ជនជាប់ចោទឈ្មោះ អឿត អាង ហៅជួបសម្លាប់ អះអាងថា ខ្លួនគ្មានលទ្ធភាព ដើម្បីស្វែងរកមេធាវីការពារក្ដី ពាក់ព័ន្ធនឹងសំណុំរឿងបាញ់សម្លាប់លោក កែម ឡី កាលពីឆ្នាំ២០១៦។
កាលពីចុងខែមីនា ឆ្នាំ២០១៧ សាលាដំបូងរាជធានីភ្នំពេញបានសម្រេចចោទប្រកាន់លោក អឿត អាង ហៅ ជួប សម្លាប់ ឲ្យជាប់ពន្ធនាគារអស់មួយជិវិតពីបទមនុស្សឃាតទៅលើអ្នកវិភាគបញ្ហាសង្គម លោក កែម ឡី កាលពីខែកក្កដា ឆ្នាំ២០១៦។ ដោយមិនសុខចិត្តការសម្រេចនេះ ឈ្មោះ អឿត អាង ហៅ ជួប សម្លាប់ បានប្ដឹងជំទាស់មកតុលាការកំពូល។
នៅថ្ងៃនេះ តុលាការកំពូល បានបើកសវនាការលើបណ្ដឹងសារទុក្ខឈ្មោះ អឿត អាង ហៅ ជួប សម្លាប់ ប៉ុន្តែ សវនាការនេះមិនមានមេធាវីការពារក្ដីឲ្យជនជាប់ចោទរូបនេះទេ។
ប្រធានក្រុមបប្រឹក្សាជំនុំជម្រះនៃតុលាការកំពូល លោក គង់ ស៊ីម បានសួរទៅ ជួប សម្លាប់ ថាតើលោកចង់រកមេធាវីដោយខ្លួនឯង ឬចង់ឲ្យតុលាការរកឲ្យ?
ស្លៀកសម្លៀកបំពាក់ពណ៌ស្លាទុំ ឈរក្នុងរង្វង់ក្រចកសេះ ហាក់ដូចជាមនុស្សឈឺមិនចង់និយាយ ខណៈតុលាការបានសួរមកកាន់ឈ្មោះ ជួប សម្លាប់ ម្ដងហើយម្ដងទៀតនោះ។
ចៅក្រម និងជនជាប់ចោទ៖ «តើលោកចង់រកមេធាវីដោយខ្លួនឯង ឬចង់ឲ្យតុលាការរកឲ្យ? ឈ្មោះ អឿត អាង ប្រាប់ទៅតុលាការថា គ្មានលទ្ធភាពរកមេធាវីទេ។»
បន្ទាប់មានការលើកឡើងបែបនេះ ប្រធានក្រុមបប្រឹក្សាជំនុំជម្រះនៃតុលាការកំពូលបានសម្រេចលើកពេលសវនាការទៅថ្ងៃក្រោយ មិនបានកំណត់ពេលវេលា ដោយរងចាំតុលាការជួយរកមេធាវីជួយការពារក្ដីឲ្យបានសិន។ លោក គង់ ស៊ីម ថ្លៃងថា មូលហេតុដែលតុលាការចាំបាច់មានមេធាវីការពារនោះ ដោយសារ សំណុំរឿងនេះជាបទល្មើសឧក្រិដ្ឋ។
លោក កែម ឡី ត្រូវបានខ្មាន់កាំភ្លើងបាញ់សម្លាប់នៅកណ្តាលរាជធានីភ្នំពេញ កាលពីថ្ងៃទី១០ ខែកក្កដា ឆ្នាំ២០១៦ ហើយមកដល់ពេលនេះ មានតែមនុស្សម្នាក់ប៉ុណ្ណោះ ដែលត្រូវបានតុលាការផ្តន្ទាទោសដាក់ពន្ធនាគារ គឺ ឈ្មោះ អឿត អាង ហៅ ជួប សម្លាប់។
