រដ្ឋមន្ត្រីក្រសួងសាធារណៈការ និងដឹកជញ្ជូន បានស្នើឱ្យវិស័យឯកជនពិនិត្យមើលអំពីសក្កានុពលខេត្តកំពង់ឆ្នាំង ដែលជាតំបន់ជាប់បឹងទន្លេសាប ដោយកែច្នៃតំបន់នេះ ទៅជាតំបន់យុទ្ធសាស្ត្រលើវិស័យដឹកជញ្ជូនរបស់មហាអនុតំបន់ទន្លេមេគង្គ។
ការថ្លែងរបស់រដ្ឋមន្ត្រីក្រសួងសាធារណៈការ និងដឹកជញ្ជូន លោក ស៊ុន ចាន់ថុល នេះ ធ្វើឡើងនៅក្នុងសិន្និសីទសារព័ត៌មាន បន្ទាប់ពីបញ្ចប់ពិធីចុះអនុស្សរណៈយោគយល់គ្នា និងកិច្ចព្រមព្រៀង សហហិរញ្ញប្បទានរវាងអង្គការ UNDP និងក្រុមហ៊ុនរបស់ចិននៅព្រឹកនេះ។
លោក ស៊ុន ចាន់ថុល ថ្លែងថា នៅខេត្តកំពង់ឆ្នាំង មានសក្តានុពលផ្នែកគមនាគមន៍មានស្រាប់ជាច្រើន ដោយគ្រាន់តែត្រូវសិក្សាបន្ថែម ព្រមទាំងមានគម្រោងធ្វើផ្លូវ និងស្ពាន តភ្ជាប់ពីខេត្តនេះទៅ ខេត្តកំពង់ធំ បង្កភាពងាយស្រួលក្នុងការដឹកជញ្ជូនកាន់តែប្រសើរថែមទៀត។
ចំណុចវិជ្ជមានទាំងនោះ ដែលនាំឲ្យទេសរដ្ឋមន្ត្រីរូបនេះ ស្នើឱ្យវិស័យឯកជនគិតពិចារណា ដោយប្រែក្លាយជាតំបន់ដែលមានសក្តានុពលរបស់មហាអនុតំបន់ទន្លេមេគង្គតែម្តង។
លោកមានប្រសាសន៍ថា៖ «ដែលមាននៅខេត្តកំពង់ឆ្នាំង មានព្រលានយន្តហោះ ហើយមានផ្លូវដែលតភ្ជាប់ចំកណ្តាលប្រទេសយើង[…] មានផ្លូវទឹក ហើយផ្លូវពីភ្នំពេញទៅព្រែកក្តាម ទៅកំពង់ឆ្នាំង ពោធិ៍សាត់ បាត់ដំបង ស៊ីសុផុន ប៉ោយប៉ែត ពង្រីកពីពីរគន្លង ទៅ ៤ គន្លង។ ផ្លូវដែកយើងមានហើយ គ្រាន់តែកាត់បន្ត ទៅព្រលានយន្តហោះ ព្រោះតំបន់នោះជាតំបន់ល្អមួយ សម្រាប់ Logistics ។ អីចឹងក៏ខ្ញុំស្នើសុំឲ្យផ្នែកឯកជន លោកទៅពិចារណាពិនិត្យមើល មិនមែនរដ្ឋាភិបាលយើងសាងសង់ថ្មីទេ ឱ្យវិស័យឯកជនលោកពិនិត្យមើល តើអាចរៀបចំតំបន់នោះ ទៅជាតំបន់ Logistics របស់មហាអនុតំបន់ទន្លេមេគង្គតែម្តង » ។
កាលពីសប្តាហ៍មុន លោកនាយករដ្ឋមន្ត្រី ហ៊ុន សែន បានប្រកាសជាផ្លូវការ ឲ្យសាងសង់ផ្លូវ និងស្ពានតភ្ជាប់ពីខេត្តកំពង់ឆ្នាំង ទៅកាន់ខេត្តកំពង់ធំ ហើយលោកថា គម្រោងសាងសង់នេះនឹងមិនប៉ះពាល់ដល់ចរន្តត្រីនោះឡើយ។
លោក ហ៊ុន សែន បានអះអាងទៀតថា គម្រោងសាងសង់ផ្លូវ និងស្ពានប្រវែងជាង ៥៧គីឡូម៉ែត្រនេះ នឹងជួយផលចំណេញសម្រាប់ការធ្វើដំណើរ និងដឹកជញ្ជូនទំនិញរបស់ប្រជាជនពីខេត្តកំពង់ឆ្នាំង ទៅកាន់ខេត្តកំពង់ធំ ព្រមទាំងតំបន់ផ្សេងទៀត។
លោក ស៊ុន ចាន់ថុល អះអាងថា ការសិក្សាគម្រោងសាងសង់ផ្លូវនឹងស្ពាននេះ បានចប់សព្វគ្រប់ហើយ នៅឡើយតែការពិភាក្សាតម្លៃ ដោយលោកថា ប្រាក់សាងសង់គឺជាប្រាក់កម្ចីពីមហាមិត្តចិន ដែលលោកធ្លាប់ឱ្យដឹងអាចចំណាយថវិកាប្រមាណ២រយលានដុល្លារសហរដ្ឋអាមេរិក៕
