កម្ពុជា-ជប៉ុន បានចុះហត្ថលេខាលើអនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការបញ្ជូនពលករជំនាញពីប្រទេសកម្ពុជា។
យោងតាមការផ្សព្វផ្សាយព័ត៌មានលើទំព័រហ្វេសប៊ុករបស់ខ្លួនកាលពីម្សិលមិញ ក្រសួងការងារកម្ពុជាបានឲ្យដឹងថា ការចុះហត្ថលេខានេះត្រូវបានធ្វើឡើងនៅទីក្រុងតូក្យូ ប្រទេសជប៉ុនរវាងក្រសួងការងារកម្ពុជា ជាមួយក្រសួងការបរទេសជប៉ុន ដែលនឹងទទួលយកពលករពីកម្ពុជាចាប់ពីខែមេសាខាងមុខ។
ប្រភពខាងលើបានដកស្រង់ប្រសាសន៍របស់រដ្ឋមន្ត្រីក្រសួងការងារ លោក អ៊ិត សំហេង មកចុះផ្សាយថា ការចុះអនុស្សរណៈនេះ នឹងធ្វើឲ្យពលករជំនាញកម្ពុជាមានលទ្ធភាពគ្រប់គ្រាន់ក្នុងការចាប់យកឱកាសដើម្បីជាផលប្រយោជន៍សម្រាប់ខ្លួនឯង និងប្រទេសជាតិ ហើយវាក៏រួមចំណែកជួយដោះស្រាយបញ្ហាកង្វះកម្លាំងពលកម្មរបស់ជប៉ុនផងដែរ។
ជប៉ុនគ្រោងទទួលយកពលករជំនាញជាង៣៤ម៉ឺននាក់ ពីប្រទេសចំនួន៨ រួមមាន កម្ពុជា ចិន វៀតណាម ហ្វីលីពីន ឥណ្ឌូណេស៊ី ថៃ មីយ៉ាន់ម៉ា និងនេប៉ាល់ ក្នុងរយៈពេល៥ឆ្នាំសម្រាប់ការងារចំនួន១៤ប្រភេទ រួមមានផ្នែកថែទាំមនុស្សចាស់ ការសំអាតអាគារ ការផលិតគ្រឿងបន្លាស់ ការផលិតគ្រឿងម៉ាស៊ីន ការផលិតគ្រឿងអគ្គិសនី និងគ្រឿងអេឡិចត្រូនិក ការងារសំណង់ ការផលិតនាវា ការជួសជុល និងដំឡើងរថយន្ត ការងារអាកាសចរណ៍ ការរៀបចំបន្ទប់ស្នាក់នៅ កសិកម្ម នេសាទ និងវារីវប្បកម្ម ការផលិតអាហារ និងភេសជ្ជៈ និងការងារនៅតាមភោជនីយដ្ឋាន។
បើតាមរដ្ឋមន្ត្រីក្រសួងការងារ បច្ចុប្បន្ននេះប្រជាពលរដ្ឋកម្ពុជាកំពុងរស់នៅ សិក្សា និងធ្វើការនៅប្រទេសជប៉ុនមានចំនួនប្រមាណ១ម៉ឺន១ពាន់នាក់ ក្នុងនោះកម្មសិក្សាការីមានប្រមាណជិត៧ពាន់នាក់៕
