ចិនឯកភាពជួយសិក្សារៀបចំផែនការអភិវឌ្ឍប្រព័ន្ធរថភ្លើងទំនើបប្រភេទ Monorail នៅកម្ពុជា ដើម្បីកាត់បន្ថយការកកស្ទះចរាចរណ៍នៅក្នុងរាជធានីភ្នំពេញ។ នេះបើតាមការចុះផ្សាយលើទំព័រហ្វេសប៊ុករបស់ក្រសួងសាធារណការ និងដឹកជញ្ជូន។
លោក ស៊ុន ចាន់ថុល កាលពីម្សិលមិញ បានដឹកនាំគណៈប្រតិភូក្រសួងសាធារណការ និងដឹកជញ្ជូន ជួបពិភាក្សាការងារជាមួយ លោក Zhou Keqin អនុប្រធានក្រុមប្រឹក្សាពិគ្រោះយោបល់ បក្សនយោបាយប្រជាជនចិន នៃគណៈកម្មាធិការ ក្រុង Chongqing។ កិច្ចប្រជុំនោះ បានផ្តោតសំខាន់ទៅលេីកិច្ចសហប្រតិបត្តិការរវាងកម្ពុជា និងក្រុង Chongqing ក្នុងការអភិវឌ្ឍហេដ្ឋារចនាសម្ព័ន្ធដឹកជញ្ជូន និងឡូជីស្ទីក ជាពិសេសលទ្ធភាពនៃការអភិវឌ្ឍប្រព័ន្ធរថភ្លេីងទំនេីបប្រភេទ Monorail នៅកម្ពុជា និងការជួយពង្រឹងសមត្ថភាពធនធានមនុស្សរបស់កម្ពុជា។
ប្រភពដដែលបានបញ្ជាក់ថា ភាគីចិន បានទទួលយកសំណើរបស់រដ្ឋមន្រ្តីក្រសួងសាធារណការ និងដឹកជញ្ជូនលើកិច្ចសហប្រតិបត្តិការក្នុងការសិក្សារៀបចំផែនការអភិវឌ្ឍប្រព័ន្ធរថភ្លេីងទំនេីបនៅកម្ពុជា។
ក្រសួងសាធារណការ សរសេរថា៖ «ឯកឧត្តម Zhou បានយល់ព្រមលើសំណើរបស់ ឯកឧត្តមទេសរដ្ឋមន្ត្រី លើកិច្ចសហប្រតិបត្តិការរវាងក្រុង Chongqing និងក្រសួងសាធារណការ និងដឹកជញ្ជូន ក្នុងការសិក្សារៀបចំ ផែនការអភិវឌ្ឍប្រព័ន្ធរថភ្លេីងទំនេីបប្រភេទ Monorail នៅកម្ពុជា ដើម្បីកាត់បន្ថយការកកស្ទះចរាចរណ៍នៅក្នុងរាជធានីភ្នំពេញ[…]»។
អនុប្រធានវិទ្យាស្ថានសុវត្ថិភាពចរាចរណ៍ លោក គង់ រតនៈ ស្វាគមន៍ដំណោះស្រាយការកបញ្ហាកកស្ទះចរាចរណ៍ ប៉ុន្តែ លោកបារម្ភពីផលប៉ះពាល់ទៅលើបរិស្ថាន ចំពោះការប្រើរថភ្លើងលើអាកាសនេះ។
លោក គង់ រតនៈ មានប្រសាសន៍ថា៖ «ខ្ញុំគិតថា វាជារឿងល្អដែរ បើសិនជាយើងមានដំណោះស្រាយពីបញ្ហាហ្នឹង! ប៉ុន្តែ អ្វីដែលយើងត្រូវគិតវិញ Monorail បើសិនជាខ្ញុំគិត អាហ្នឹងរថភ្លើងរត់លើអាកាស! ហើយដល់ពេល បើសិនជាយើងដំឡើងមកអញ្ចឹង យើងគិតថា ទីក្រុងរបស់យើងវាសំបូរទៅដោយអាគារខ្ពស់ៗ ឬក៏អីអញ្ចឹង វាបាត់សោភ័ណ្ឌភាព ហើយមួយទៀត វាជាកត្តាមួយដែលអាចបង្កទាក់ទងនឹងការបំពុលបរិយាកាសខ្លះដែរ!»។
អ្នកតាមដានបញ្ហាចរាចរណ៍រូបនេះ ចង់ឲ្យមានការថ្លឹងថ្លែងផលប៉ះពាល់ទៅលើបរិស្ថាននិងផលប៉ះពាល់ទៅលើការប្រើប្រាស់ ដោយថា ដើម្បីឲ្យសមិទ្ធិផលនេះបានជាប្រយោជន៍ដល់សង្គមទាំងមូលនិងជាប្រយោជន៍សាធារណៈទាំងអស់គា្ន។
របាយការណ៍ប្រធានមន្ទីរសាធារណការ និងដឹកជញ្ជូនរាជធានីភ្នំពេញ ឲ្យដឹងថា គិតមកដល់ត្រឹមខែកក្កដា ឆ្នាំ២០១៨ ចំនួនយានយន្តនៅរាជធានីភ្នំពេញមានការកើនឡើងរហូតដល់ជាង២លាន ១៩ម៉ឺនគ្រឿង។ ចំនួនរថយន្តគ្រប់ប្រភេទមានចំនួន៤៨ម៉ឺនគ្រឿង ម៉ូតូមានចំនួន១លាន ៧០ម៉ឺនគ្រឿង និងរ៉ឺម៉កកង់បីមានចំនួន១ម៉ឺន ១ពាន់គ្រឿង ដែលបានចុះបញ្ជី៕
