ប្រជាពលរដ្ឋពីរនាក់ស្លាប់ និងពីរនាក់ទៀតរងរបួសធ្ងន់ក្នុងករណីផ្ទុះមីនបីកន្លែងផ្សេងគ្នាដែលកើតឡើងបន្តបន្ទាប់ក្នុងសប្តាហ៍នេះ។
ប្រធានមជ្ឈមណ្ឌលកំចាត់មីនកម្ពុជាហៅកាត់ ស៊ីម៉ាក លោក ហេង រតនា បានសរសេរសារលើហ្វេសប៊ុករបស់លោកកាលពីម្សិលមិញថា ប្រជាពលរដ្ឋចំនួនពីរនាក់ ក្នុងចំណោមបីនាក់ ស៊ីឈ្នួលបោសសម្អាតគ្រប់មីន បានបាត់បង់ជីវិក្នុងករណីផ្ទុះមីនតោន ដែលកើតឡើងកាលពីរសៀលថ្ងៃទី១៤ ខែមីនា ឆ្នាំ២០១៩ នៅស្រុកត្រពាំងប្រាសាទ ខេត្តឧត្ដរមានជ័យ។
ប្រភពដដែលបានឲ្យដឹថា ហេតុការណ៍នេះកើតឡើងនៅលើដីចំការរបស់ ឈ្មោះ មាន សីហា ឃុំអូរស្វាយ ស្រុកត្រពាំងប្រាសាទ។ ជនរងគ្រោះថ្នាក់ស្លាប់ មានឈ្មោះ ហុក រ៉ាឆាន់ អាយុ១៨ រស់នៅក្នុងខេត្តបាត់ដំបង និងម្នាក់ទៀតឈ្មោះ ម៉ៅ កំសត់ អាយុ ២០ឆ្នាំ រស់នៅខេត្តឧត្ដរមានជ័យ ។
លោក ហេង រតនា បានអំពាវនាវដល់ប្រជាពលរដ្ឋទាំងអស់ត្រូវរាយការណ៍ជូនអាជ្ញាធរមានសមត្ថកិច្ចនៅពេលសង្ស័យថា ដីស្រែឬចំការរបស់ខ្លួនមានមីន ដោយចៀសវាងជួលអ្នកគ្មានជំនាញត្រឹមត្រូវទៅដោះមីន។ លោកថា ការស៊ីឈ្នួលដោះមីនដែលគ្មានការហ្វឹកហ្វឺនជាអំពើខុសច្បាប់។
លោកបានសរសេរថា៖ «សូមអំពាវនាវបងប្អូនប្រជាពលរដ្ឋ ចៀសវាងដាច់ខាតកុំប្រកបមុខរបររកស៊ីដោះមីនដោយគ្មានការហ្វឹកហ្វឺន និងសម្ភារបច្ចេកទេសត្រឹមត្រូវ ហើយមុខរបរបែបនេះជាទង្វើខុសច្បាប់ និងប្រថុយប្រថានជីវិតខ្លួនឯង»។
ដោយឡែកកាលពីថ្ងៃទី១២ ខែមីនា ឆ្នាំ២០១៩ មានគ្រោះថ្នាក់កើតឡើងដោយសារផ្ទុះមីននៅខេត្តឧត្តរមានជ័យ ដែលបណ្តាលឲ្យបុរសម្នាក់របួសធ្ងន់។ នៅថ្ងៃទី ១៣ខែមីនា មានករណីផ្ទុះមីនមួយទៀត នៅស្រុកសំឡូត ខេត្តបាត់ដំបង ដែលជនរងគ្រោះអាចធ្លាក់ខ្លូនពិការភាព។
តាមរបាយការណ៍របស់រាជរដ្ឋភិបាលបង្ហាញថា ពីឆ្នាំ១៩៩២ ដល់ ខែធ្នូ ឆ្នាំ២០១៨ ដោះមីនសម្រេចបានលើផ្ទៃដីជាង ១.៨០២ គីឡូម៉ែត្រការ៉េ និងកំទេចចោលគ្រប់មីនប្រឆាំងមនុស្សចំនួន ១.០៦២.៦៦១ គ្រាប់ មីនប្រឆាំងរថក្រោះចំនួន ២៤.៨៣២ គ្រាប់ និងសំណល់ជាតិផ្ទុះពីសង្គ្រាម ២.៧៦៧.០២០ គ្រាប់ ព្រមទាំងបានធ្វើឲ្យចំនួនជនរងគ្រោះធ្លាក់ចុះពី ៤.៣២០នាក់ ក្នុងឆ្នាំ១៩៩៦ មកត្រឹម ៥៨នាក់ ក្នុងឆ្នាំ២០១៨កន្លងទៅ ។
