អភិបាលស្រុកសន្ទុក អំពាវនាវទៅអាជ្ញាធរភូមិ កុំចុះហត្ថលេខាដឹងឮលើកិច្ចសន្យាខ្ចីលុយរវាងប្រជាពលរដ្ឋ និងធនាគារហិរញ្ញវត្ថុ ដោយថា បើពលរដ្ឋពុំមានលទ្ធភាពសងត្រឡប់ទៅធនាគារវិញ។
ក្នុងសិក្ខាសាលាស្តីពីវិស័យមីក្រូហិរញ្ញវត្ថុថ្ងៃទី១ ខែមេសា ឆ្នាំ២០១៩ នៅសាលាស្រុកសន្ទុក ខេត្តកំពង់ធំ អភិបាលស្រុកលោក លោក ទូច សុខា ថ្លែងថា អាជ្ញាធរភូមិផ្សព្វផ្សាយឲ្យបានទូលំទូលាយពីបញ្ហាប្រឈមរបស់ប្រជាពលរដ្ឋ ដែលទៅខ្ចីលុយពីធនាគារ។ លោកបញ្ជាក់ថា បើប្រជាពលរដ្ឋដែលទៅខ្ចីលុយធនាគារ ហើយមិនមានលទ្ធភាពសងត្រឡប់ទៅធនាគារវិញទេ អាជ្ញាធរភូមិមិនត្រូវចុះហត្ថលេខាដឹងឮលើកិច្ចសន្យាខ្ចីប្រាក់នោះទេ ដោយថា កុំឲ្យពលរដ្ឋជួបបញ្ហាប្រឈមនៅថ្ងៃខាងមុខ។
លោកមានប្រសាសន៍ថា៖ «មុននឹងធ្វើជាដៃគូរខ្ចីពីធនាគារហិរញ្ញវត្ថុណាក៌ដោយ គឺយើងត្រូវគិតពីចំណូលរបស់យើងសិន ជៀសវាងមានហានិភ័យនៅថ្ងៃក្រោយ បើយើងមិនបានគិតគូរឲ្យបានដិតដល់ទេ ដូច្នេះអាជ្ញាធរភូមិ គួរតែផ្សព្វផ្សាយដល់ប្រជាពលរដ្ឋឲ្យបានយល់ច្បាស់ ហើយបើដឹងថា គាត់ពុំមានលទ្ធភាពក្នុងការសងធនាគារហិរញ្ញវត្ថុណាទេ ក៌គួរកុំចុះហត្ថលេខា កុំឲ្យពិបាកដល់ប្រជាពលរដ្ឋយើងនៅថ្ងៃក្រោយ។»
ឆ្លើយតបនឹងបញ្ហានេះ មេភូមិនិម្មត ឃុំទីពោ ស្រុកសន្ទុក លោក ជុំ សុផុន មានប្រសាសន៍យ៉ាងខ្លីថា បទពិសោធន៍កន្លងមក ប្រជាពលរដ្ឋ និងបុគ្គលិកធនាគារ និយាយត្រូវគ្នា ទើបពួកគេមកឲ្យមេភូមិចុះហត្ថលេខាដឹងឮជុំវិញការខ្ចីប្រាក់នោះ៕
