កម្លាំងកងរាជអាវុធហត្ថរាជធានីភ្នំពេញ បានឃាត់ខ្លួនបុរសម្នាក់នៅថ្ងៃនេះ ដែលបានទះកំផ្លៀងទៅលើស្ត្រីម្នាក់ឱ្យដួលទៅលើថ្នល់ កាលពីថ្ងៃអង្គារកន្លងមកនេះ។
ទំព័រហ្វេសប៊ុករបស់កងរាជអាវុធហត្ថរាជធានីភ្នំពេញ នៅថ្ងៃនេះ បានឱ្យដឹងថា កម្លាំងជំនាញរបស់កងរាជអាវុធហត្ថ បានកំណត់អត្តសញ្ញាណជនសង្ស័យថា ជាបុគ្គលិកក្រុមហ៊ុនមួយ ប៉ុន្តែ សមត្ថកិច្ចមិនអាចបញ្ជាក់ថា ជាក្រុមហ៊ុនអ្វីនោះទេ។
បន្ទាប់ពីកំណត់អត្តសញ្ញាណជនសង្ស័យ មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ លោក រ័ត្ន ស្រ៊ាង បានស្នើទៅក្រុមហ៊ុនឲ្យជននោះចេញមុខទទួលខុសត្រូវ។
ប្រភពដដែលបន្ថែមថា ពីរថ្ងៃបន្ទាប់ ក្រុមហ៊ុននោះបាននាំជនសង្ស័យឈ្មោះ ឡោ ប៊ុនភ័ក្ត្រ មកប្រគល់ឱ្យសមត្ថកិច្ចដល់បញ្ជាការដ្ឋានកងរាជអាវុធហត្ថរាជធានីភ្នំពេញតែម្តង។
ទំព័រហ្វេសប៊ុកបញ្ជាក់ថា៖ «ជនសង្ស័យមានឈ្មោះ ឡោ ប៊ុនភ័ក្ត្រ អាយុ ៤៣ឆ្នាំ មុខរបរជាអ្នកបើកបររថយន្តឲ្យក្រុមហ៊ុនឯកជនមួយ» ។
បច្ចុប្បន្នកម្លាំងជំនាញ កំពុងសួរនាំជនសង្ស័យនៅបញ្ជាការដ្ឋានកងរាជអាវុធហត្ថរាជធានីភ្នំពេញ និងកសាងសំណុំរឿងបញ្ជូនទៅតុលាការដើម្បីផ្តន្ទាទោសតាមច្បាប់។
កាលពីថ្ងៃម្សិលមិញ វីដេអូមួយ ដែលបានចែកចាយនៅលើបណ្តាញសង្គមហ្វេសប៊ុក បានបង្ហាញពីហេតុការណ៍ហិង្សាទៅលើស្ត្រីម្នាក់ ដែលកើតឡើងកាលពីថ្ងៃទី៩ ខែមេសា នៅចំណុចកែងផ្លូវលេខ១៣៦ សង្កាត់ផ្សារកណ្តាលទី១ ខណ្ឌដូនពេញ។
វីដេអូនោះ បានបង្ហាញពីសកម្មភាពទំនាស់ពាក្យសម្តីរវាងជនសង្ស័យ លោក ឡោ ប៊ុនភ័ក្ត្រ ដែលចុះពីរថយន្តទំនើបចូលទៅកាន់កន្លែងលក់ថ្នាំពេទ្យមួយកន្លែង ជាមួយស្ត្រីម្នាក់ក្នុងចំណោមស្ត្រីពីរនាក់ដែលដើរនៅតាមផ្លូវ។
ក្រោយប្រកែកគ្នា បុរសជនសង្ស័យ ក៏ដើរចេញពីកន្លែងលក់ថ្នាំពេទ្យ មកវាយមួយកំផ្លៀងទៅលើស្ត្រីម្នាក់ដែលប្រកែកគ្នានោះ បណ្តាលឱ្យដួលមួយជំហរទៅលើថ្នល់តែម្តង។ ក្រោយកើតហេតុការណ៍ហិង្សានេះ បុរសដដែលក៏បានបើករថយន្តចេញទៅបាត់តែម្តង៕
