លោកនាយករដ្ឋមន្ត្រី ហ៊ុន សែន ប្រាប់ក្រុមអ្នកធាក់ស៊ីក្លូថា មូលនិធិនេះអាចនឹងត្រូវលុបចោលវិញ បើលោកបាត់បង់តំណែងជានាយករដ្ឋមន្ត្រី នៅថ្ងៃណាមួយនោះ។
ការអះអាងបែបនេះរបស់លោក ហ៊ុន សែន ធ្វើឡើងក្នុងពិធីជួបសំណេះសំណាលជាមួយសមាជិកអ្នកធាក់ស៊ីក្លូ នៅរាជធានីភ្នំពេញនាថ្ងៃសុក្រនេះ។
លោក ហ៊ុន សែន ថ្លែងក្នុងពិធីនោះថា មួយជីវិតរបស់លោក ចាប់ពីថ្ងៃរំដោះ ៧ ខែមករា ឆ្នាំ១៩៧៩មក លោកថា បានធ្វើកិច្ចការមនុស្សធម៌រៀងរហូតមក រួមទាំងការបង្កើតឲ្យមានមូលនិធិអ្នកធ្លាក់ស៊ីក្លូនេះផងដែរ។
ប៉ុន្តែ មេដឹកនាំរូបនេះ អះអាងថា មូលនិធិអ្នកធាក់ស៊ីក្លូអាចនឹងបាត់បង់ទៅវិញ បើពលរដ្ឋឈប់គំាំទ្រលោកជានាយករដ្ឋមន្រ្តីនោះ។
លោកថា៖ « ប្រសិនបើ ហ៊ុន សែន មិនមែនជានាយករដ្ឋមន្ត្រីបន្តទៀត ក៏អាចនិយាយបានថា វាក៏រលាយទៅវិញដែរ ព្រោះបើអ្នកទាំងអស់គ្នាលែងត្រូវការខ្ញុំហើយ តើខ្ញុំមានការចាំបាច់ដើម្បីបន្តវាធ្វើអ្វីទៀត។ អញ្ចឹង ទុកឲ្យនាយករដ្ឋមន្ត្រីក្រោយ គេធ្វើកិច្ចការងារនេះទៅ។ ប៉ុន្តែខ្ញុំជឿថា បើនៅតែជានាយករដ្ឋមន្ត្រីចេញពីគណបក្សប្រជាជន ខ្ញុំគិតថាមូលនិធិនេះមិនត្រូវបាត់បង់ទេ»។
កាលពីខែមករា ឆ្នាំ២០១៨ លោកនាយករដ្ឋមន្ត្រី ហ៊ុន សែន បានបង្កើតមូលនិធីស៊ីក្លូ ដែលសមាជិកជាអ្នកធាក់ស៊ីក្លូទទួលបានប្រាក់ឧបត្ថម្ភពីមូលនិធិនេះ ម្នាក់ៗចំនួន៧ពាន់រៀលក្នុងមួយថ្ងៃ និងទទួលបានការព្យាបាលជំងឺដោយឥតគិតថ្លៃដែលធានាដោយបេឡាជាតិរបបសន្តិសុខសង្គម៕
