ព័ត៌មានទាន់ហេតុការណ៌, អភិបាលកិច្ច

សាលារាជធានីភ្នំពេញគ្រោងសង់ផ្លូវក្រោមដីកាត់ផ្លូវជាតិលេខ១នៅច្បារអំពៅ

លោក ហួត វុទ្ធី
| ០៣ មេសា ២០១៩
ម៉ោង ១៥:៥៣

ថ្ងៃទី០២ ខែមេសា ឆ្នាំ២០១៩ លោក ឃួង ស្រេង អភិបាល នៃគណៈអភិបាលរាជធានីភ្នំពេញ អញ្ជើញជាអធិបតីក្នុងអង្គប្រជុំបច្ចេកទេសលើសំណើសុំគោលការណ៍ស្ថាបនាផ្លូវក្រោមដីដោយតភ្ជាប់ពីទីតាំងផ្លូវចូលផ្សារទំនើប ភីអេច អេកូ ម៉ល ភ្ជាប់ទៅផ្លូវជាតិលេខ១ ផ្នែកក្រោមដី ស្ថិតនៅភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ។ រូបភាព៖ ហ្វេសប៊ុក រដ្ឋបាលរាជធានីភ្នំពេញ

សាលារាជធានីភ្នំពេញគ្រោងស្ថាបនាផ្លូវក្រោមដី ក្នុងខណ្ឌច្បារអំពៅ តភ្ជាប់ពីទីតាំងផ្លូវចូលផ្សារទំនើបមួយកន្លែងទៅផ្លូវជាតិលេខ១ ដោយថា ដើម្បីបញ្ចៀសការកកស្ទះចរាចរណ៍។

រដ្ឋបាលសាលារាជធានីភ្នំពេញឲ្យដឹងតាមរយៈ Facebook កាលពីម្សិលមិញថា អភិបាលសាលារាជធានីបានប្រជុំបច្ចេកទេសលើសំណើសុំគោលការណ៍ស្ថាបនាផ្លូវក្រោមដី ដោយតភ្ជាប់ពីទីតាំងផ្លូវចូលផ្សារទំនើប ភីអេច អេកូ ម៉ល ភ្ជាប់ទៅផ្លូវជាតិលេខ១ ផ្នែកក្រោមដី ស្ថិតនៅភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ ដើម្បីបញ្ចៀសការកកស្ទះចរាចរណ៍ក្នុងតំបន់នោះ។

បើតាមទីភ្នាក់ងារសារព័ត៌មានកម្ពុជា (AKP) ដែលបានស្រង់សំដីអភិបាលរាជធានីភ្នំពេញឲ្យដឹងថា គម្រោងនេះត្រូវសិក្សាជាកញ្ចប់តែម្តង ដោយក្រុមការងារបច្ចេកទេសដែលមានតំណាងមកពីក្រសួងរៀបចំដែនដី នគរូបនីយកម្ម និងសំណង់ ក្រសួងសាធារណការ និងដឹកជញ្ជូន រដ្ឋករទឹកស្វយ័តក្រុងភ្នំពេញ និងអង្គការ JICA។

AKP បន្ដថា គម្រោងធ្វើផ្លូវក្រោមដី ប្រវែង១៩៥ម៉ែត្រ ទទឹង៧ម៉ែត្រ ភ្ជាប់ពីទីតាំងផ្សារទំនើប PH ECO MALL ទៅផ្លូវជាតិលេខ១ ផ្នែកក្រោមដី ស្ថិតនៅភូមិបឹងឈូក សង្កាត់និរោធ ខណ្ឌច្បារអំពៅ ស្នើឡើងដោយ លោកឧកញ៉ា ថៃ ជាហួត ម្ចាស់បុរីប៉េងហួត៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។