ភរិយាឧកញ៉ា ថោង សារ៉ាត់ ស្រែកយំនៅមុខសាលាដំបូងរាជធានីភ្នំពេញ នៅល្ងាចថ្ងៃអង្គារ ម្សិលមិញ ក្រោយពេលតុលាការសម្រេចទោសលើស្វាមីលោកស្រី ហើយក៏បានអំពាវនាវឱ្យលោក នាយករដ្ឋមន្ត្រីកែទម្រង់ប្រព័ន្ធយុត្តិធម៌។
លោកស្រី ទាវ ធីតា ស្រែកយំនេះក្រោយពេលដែលចៅក្រមសម្រេចកាត់ទោសឱ្យស្វាមីលោកស្រីជាប់ពន្ធនាគារអស់មួយជីវិត។ លោកស្រីចាត់ទុកថា នេះជារឿងអយុត្តិធម៌ព្រោះថា លោកស្រី និងស្វាមី មិនដែលស្គាល់ឧកញ៉ា អ៊ឹង ម៉េងជឺ ទេ។
លោកស្រី ទាវ ធីតា៖ « សម្តេច ហ៊ុន សែន និងសម្តេច ប៊ុនរ៉ានី ជាម៉ែជាឪរបស់កូន នៅឯណាហេតុអីមិនចេញមកជួយ? ខ្ញុំសុំប្រាប់កាលពីថ្ងៃទី២២ ប្តីរបស់ខ្ញុំនៅជាមួយខ្ញុំ ខ្ញុំមិនដែលស្គាល់គ្នាជាមួយ អ៊ឹង ម៉េងជឺ ប្តីខ្ញុំក៏មិនដែលស្គាល់គ្នាជាមួយ អ៊ឹង ម៉េងជឺ។ ថ្ងៃទី១ លោកពូ ជួន សុវណ្ណ ឱ្យប្តីខ្ញុំទៅប្រជុំបក្ស ហើយមកវិញគាត់ឱ្យប៉េអឹមតែងខ្លួនជាជនស៊ីវិលចាប់ប្តីខ្ញុំ។ ភ្ជង់កាំភ្លើងគ្មានសាលក្រមគ្មានអីទាំងអស់ ភ្ជង់ដាក់ឡាន។»
លោកស្រី ក៏បានអំពាវនាវឱ្យលោកនាយករដ្ឋមន្ត្រី ហ៊ុន សែន ធ្វើកំណែទម្រង់ប្រព័ន្ធយុត្តិធម៌នៅកម្ពុជា។
លោក ស្រី ទាវ ធីតា៖ «អយុត្តិធម៌ណាស់ សម្តេច ហ៊ុន សែន ត្រូវតែធ្វើរឿងនេះឱ្យមានយុត្តិធម៌ ឱ្យមានយុត្តិធម៌ឡើងវិញ បើមិនអ៊ីចឹងទេ ប្រទេសជាតិក្តៅក្រហាយណាស់ គ្មានអ្នកអាចជ្រកកោនបានទេ។»
កាលពីម្សិលមិញ សាលាដំបូងរាជធានីភ្នំពេញបានសម្រេចកាត់ទោសលោក ថោង សារ៉ាត់ ម្ចាស់បុរី៩៩៩ និងអង្គរក្ស៤នាក់ឱ្យជាប់ពន្ធនាគារអស់មួយជីវិត ក្នុងករណីឃាតកម្មបាញ់សម្លាប់ឧកញ៉ាអ៊ឹង ម៉េងជឺ ជាថៅកែស៊ីម៉ង់យ៍ត្បូងពេជ្រ កាលពីខែវិច្ឆិកា ឆ្នាំ២០១៤។
នៅក្នុងសប្តាហ៍នេះ លោកនាយករដ្ឋមន្ត្រីជំរុញឱ្យមានការចាក់ផ្សាយខ្សែភាពយន្តរបស់ចិន រឿងប៉ាវចិន តាមកញ្ចក់ទូរទស្សន៍។ លោកបានសម្រេចបង្កើតក្រុមមេធាវី ដើម្បីជួយការពារដល់ស្ត្រីក្រីក្រ។ ចំណុចទាំងនេះ គឺដើម្បីពង្រឹងប្រព័ន្ធយុត្តិធម៌នៅកម្ពុជា។
ទោះយ៉ាងណា លោក សឹង សែនករុណា មន្ត្រីជាន់ខ្ពស់អង្គការអាដហុកថ្លែងក្នុងកម្មវិធី 8 Minute Talk ថា កែទម្រង់ប្រព័ន្ធយុត្តិធម៌ជារឿងសំខាន់ជាងការបង្កើតក្រុមមេធាវីជួយអ្នកក្រីក្រ។
របាយការណ៍របស់ World Justice Project ចេញផ្សាយកាលពីខែកុម្ភៈ វាយតម្លៃលើប្រព័ន្ធយុត្តិធម៌ប្រទេសចំនួន១១៣ គឺកម្ពុជាជាប់លេខ១១២ ចំណែកប្រទេសអាហ្គានីស្ថានជាប់លេខ១១១ ប្រទេសវេណេហ្សូអេឡាជាប់លេខ១១៣។
