ភ្ញៀវទេសចរជនជាតិចិន នៅតែនាំមុខគេក្នុងចំណោមជនបរទេសសរុបមកកាន់កម្ពុជាក្នុងរយៈពេល២ខែដើមឆ្នាំនេះ។
ក្នុងរបាយការណ៍ប្រចាំខែកុម្ភៈ ឆ្នាំ២០១៩ ក្រសួងទេសចរណ៍បង្ហាញថា ក្នុងរយៈពេល២ខែដើមឆ្នាំ២០១៩នេះ ភ្ញៀវទេសចរបរទេសដែលមកលេងប្រទេសកម្ពុជាមានចំនួនប្រមាណ១លាន២សែន៤ម៉ឺននាក់។ ភ្ញៀវជនជាតិចិនមានចំនួនជាង៤១ម៉ឺននាក់ កើនជិត៣២ភាគរយបើធៀបនឹងរយៈពេលដូចគ្នាកាលពីឆ្នាំមុន ខណៈភ្ញៀវវៀតណាមកើន១,៧ភាគរយ ឡាវកើន១៣ភាគរយ ថៃកើនជាង២០ភាគរយ សហរដ្ឋអាមេរិកកើន១,២ភាគរយ បារាំងកើនជិត៨ភាគរយ អង់គ្លេសកើន១៥,៣ភាគរយ ជប៉ុនកើនជាង៣ភាគរយ ម៉ាឡេស៊ីកើន៨,៤ភាគរយ ខណៈភ្ញៀវកូរ៉េថយចុះជិត២០ភាគរយ ។
ក្នុងឆ្នាំ២០១៨ ភ្ញៀវទេសចរមកកាន់កម្ពុជាមានចំនួនជាង៦លាន២សែននាក់ កើនឡើង១១ភាគរយបើធៀបនឹងឆ្នាំ២០១៧ ក្នុងនោះភ្ញៀវចិនមាន៣០ភាគរយ ខណៈចំណូលដែលកម្ពុជាប្រមូលបានពីការលក់សំបុត្រចូលទស្សនាប្រាសាទអង្គរទទួលបានជាង១១៦លានដុល្លារកើនឡើង៨ភាគរយបើធៀបនឹងឆ្នាំ២០១៧៕
