ស្ពានមិត្តភាពជ្រោយចង្វារកម្ពុជា-ជប៉ុន ត្រូវបានដាក់សម្ពាធដំណើរការឡើងវិញនៅថ្ងៃនេះ ក្រោយពីផ្អាកដំណើរការដើម្បីជួសជុលអស់រយៈពេលជាង១ឆ្នាំមកនេះ។
ស្ពានដែលមានប្រវែង៩៧១ម៉ែត្រ និងទទឹង១៣ម៉ែត្រនេះ ត្រូវបានជប៉ុនចាប់ផ្ដើមដំណើរការជួសជុលឡើងវិញកាលពីចុងឆ្នាំ២០១៧ ដែលចំណាយថវិកាប្រមាណ៣០លានដុល្លារអាមេរិកជាជំនួយឥតសំណង។
នៅព្រឹកនេះផងដែរ លោកនាយករដ្ឋមន្ត្រី ហ៊ុន សែន បានសរសេរនៅលើទំព័រហ្វេសបុករបស់លោក អរគុណដល់ប្រជាជនជប៉ុនដែលបានជួយជួសជុលស្ពាននេះ ខណៈលោកថា ក្រោយការជួសជុល ស្ពាននេះអាចប្រើប្រាស់បានរយៈពេល៥០ឆ្នាំទៅមុខទៀត។
លោកសរសេរថា៖ « ស្ពានជ្រោយចង្វារទី១នេះ ហាក់បីដូចជាសមិទ្ធផលថ្មីមួយសម្រាប់រាជធានីភ្នំពេញ ក្នុងការបម្រើដល់ការធ្វើដំណើរ និងដឹកជញ្ជូនទំនិញចេញចូលរបស់បងប្អូនប្រជាពលរដ្ឋទូទៅ ជាពិសេសការដាក់អោយប្រើប្រាស់ថ្ងៃនេះ ក៏ជាចំណងដៃថ្មីដល់ប្រជាពលរដ្ឋ មុនឱកាសនៃពិធីបុណ្យចូលឆ្នាំប្រពៃណីជាតិខ្មែរដែលនឹងចូលមកដល់ពាក់កណ្តាលខែមេសាខាងមុខនេះ »។
ស្ពានមិត្តភាពជ្រោយចង្វារត្រូវបានកសាងឡើងក្នុងសម័យសង្គមរាស្ត្រនិយមក្នុងឆ្នាំ១៩៦៦ តែត្រូវបានកាត់ផ្ដាច់វិញដោយសារសង្គ្រាមនៅឆ្នាំ១៩៧២ ស្ពាននេះត្រូវបានជួសជុល និងតភ្ជាប់ឡើងវិញដោយរដ្ឋាភិបាលជប៉ុននៅឆ្នាំ១៩៩៤ ហើយក៏បានប្តូរឈ្មោះទៅជាស្ពានមិត្តភាព កម្ពុជា-ជប៉ុន ដោយព្រះមហាវីរៈក្សត្រ ព្រះបរមរតនកោដ្ឋ សម្ដេចព្រះបាទ នរោត្ដម សីហនុ ចាប់ពីពេលនោះមក៕
