លោកនាយករដ្ឋមន្ត្រី ហ៊ុន សែន បានជំរុញទៅអាជ្ញាធរពាក់ព័ន្ធនៅទូទាំងប្រទេស ឲ្យជីកអណ្ដូងសម្រាប់យកទឹកមកផ្គត់ផ្គង់ប្រជាជន ខណៈដែលកម្ពុជាប្រឈមមុខនឹងកង្វះខាតទឹកនៅរដូវប្រាំងដ៏ហួតហែងនេះ។
ក្នុងពិធីចែកសញ្ញាបត្រដល់និស្សិតនៅរាជធានីភ្នំពេញនៅថ្ងៃនេះ លោកនាយករដ្ឋមន្ត្រី ហ៊ុន សែន បានចាត់ទុកកង្វះខាតទឹកប្រើប្រាស់របស់ប្រជាពលរដ្ឋកម្ពុជា គឺជាបញ្ហាប្រឈមធំបំផុតនាពេលសព្វថ្ងៃនេះ បើទោះបីលោកបានណែនាំពលរដ្ឋឲ្យប្រើប្រាស់ទឹកសន្សំសំចៃរួចហើយក៏ដោយ។
លោក ហ៊ុន សែន ថ្លែងថា៖ «គ្រប់ទីតាំងទាំងអស់ សូមឲ្យអាជ្ញាធរយកចិត្តទុកដាក់ខិតខំជីកអណ្ដូងប្រសើរជាងដឹកទឹកទៅពីចម្ងាយ។ បើទោះបីថា វាជ្រៅបន្តិច តែការប្រើប្រាស់ការជីកអណ្ដូង គឺជាមធ្យោបាយដែលល្អ»។
រដ្ឋាភិបាលកម្ពុជាបានចេញសេចក្ដីសារាចរណ៍មួយកាលពីចុងឆ្នាំកន្លងមកនេះ ដោយបានណែនាំទៅពលរដ្ឋកម្ពុជាឲ្យប្រើប្រាស់ទឹកសន្សំសំចៃ និងធ្វើស្រែប្រាំងតែមួយលើក ខណៈដែលរដ្ឋាភិបាលប្រកាសថា កម្ពុជានឹងទទួលរងអាកាសធាតុក្ដៅហួតហែងខ្លាំងនៅចន្លោះខែមេសា ដល់ខែឧសភាខាងមុខនេះ៕
