សកម្មជនដីធ្លីមួយគ្រួសារនៅសហគមន៍បឹងកក់ គ្រោងប្តឹងទៅសាលាឧទ្ធរណ៍ប្រឆាំងការសម្រេចរបស់សាលាដំបូងរាជធានីភ្នំពេញ ក្នុងសុំណុំរឿងហិង្សាជាមួយអតីតសកម្មជនដីធ្លីដូចគ្នាកាល២ឆ្នាំមុន។
កាលពីថ្ងៃទី១៣ ខែមីនា សាលាដំបូងរាជធានីភ្នំពេញ បានបើកសវនាការសកម្មជនដីធ្លីសហគមន៍បឹងកក់ចំនួន៤នាក់ មានឈ្មោះ ង៉ែត ឃុន ឈ្មោះ អេង សុខា ឈ្មោះ អេង ស្រីហ៊ាង និងឈ្មោះ អេង ហួយ ក្នុងសំណុំរឿងហិង្សាដោយចេតនា ដែលប្តឹងដោយអតីតសកម្មជនបឹងកក់ម្នាក់ឈ្មោះ សាទ សុខា ហើយបានសម្រេចកាត់ទោសឲ្យទាំងនេះជាប់ពន្ធនាគារ១ឆ្នាំ ដោយព្យួរទោស និងពិន័យជាប្រាក់ម្នាក់២លានរៀល។
ស្រ្តីសកម្មជនដីធ្លីនៅសហគមន៍បឹងកក់វ័យ៨០ឆ្នាំម្នាក់ គឺអ្នកស្រី ង៉ែត ឃុន និយាយថា ការសម្រេចរបស់សាលាដំបូងរាជធានីភ្នំពេញជារឿងអយុត្តិធម៌សម្រាប់គ្រួសារគាត់ ដោយថា ពួកគាត់មិនប្រើប្រាស់អំពើហិង្សាទៅលើអតីតសកម្មជនដីធ្លីម្នាក់ទៀតនោះទេ។
សកម្មជនដីធ្លីវ័យចំណាស់រូបនេះឲ្យដឹងថា ពួកគាត់នឹងប្តឹងជំទាស់ទៅសាលាឧទ្ធរណ៍ទៀត ដើម្បីឲ្យតុលាការមួយនេះជួយរកយុតិ្តធម៌ ដោយថា ពួកគាត់មិនបានប្រព្រឹត្តបទល្មើសដូចការចោទប្រកាន់ឡើយ។ អ្នកស្រី ង៉ែត ឃុន ថាអ្នកដែលប្ដឹងគាត់វិញទេ ដែលបានប្រើប្រាស់អំពើហិង្សានោះ។
កាលពីឆ្នាំ២០១៧ អ្នកមានជម្លោះដីធ្លី២ក្រុមនៅសហគមន៍បឹងកក់ បានឈ្លោះប្រកែកគ្នារហូតផ្ទុះអំពើហិង្សាកើតឡើង ដោយកាលនោះមានពលរដ្ឋខ្លះរងរបួលបែកក្បាលផងដែរ៕
