ក្រុមកម្មករកម្មការិនីជាងច្រើនរយនាក់មកពីរោងចក្រ W&D បានប្រមូលផ្ដុំគ្នាតវ៉ានៅមុខគេហដ្ឋានលោកនាយករដ្ឋមន្ត្រី ហ៊ុន សែន នៅព្រឹកថ្ងៃនេះ ក្រោមការឃ្លាំមើលពីកម្លាំងសមត្ថកិច្ចចម្រុះ។
ក្រុមកម្មករទាំងនោះដែលភាគច្រើនជាស្ត្រី បានប្រមូលផ្ដុំគ្នាដើម្បីស្វែងរកអន្តរាគមន៍ពីលោកនាយករដ្ឋមន្ត្រី ហ៊ុន សែន សម្រាប់បញ្ចប់វិវាទការងាររបស់ពួកគេដែលបានអូសបន្លាយពេលជាច្រើនខែមកហើយនោះ។
វិវាទរវាងក្រុមកម្មករ និងថៅកែរោងចក្រ W&D ដែលមានទីតាំងស្ថិតក្នុងខ័ណ្ឌមានជ័យ បានផ្ទុះឡើងតាំងពីចុងឆ្នាំ២០១៨មកម៉្លេះ បន្ទាប់ពីក្រុមកម្មករដល់ទៅជិត ២ពាន់នាក់ បានទាមទារទៅថៅកែរោងចក្រនេះឲ្យបើកប្រាក់អតីតភាពដល់ពួកគេនៅមុនឆ្នាំ២០១៩នេះ។
វិវាទនេះកាន់តែស្មុគស្មាញថែមទៀត បន្ទាប់ពីកម្មករជាង ១ពាន់នាក់ ត្រូវបានថៅកែរោងចក្រនេះ សម្រេចបញ្ឈប់ពីការងារ និងចោទថា មិនគោរពតាមសេចក្ដីសម្រេចរក្សាការពាររបស់តុលាការរាជធានីភ្នំពេញ។
