ក្រុមពលរដ្ឋមានជម្លោះដីធ្លីមកពីស្រុកពីរក្នុងខេត្តកោះកុង បានជំរុញទៅក្រសួងរៀបចំដែនដី នគររូបនីយកម្ម និងសំណង់ ឲ្យពន្លឿនដំណោះស្រាយបញ្ចប់វិវាទដីធ្លី បន្ទាប់ពីក្រសួងបរិស្ថានរុញសុំណុំរឿងដីធ្លីរបស់ពួកគេទៅឲ្យលោក ជា សុផារ៉ា ជាអ្នកដោះស្រាយបន្ត។
តំណាងពលរដ្ឋជាង១០នាក់ដែលមានជម្លោះដីធ្លីជាមួយក្រុមហ៊ុនចិន ញូញៀន ឌឹវើលុបមែន គ្រុប (Union Development Group) ស្ថិតក្នុងស្រុកបុទុមសាគរ និងស្រុកគីរីសាគរ បាននាំគ្នាប្រមូលផ្តុំមុខក្រសួងរៀបចំដែនដីនៅថ្ងៃនេះ ដើម្បីសុំអន្តរាគមន៍ពីរដ្ឋមន្រ្តី លោក ជា សុផារ៉ា ដោះស្រាយបញ្ចាប់វិវាទដីធ្លីពួកគេ ខណៈវិវាទនោះអូសបន្លាយជាង១០ឆ្នាំ ពុំទទួលបានសំណង។
អ្នកស្រី សាំង ពុយ ដែលអះអាងថា ជាតំណាងពលរដ្ឋនៅឃុំកោះស្តេច ប្រាប់ វី.អូ.ឌី ថា អ្នកភូមិសម្រេចនាំគ្នាមកតវ៉ាជាថ្មីនៅក្រសួងរៀបចំដែនដីនេះ បន្ទាប់ពីមន្រ្តីក្រសួងបរិស្ថានប្រាប់ថាបញ្ជូនសុំណុំរឿងរបស់ពួកគាត់ទៅក្រសួងរៀបចំដែនដី ជាអ្នកដោះស្រាយបន្ត។
អ្នកស្រី បន្ថែមថា៖ «មកពីលោក នេត្រ ភ័ក្រ្តា ហ្នឹង! គាត់ប្រាប់ថា បញ្ជូនសុំណុំរឿងហ្នឹងមកក្រសួងរៀបចំដែនដី ហើយពួកខ្ញុំក៏មកក្រសួងដែនដី។ ពួកខ្ញុំរំពឹងថា ក្រសួងដែនដីអាចដោះស្រាយឲ្យក្រុមខ្ញុំបាន ពីព្រោះការចេញប្លង់កម្មសិទ្ធហ្នឹង គឺក្រសួងរៀបចំដែនដីជាអ្នកចេញប្លង់កម្មសិទ្ធិឲ្យពួកខ្ញុំ។ ហើយក្រសួងដែនដីបានពិនិត្យពិច្ច័យហើយ ថាពួកខ្ញុំរស់នៅស្របច្បាប់ មានប័ណ្ណកម្មសិទ្ធស្របច្បាប់ក្នុងការកាន់កាប់ដីកន្លែងហ្នឹង»។
តំណាងពលរដ្ឋម្នាក់ទៀត អ្នកស្រី ឆៃ គឹមឌុច និយាយថា ការអូសបន្លាយមិនបានដោះស្រាយបញ្ចប់វិវាទដីធ្លីជូនពលរដ្ឋនេះ ពួកគាត់ជួបការលំបាកក្នុងជីវភាពគ្រួសារយ៉ាងខ្លាំង ដោយថា ពុំមានដីធ្លីបង្កបង្កើនផល និងជំពាក់បំណុលគេទៀតផង។
តំណាងអ្នកភូមិរូបនេះបន្តថា បច្ចុប្បន្នមានពលរដ្ឋ ៧៧គ្រួសារ ស្ថិតក្នុងឃុំចំនួន៥ នៃស្រុកចំនួន២ ដែលពុំទទួលបានការដោះស្រាយផលប៉ះពាល់ បន្ទាប់ក្រុមហ៊ុនរបស់ចិនរំលោភយកដីធ្លីពួកគេកាលពីឆ្នាំ២០០៩។
អ្នកស្រីបន្ថែមថា៖ «ដំណាំដែលគេឈូសឆាយហ្នឹង មានស្វាយច័ន្ទី មានស្វាយ ខ្នុរ ដល់អញ្ចឹងទៅ រយៈពេលជាង១០ឆ្នាំហ្នឹង ពួកគាត់មិនឲ្យយើងចូលបង្កបង្កើនផល។ បើហ៊ានតែចូលធ្វើ មានតែចាប់ដាក់គុកច្រវ៉ាក់ គ្រាន់តែចូលបោះបង្គោល ចាប់ម្នាក់ដាក់គុកមិនទាន់ដោះលែងវិញផង ដល់អញ្ចឹងរយៈពេលជាង១០ឆ្នាំហ្នឹងអត់បានធ្វើអីទេ។ ហើយកាត់ឲ្យចិនបានហេតុអីបានជាកាត់ឲ្យពលរដ្ឋខ្លួនឯងមិនបាន ព្រោះអីប្រជាជនមានឯកសារដែលចេញពីអាជ្ញាធរភូមិឃុំ»។
វិអូឌី មិនអាចសុំការឆ្លើយតប់ពីអ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត បានទេជុំវិញបញ្ហានេះ ដោយទូរសព្ទគ្មានអ្នកទទួល។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន ធ្លាប់បានជំរុញទៅរដ្ឋាភិបាលឲ្យពន្លឿនការដោះស្រាយជូនពលរដ្ឋឲ្យបានឆាប់ ដើម្បីបញ្ចប់វិវាទដីធ្លីមួយនេះ ដែលលោកថា កើតឡើងដោយសារតែរដ្ឋាភិបាលផ្តល់ដីឲ្យក្រុមហ៊ុនចិនធ្វើការអភិវឌ្ឍ។
កាលពីឆ្នាំ២០០៨ រដ្ឋាភិបាលបានសម្រេចផ្តល់ដីសម្បទានសេដ្ឋកិច្ចទំហំ ៣ម៉ឺន ៦ពាន់ហិកតា ស្ថិតនៅក្នុងស្រុកបទុមសាគរ និងស្រុកគីរីសាគរ ខេត្តកោះកុង ទៅដល់ក្រុមហ៊ុនចិន ញូញៀន ឌឹវើលុបមែន គ្រុប (Union Development Group) ដើម្បីធ្វើការអភិវឌ្ឍពាណិជ្ជកម្ម និងរមណីយដ្ឋានទេសចរណ៍ស្របតាមស្តង់ដារអន្តរជាតិ ដោយធ្វើឲ្យប៉ះពាល់ដីធ្លីទំហំជាង ៦ពាន់ហិកតារបស់ប្រជាពលរដ្ឋជាង ២០០គ្រួសារ ប៉ុន្តែក្រុមហ៊ុន និងរដ្ឋាភិបាលបានដោះស្រាយជូនពលរដ្ឋបានមួយចំនួនធំ។
ទោះជាយ៉ាងណា ប្រជាពលរដ្ឋប្រមាណ ៧៧គ្រួសារទៀត ស្ថិតក្នុងឃុំតានូន ឃុំកោះស្តេច ឃុំភ្ញីមាស ឃុំព្រែកខ្សាច់ និងឃុំថ្មស ដែលមានដីទំហំជិត ១ពាន់ហិកតាទៀតនោះ នៅមិនទាន់ទទួលបានដំណោះស្រាយនៅឡើយទេ៕
