អ្នកភូមិនៅឃុំក្រយា ស្រុកប្រាសាទបល្ល័ង្ក ខេត្តកំពង់ធំ ជំរុញទៅអាជ្ញាធរឲ្យពន្លឿនវិធានការជួយសង្គ្រោះសត្វគោក្របី ខណៈសត្វទាំងនោះបានឈឺ និងងាប់ជាបន្តបន្ទាប់ក្នុងរយៈពេលជិតមួយខែកន្លងមកនេះ។
អភិបាលខេត្តកំពង់ធំ លោក សុខ លូ ប្រាប់ វីអូឌី ថា លោកនឹងឲ្យមន្ត្រីកសិកម្មចុះទៅពិនិត្យមើលករណីសត្វគោក្របីរបស់អ្នកភូមិឈឺងាប់នោះ ក្រោយទទួលបានដំណឹងកាលពីថ្ងៃទី១៩ ខែមីនានេះ។
ប្រជាពលរដ្ឋម្នាក់រស់នៅភូមិបុស្សធំ អ្នកស្រី ស៊ុំ ណេន ប្រាប់ វីអូឌី ថា រហូតមកដល់ថ្ងៃនេះ សត្វគោក្របីរបស់អ្នកភូមិនៅតែបន្តឈឺស្លាប់ជាបន្តបន្ទាប់ទៀត ដោយពុំទាន់មានមន្រ្តីជំនាញណាចុះទៅពិនិត្យ និងជួយព្យាបាលឡើយ។
អ្នកស្រី បន្ថែមថា៖ «ពីម្សិល ងាប់អស់២ នៅផ្ទះជិតខ្ញុំ។ ថ្ងៃនេះស្លាប់មួយទៀត។ គ្រាន់តែផ្ទះ(ខ្ញុំ)ងាប់អស់៣ អាធំៗ។ គោស្លាប់អញ្ចឹង គ្មានប្រធានភូមិណាដើររៀបថា គោអ្នកភូមិស្លាប់អស់ប៉ុន្មានអីប៉ុន្មាន? ស្នើឲ្យពេទ្យសត្វមកចាក់ការពារអីគឺអត់ អត់មានផង។ គ្នាពិបាកណាស់ អ្នកស្រែសង្ឃឹមតែគោក្របីហ្នឹងឯង មិនដឹងទៅរកអី? បើគោក្របីស្លាប់អស់អញ្ចេះឯង មិនដឹងសង្ឃឹមអីទៀត ងាប់១ ខាតអស់១លាន២លាន»។
អ្នកភូមិបុស្សធំម្នាក់ទៀត លោក ទូន ទីម ឲ្យដឹងថា គ្រប់ភូមិនៅក្នុងឃុំក្រយា គឺមានសត្វគោក្របីកំពុងឈឺងាប់ជាបន្តបន្ទាប់។ លោកថា ករណីគោក្របីឈឺងាប់ក្នុងចំនួនច្រើននេះ នឹងធ្វើឲ្យអ្នកភូមិជួបការលំបាក និងប៉ះពាល់ដល់ជីវភាពគ្រួសារពួកគេ ដោយថា អ្នកភូមិនៅឃុំក្រយាភាគច្រើនជាកសិករប្រកបរបរចិញ្ចឹម និងរស់នៅពឹងផ្អែកលើសត្វគោក្របីទាំងនោះ។
លោកបន្ថែមថា៖ «ស្នើសុំទៅក្រសួងកសិកម្ម ឬមន្រ្តីកសិកម្មខេត្តជួយចុះចាក់ថ្នាំវ៉ាក់សាំងការពារកុំឲ្យឆ្លងបន្ត។ បើវាងាប់ហូរហែរអញ្ចឹង មិនដឹងជាយ៉ាងណាទេ។ អញ្ចឹង សូមឲ្យអ្នកទាំងអស់ហ្នឹងជួយផង។ ហើយអាជ្ញាធរភូមិឃុំផ្សព្វផ្សាយដល់ថ្នាក់លើបានដឹងផង និងជួយឲ្យប្រជាជនហ្នឹងបានដឹងពីវិធីនៃការចាក់ថ្នាំការពារផងក្រែងបានរស់ខ្លះ។ បើមិនអញ្ចឹងទេ កសិករមិនដឹងសង្ឃឹមអីទេ»។
អភិបាលខេត្តកំពង់ធំ លោក សុខ លូ មានប្រសាសន៍ថា មន្រ្តីជំនាញនៅមន្ទីរកសិកម្មខេត្តបានចុះទៅចាក់ថ្នាំបង្ការហើយ កាលពីម្សិលមិញនេះ។
អភិបាលខេត្តកំពង់ធំ បញ្ជាក់ថា៖ «មន្រ្តីគេចុះទៅម្សិលមិញហើយ។ គេបានចាក់គោប៉ុន្មានគោ គេមានយុទ្ធការរបស់គេ ហើយថ្ងៃទី២៦ មីនាខាងមុខនេះ គេចុះចាក់វ៉ាក់សាំងបន្ថែមទៀត។ មន្រ្តីហ្នឹងបានទៅចុះទៅប្រជាជនហើយ ប៉ុន្តែ ជួបនៅភូមិណាខ្លះ ខ្ញុំមិនទាន់ដឹងទេ»។
ជំទប់ទី២ នៃឃុំក្រយា លោក ណាន់ វណ្ណី មានប្រសាសន៍ថា កាលពីម្សិលមិញមន្រ្តីជំនាញពេទ្យសត្វខេត្ត និងស្រុក បានចុះមកពិនិត្យរួមទាំងបានចាក់ថ្នាំដល់គោក្របីដែលកំពុងឈឺចំនួន៣ ទៅ៤ក្បាលដែរ ហើយថានឹងបន្តធ្វើយុទ្ធនាការចាក់ថ្នាំទូទាំងឃុំនៅសប្តាហ៍ក្រោយនេះ។
លោក បន្ថែមថា៖ «ដាក់ថ្ងៃគ្នាចុះចាក់១ឃុំហ្នឹងតែម្តង ព្រោះខ្ញុំបានធ្វើផែនការរួចហើយ។ ប៉ុន្តែដោយសារតែសៅរ៍អាទិត្យគេអត់ធ្វើការ អញ្ចឹងថ្ងៃច័ន្ទក្រោយនេះ បានចុះចាប់ផ្តើមធ្វើយុទ្ធនាការ។ ម្សិលមិញនេះ ក្រុមការងារពេទ្យសត្វខេត្ត និងស្រុកមកពីរទៅបីឡានចុះ មកបានចាក់តែអាណាឈឺទេ ដល់អាអត់ទាន់ឈឺ យើងអត់បានចាក់ ដោយសារធ្វើផែនការអត់ទាន់»។
លោក ណាន់ វណ្ណី ឲ្យដឹងថា រហូតមកដល់ថ្ងៃនេះ គោក្របីអ្នកភូមិជាង១០០ក្បាលដែលបានងាប់ ហើយថា សត្វគោក្របី ទាំងនោះងាប់ ដោយសារកើតជំងឺសាទឹក និងបុស្សខ្យល់ ហើយអ្នកភូមិនោះពុំមានទឹកគ្រប់គ្រាន់ផ្តល់ឲ្យវា ខណៈអាកាសធាតុក្ដៅខ្លាំង៕
