ក្រសួង​មហាផ្ទៃ​ ប្រាប់​ឲ្យ​សង្គម​ស៊ីវិល​បង្កើត​ក្រុម​ការងារ​ដោះស្រាយ​បញ្ហា​ជាមួយ​រដ្ឋាភិបាល​

មន្ដ្រីជាន់ខ្ពស់ក្រសួងមហាផ្ទៃ ជំរុញឲ្យអង្គការសង្គមស៊ីវិលក្នុងស្រុកបង្កើតក្រុមការងាររបស់ខ្លួន ដើម្បីដោះស្រាយបញ្ហានានាដែលពួកគេប្រឈមជាមួយនឹងក្រុមការងាររបស់រដ្ឋាភិបាល។

ក្រុមអង្គការស៊ីវិល វិស័យឯកជន និងមន្ដ្រីរដ្ឋាភិបាលបានរៀបចំប្រារព្ធ «ទិវាសង្គមស៊ីវិល» នាថ្ងៃអង្គារទី១៩ មីនានេះ នៅរាជធានីភ្នំពេញ ដោយផ្ដោតសំខាន់លើប្រធានបទមួយចំនួនដូចជា បរិយាកាសអំណោយផលសម្រាប់អង្គការសង្គមស៊ីវិល និរន្ដភាពហិរញ្ញវត្ថុ និងការអភិវឌ្ឍធនធានមនុស្ស។

នៅក្នុងពិធីនៅថ្ងៃនេះ រដ្ឋលេខាធិការក្រសួងមហាផ្ទៃ លោក ប៊ុន ហុន ថ្លែងថា រដ្ឋាភិបាលបានខិតខំចាត់វិធានការជាបន្តបន្ទាប់ ដើម្បីពង្រឹងកិច្ចសហប្រតិបត្តិការដោះស្រាយភាពជាដៃគូជាមួយអង្គការសង្គមស៊ីវិលនៅក្នុងស្រុក ដោយថា រដ្ឋាភិបាលបានបង្កើតក្រុមការងារមួយទទួលបន្ទុកដោះស្រាយបញ្ហាដែលក្រុមសង្គមស៊ីវិលជួបប្រឈម និងបញ្ហាខ្វែងគំនិតគ្នាមួយចំនួននៅថ្នាក់មូលដ្ឋាន។

លោក ប៊ុន ហុន ស្នើឲ្យក្រុមអង្គការសង្គមស៊ីវិលបង្កើតក្រុមការងារមួយ ដើម្បីធ្វើការជាមួយក្រុមការងារចាត់តាំងដោយរដ្ឋាភិបាល ដើម្បីបង្កើនប្រសិទ្ធិភាពក្នុងការដោះស្រាយបញ្ហដែលពួកគេកំពុងជួបប្រឈម។ ប៉ុន្ដែ លោកក៏អំពាវនាវឲ្យអង្គការសង្គមស៊ីវិលចូលរួមគោរពច្បាប់របស់កម្ពុជា ដូចជាធ្វើរបាយការណ៍ស្ដីពីហិរញ្ញវត្ថុ របាយការណ៍ស្ដីពីផែនការសកម្មភាព និងធ្វើសកម្មភាពទាំងឡាយដោយមិនលម្អៀងទៅរកគណបក្សនយោបាយណាមួយ។     

លោកបន្ដថា៖ «ខ្ញុំក៏សំណូមពរដែរ កាលដែលវេទិកាលើកទី២នេះ គឺមានសំណូមពរថា សុំឲ្យចូលជាសមាជិកក្រុមការងាររដ្ឋាភិបាល។ អានេះដោយសារ គេដាក់ថា ក្រុមការងាររដ្ឋាភិបាលដោះស្រាយសំណើ សំណូមពរបញ្ហាប្រឈមរបស់អង្គការសង្គមស៊ីវិល អញ្ចឹងមិនមែនអង្គការសង្គមស៊ីវិលមកចូលរួមជាសមាជិកទេ។ ខ្ញុំសំណូមពរឲ្យអង្គការសង្គមស៊ីវិលបង្កើតក្រុមការងារខ្លួនមួយ។ កុំឲ្យសមាជិក ៤០ ឬ៥០នាក់ អូតែច្រើនពេក ងាប់ហើយ។  សូមសហការគ្នាធ្វើម៉េចត្រឹម១០នាក់ចុះក្រោម»។

ក្នុងពិធីនេះផងដែរ ប្រធានសមាគមសេដ្ឋកិច្ចក្រៅប្រព័ន្ធ លោក វន ពៅ គូសបញ្ជាក់ថា ក្នុងរយៈពេលចុងក្រោយនេះ សង្គមស៊ីវិលនៅក្នុងស្រុកបានជួបប្រឈមបញ្ហាជាច្រើន ដូចជា ការជ្រៀតជ្រែកពីសំណាក់រដ្ឋាភិបាល ការរឹតត្បិតតាមអំណាចច្បាប់ ការបិទសិទ្ធិសេរីភាពបញ្ចេញមតិ និងការប្រមូលផ្ដុំ អាជ្ញាធរនៅថ្នាក់មូលដ្ឋានអនុវត្តផ្ទុយពីសេចក្ដីណែនាំរបស់ក្រសួងមហាផ្ទៃ និងការគំរាមកំហែងផ្សេងៗទៀត។

មន្ដ្រីកម្មវិធីផ្នែកអភិបាលកិច្ច និងសិទ្ធិមនុស្សរបស់សហភាពអឺរ៉ុប លោកស្រី Agata Nieboj សាទរចំពោះចំណាត់ការរបស់រដ្ឋាភិបាលកាលពីពេលថ្មីៗនេះ ប៉ុន្ដែ លោកស្រីក៏បង្ហាញក្ដីបារម្ភផងដែរអំពីឆន្ទៈពិតប្រាកដ ថាតើរដ្ឋាភិបាលនឹងបើកចំហរសិទ្ធិសេរីភាសង្គមស៊ីវិលកម្រិតណា ឬដល់ពេលណានោះ។

យ៉ាងណាក៏ដោយ លោកស្រី Agata Nieboj អះអាងថា សហភាពអឺរ៉ុបនឹងទទួលយកសំណើ និងក្ដីកង្វល់ទាំងអស់ពីអង្គការសង្គមស៊ីវិល ដើម្បីជជែកជាមួយរដ្ឋាភិបាល។

លោកស្រីបន្ដថា៖ «ខ្ញុំគិតថា វាមានសារៈសំខាន់ក្នុងការកត់សម្គាល់ផងដែរថា មានការបើកចំហរមួយចំនួនពីសំណាក់រដ្ឋាភិបាល។ ខ្ញុំគិតថានេះគឺជាជំ​ហានវិជ្ជមាន ប្រហែលជាជួយដល់ការបើកឲ្យបរិយាកាសអំណោយផល ប៉ុន្ដែ យើងត្រូវរងចាំមើលផងដែរថា វានឹងអនុវត្តតាមរបៀបម៉េច ឬក៏វានៅតែបន្ដទៅមុខក្នុងរយៈពេលវែងឬយ៉ាងណា»។

រដ្ឋាភិបាលបានរៀបចំវេទិកាចំនួន២រួចមកហើយ កាលពីខែធ្នូ ឆ្នាំ២០១៨ និងខែមករា ឆ្នាំ២០១៩ ដោយថា ដើម្បីពង្រឹងកិច្ចសហប្រតិបត្តិការ និងដោះស្រាយបញ្ហាភាពជាដៃគូជាមួយអង្គការសង្គមស៊ីវិល ដែលសង្គមស៊ីវិលមួយចំនួនបានរងការចោទថា បានចូលរួមជាមួយអតីតបក្សប្រឆាំង ដើម្បីផ្ដួលរំលំរដ្ឋាភិបាលស្របច្បាប់៕