រដ្ឋាភិបាល សម្រេចបង្កើតនិមិត្តសញ្ញាខេត្តកំពង់ធំដោយជ្រើសរើសយកប្រាសាទយាយព័ន្ធ ដែលមានទីតាំងក្នុងតំបន់ប្រាសាទសំបូរព្រៃគុក ជានិមិត្តសញ្ញាខេត្ត។
ក្នុងសេចក្ដីប្រកាសចុះថ្ងៃទី១ ខែមេសា រដ្ឋមន្ត្រីក្រសួងមហាផ្ទៃ លោក ស ខេង បានសម្រេចបង្កើតនិមិត្តសញ្ញាខេត្តកំពង់ធំ ដោយយកដើមឈើជាផ្ទៃខាងក្រោយ និងយកប្រាសាទយាយព័ន្ធដាក់នៅកណ្ដាលដែលអមសងខាងដោយរូបបដិមាតោ និងរូបដំរីជាន់ខ្លា និងមានរូបកួរស្រូវនៅអមពីខាងក្រៅសងខាង ជាមួយនឹងពាក្យ ខេត្តកំពង់ធំ នៅពីក្រោមផងដែរ។
ក្នុងសេចក្ដីប្រកាសនោះ ក៏បានបញ្ជាក់ផងដែរថា និមិត្តសញ្ញានេះនឹងចាប់ផ្ដើមដាក់ឲ្យប្រើប្រាស់ជាផ្លូវការចាប់ពីថ្ងៃទី១ ខែមេសា តទៅ។
កាលពីថ្ងៃទី២៦ ខែមីនា ឆ្នាំ២០១៩ ក្រសួងមហាផ្ទៃ ក៏បានសម្រេចបង្កើតនិមិត្តសញ្ញាខេត្តកំពង់ស្ពឺ ដោយកំណត់យកដើមត្នោត ៣ដើម ស្ថិតក្នុងរង្វង់មូលមានផ្ទៃបៃតង មានរូបភ្នំពេជ្រនិល រូបពន្លឺព្រះអាទិត្យ រូបកួរស្រូវ និងរូបសៀវភៅ ដែលតំណាងឲ្យអក្សរសាស្ត្រដែលបន្សល់ទុកដោយសម្ដេចព្រះសង្ឃរាជ ជួន ណាត ជាព្រះសង្ឃមានដើមកំណើតនៅក្នុងខេត្តនេះ៕
