មន្ត្រីតុលាការខេត្តព្រះសីហនុ បានឲ្យដឹងថា មនុស្ស ១១នាក់ ត្រូវតុលាការខេត្តនេះសម្រេចដាក់ឲ្យឃុំខ្លួនបណ្ដោះអាសន្ន ក្រោយពីពួកគេត្រូវបានចាប់ខ្លួនជាបន្តបន្ទាប់ពាក់ព័ន្ធអ្វីដែលអាជ្ញាធរខេត្តនេះហៅថា បានបំផុសបំផុលពលរដ្ឋឲ្យចាប់ដីដោយខុសច្បាប់។
ព្រះរាជអាជ្ញារងខេត្តព្រះសីហនុ លោក លឹម ប៊ុនហេង ប្រាប់ វីអូឌី នៅថ្ងៃនេះថា មនុស្ស ៧នាក់ ដែលត្រូវបានកងរាជអាវុធហត្ថខេត្តចាប់ខ្លួនកាលពីចុងសប្ដាហ៍កន្លងមកនេះ ត្រូវបានសមត្ថកិច្ចបញ្ជូនទៅឃុំខ្លួនអស់ហើយ ស្ថិតក្រោមការចោទប្រកាន់ចំនួន ៤បទល្មើស។
លោក លឹម ប៊ុនហេង ប្រាប់ថា៖ «អយ្យការបានចោទប្រកាន់ចំនួន ៤បទល្មើស ទី១ បទឆបោក ទី២ បទជ្រៀងជ្រែកដោយខុសច្បាប់ក្នុងការបំពេញមុខងាយសាធារណៈ ទី៣ បទប្រើប្រាស់ឯកសារដោយខុសច្បាប់នូវឯកសារបញ្ជាក់វិជ្ជាជីវៈ និងទី៤ បទផ្ដើមគំនិតឲ្យប្រើប្រាស់អំពើហិង្សាលើអ្នកកាន់កាប់អចលនាវត្ថុដោយសុច្ចរិត ព្រោះគាត់បង្កើតជាសមាគម ហើយមានការរៃអង្គាសប្រាក់ ប៉ុន្តែខ្ញុំមិនបញ្ជាក់ពីអង្គហេតុទេ តែខ្ញុំសូមជូនប៉ុណ្ណឹង»។
លោកបន្តថា បច្ចុប្បន្ននេះ ចៅក្រមស៊ើបសួរកំពុងធ្វើការស្រាវជ្រាវរកអ្នកជាប់ពាក់ព័ន្ធ ករណីនឹងរឿងដីធ្លីនេះបន្ថែមទៀត។
អ្នកនាំពាក្យសាលាដំបូងខេត្តព្រះសីហនុ លោក ហួត វិចិត្រ ឲ្យដឹងថា កាលពីម្សិលនេះ តុលាការបានសម្រេចឃុំខ្លួនមនុស្សចំនួន ៤នាក់ទៀត ដោយចោទប្រកាន់ពីបទប្រើហិង្សាលើអ្នកកាន់កាប់អចលនវត្ថុដោយសុច្ចរិត ស្ថិតនៅភូមិចំណោទរាម ឃុំបិតត្រាំង ក្រោយពីពួកគេបានទៅយកទន្ទ្រានដីឯកជន។
ពលរដ្ឋទាំង ១១នាក់នេះ ត្រូវបាមសមត្ថកិច្ចចាប់ខ្លួនជាបន្តបន្ទាប់ ក្រោយពីព្រមានកាលពីសប្ដាហ៍មុនថា នឹងចាត់វិធានការផ្លូវច្បាប់ចំពោះមេខ្យល់ និងក្រុមពលរដ្ឋ ដែលអាជ្ញាធរខេត្តនេះ ចោទថា កំពុងដើរចាប់យកដីធ្លី «អនាធិបតេយ្យ» នៅក្នុងខេត្តជាប់សមុទ្រមួយនេះ៕
