នគរបាលច្រកអន្តរជាតិត្រពាំងក្រៀល ខេត្តស្ទឹងត្រែង បានឃាត់ខ្លួនបុរសជនជាតិឥណ្ឌូនេស៊ីម្នាក់ ពាក់ព័ន្ធជួញដូរគ្រឿងញៀនឆ្លងដែនពីប្រទេសឡាវមកកម្ពុជា កាលពីម្សិលមិញ។
យោងតាមការចុះផ្សាយលើគេហទំព័រអគ្គស្នងការនគរបាលជាតិនៅថ្ងៃនេះ បានឲ្យដឹងថា បុរសជនជាតិឥណ្ឌូនេស៊ីម្នាក់ត្រូវបានឃាត់ខ្លួនជាមួយនឹងសារធាតុញៀនជាច្រើនកញ្ចប់ ដែលលាក់ក្នុងវ៉ាលីស ខណ:ដែលបុរសរូបនេះធ្វើដំណើរឆ្លងកាត់ តាមច្រកអន្តរជាតិត្រពាំងក្រៀលព្រំប្រទល់កម្ពុជា-ឡាវ។
ប្រភពដដែលបានឲ្យដឹងថា ជនសង្ស័យមានឈ្មោះ NURUL FADLI EKO PUTRO ភេទប្រុស អាយុ៤៣ឆ្នាំ។ បន្ទាប់ពីឃាត់ខ្លួន សមត្ថកិច្ចបានរកឃើញសារធាតុញៀន៤៤កញ្ចប់ធំ និងតូច ដែលវេចខ្ចប់ក្នុងកញ្ចប់កាហ្វេ កញ្ចប់ស្ករគ្រាប់ និងកញ្ចប់ប្រដាប់ប្រដាក្មេងលេង។
ស្នងការរងខេត្តស្ទឹងត្រែង លោក សាន់ និមល បដិសេធផ្តល់ព័ត៌មានបន្ថែម ដោយលើកឡើងថា សមត្ថកិច្ចកំពុងស៊ើបអង្កេតរកអ្នកជាប់ពាក់ព័ន្ធក្នុងករណីនេះ។
សមត្ថកិច្ចខេត្តស្ទឹងត្រែងកាលពីថ្ងៃទី២៦ ខែមិថុនា ឆ្នាំ២០១៨ បានឃាត់ខ្លួនជនសង្ស័យចំនួន ៣នាក់ នៅច្រកអន្តរជាតិត្រពាំងក្រៀល ជាមួយគ្រឿងញៀន១២០គីឡូក្រាមផងដែរ។
យោងតាមរបាយការណ៍អាជ្ញាធរជាតិប្រយុទ្ធប្រឆាំងគ្រឿងញៀនក្នុងឆ្នាំ២០១៨ បានឲ្យដឹងថាសមត្ថកិច្ចបានបង្ក្រាបបទល្មើសគ្រឿងញៀនចំនួន ៨០០៣ករណី ដោយរឹបអូសគ្រឿងញៀនគ្រប់ប្រភេទជាង៥៣៣គីឡូក្រាម។