រដ្ឋាភិបាលយោធាថៃដែលគ្រប់គ្រងប្រទេសតាំងពីឆ្នាំ២០១៤មក រៀបចំច្បាប់យកប្រៀបលើការបោះឆ្នោតខាងមុខនេះ ដោយរាំងខ្ទប់លើសំឡេងគាំទ្រចលនាគណបក្សប្រឆាំងដែលកំពុងមានការគាំទ្រកើនឡើងខ្លាំង។
ថៃនឹងរៀបចំការបោះឆ្នោតនៅថ្ងៃទី២៤ ខែមីនា ដែលមានគណបក្សជិត១០០ចូលរួម ក្នុងនោះក្រុមគណបក្សប្រឆាំងខាងអ្នកគាំទ្រលោក ថាក់ ស៊ីន គឺគណបក្ស ភឿ ថៃ នៅតែមានសន្ទុះខ្លាំង។
រដ្ឋាភិបាលយោធាបញ្ជាក់ថា ច្បាប់ថ្មីដែលពួកគេបង្កើតឡើងនោះ គឺដើម្បីធានាការពារដល់សន្តិសុខសណ្តាប់ធ្នាប់កុំឲ្យកើតមានហិង្សានយោបាយបន្តទៀត។
ច្បាប់ថ្មីកំណត់ថា សមាជិកព្រឹទ្ធសភាជាន់ខ្ពស់ចំនួន២៥០រូប តែងតាំងដោយក្រុមយោធាទាំងអស់។ កាលពីច្បាប់មុនមានសមាជិកមួយចំនួនតែប៉ុណ្ណោះដែលតែងតាំងដោយពួកយោធា។
ច្បាប់ថ្មីនេះផ្តល់ឱកាសច្រើនដល់ក្រុមយោធា គឺបានន័យថា គណបក្សដែលគាំទ្រដោយពួកយោធា រកអាសនៈបានតែ១២៦ ក្នុងចំណោម៥០០អាសនៈនៅសភាជាន់ទាប ដែលដាក់ប្រកួតប្រជែងគឺស្មើនឹង៥០ភាគរយបូក១។ ប៉ុន្តែ សម្រាប់គណបក្សប្រឆាំងវិញ ត្រូវរកសំឡេងគាំទ្ររហូតដល់៣៧៦អាសនៈ ទើបស្មើនឹង៥០ភាគរយបូក១ អាចបង្កើតរដ្ឋាភិបាលបាន។
