបាលកម្ពុជាក៏បានបដិភាគថវិកាចំនួន១២,៥លានអឺរ៉ូ ប្រមាណជាង១៤លានដុល្លារផងដែរទៅក្នុងគម្រោងនេះ។

កាលពីថ្ងៃទី១៦ ខែវិច្ឆិកា ឆ្នាំ២០១៨កន្លងទៅ ទីភ្នាក់ងារអភិវឌ្ឍន៍បារាំង AFD ក៏បានផ្ដល់ជំនួយ ៧៩លានអីរ៉ូ ឬប្រហែលជាង៨៩លានដុល្លារ ដល់កម្ពុជាលើគម្រោងនេះដែរ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។