លោកនាយករដ្ឋមន្ត្រី ហ៊ុន សែន បានថ្លែងកាលពីថ្ងៃម្សិលមិញថា កម្ពុជាកំពុងខ្វះខាតអគ្គិសនីដល់ទៅ ៤០០មេហ្កាវ៉ាត់នាពេលសព្វថ្ងៃនេះ ហើយលោកថា រដ្ឋាភិបាលកំពុងដោះស្រាយបញ្ហានេះ។
ថ្លែងក្នុងពិធីបុណ្យទន្លេនៅឯខេត្តកំពង់ឆ្នាំងកាលពីថ្ងៃម្សិលមិញនេះ លោក ហ៊ុន សែន បានលើកឡើងថា៖ «មកដល់ពេលនេះ ម៉ោងនេះ យើងចាប់ផ្ដើមខ្វះអគ្គសនីរហូតទៅដល់ ៤០០មេហ្កាវ៉ាត់តែម្ដង ដែលនេះយើងកំពុងរកដំណោះស្រាយ ដើម្បីដោះស្រាយបញ្ហានេះ»។
មេដឹកនាំបក្សកាន់អំណាចរូបនេះ បានអះអាងទៀតថា កង្វះខាតអគ្គិសនីនាពេលសព្វថ្ងៃនេះ បណ្ដាលមកពីកង្វះទឹកផ្គត់ផ្គង់នៅតាមទំនប់វារីអគ្គិសនីជាច្រើននៅទូទាំងប្រទេស។
លោក ហ៊ុន សែន ថ្លែងបន្តថា៖ «ព្រោះថា ប្រទេសរបស់យើងមួយភាគធំប្រើប្រាស់វារីអគ្គិសនី ប៉ុន្តែ វារីអគ្គិសនីប្រើដោយទឹក ឥឡូវទឹកនោះវារីង ជាពិសេសវារីអគ្គិសនីបញ្ចេញថាមពាលបានកម្រិតទាប»។
ក្រៅពីលើកឡើងនូវប្រភពកង្វះថាមពលអគ្គិសនីហើយនោះ លោកនាយករដ្ឋមន្ត្រី ហ៊ុន សែន បានថ្លែងឲ្យដឹងថា កម្ពុជាក៏កំពុងស្វែងរកការផ្គត់ផ្គង់ថាមពលអគ្គិសនីតាមរយៈនាវាផលិតថាមពលអគ្គិសនី ដែលកម្ពុជាកំពុងស្វែងរកពីប្រទេសតួកគី។
លោក ហ៊ុន សែន ថ្លែងថា៖ «យើងកំពុងតែរង់ចាំនូវការឆ្លើយតបពីសាធារណរដ្ឋតួកគី ដើម្បីនាំមកនូវនាវាដែលផ្ទុកទៅដោយម៉ាស៊ីនភ្លើងសម្រាប់បញ្ឆេះនៅក្នុងប្រទេសកម្ពុជាយើងក្នុងរយៈពេលប៉ុន្មានខែ »។
ចរន្តអគ្គិសនីនៅទូទាំងប្រទេស ត្រូវបានកាត់ផ្ដាច់ ឬក៏ផ្អាកជាច្រើនម៉ោង និងច្រើនលើកក្នុងរយៈពេលមួយសប្ដាហ៍ចុងក្រោយនេះ ដែលជំរុញឲ្យមានមតិរិះគន់ព្រោងព្រាតលើបណ្ដាញទំនាក់ទំនងសង្គម។
របាយការណ៍បច្ចុប្បន្នភាពវិស័យថាមពលកម្ពុជា ដែលចេញកាលពីខែមេសាឆ្នាំមុន បានឲ្យដឹងថា ពលរដ្ឋកម្ពុជាប្រហែលពាក់កណ្ដាលប្រទេស ឬប្រហែល ៦.៦២លាននាក់ រស់នៅដោយពុំមានអគ្គិសនីប្រើប្រាស់នៅឡើយ ខណៈដែលប្រទេសជិតខាងកម្ពុជាថៃ បានផ្គត់ផ្គង់ថាមពលអគ្គិសនីដល់ពលរដ្ឋរបស់គេគ្រប់គ្នា ហើយវៀតណាម និងឡាវ ស្ទើតែផ្គត់ផ្គង់ថាមពលអគ្គិសនីដល់ពលរដ្ឋទាំងអស់។
ថាមពលអគ្គិសនីកម្ពុជា ត្រូវបានផលិតឡើងពីទំនប់វារីអគ្គិសនី ៧ទីតាំង និងរោងចក្រថាមពលដើរដោយចំហេះធ្យូងថ្ម ៤ទីតាំង នៅទូទាំងប្រទេសកម្ពុជា៕
