រដ្ឋាភិបាលកម្ពុជាចេញសេចក្តីថ្លែងការណ៍ថ្កោលទោសដល់ក្រុមភេរវករដែលបានបោកគ្រាប់បែកសម្លាប់មនុស្ស២៩០នាក់ និងរបួសជាង៥០០នាក់ នៅប្រទេសស្រីលង្កាកាលពីម្សិលមិញ។
ក្រសួងការបរទេសកម្ពុជាកាលពីម្សិលមិញបានចេញសេចក្តីថ្លែងការណ៍មួយ ដោយចូលរួមរំលែកទុក្ខដល់រដ្ឋាភិបាលស្រីលង្កា និងគ្រួសារនៃជនរងគ្រោះដែលបានបាត់បង់ជីវិតនៅក្នុងការវាយប្រហារដោយគ្រាប់បែក ហើយបានសម្លាប់មនុស្ស២៩០នាក់ កាលពីថ្ងៃទី២១ ខែមេសា ឆ្នាំ២០១៩។ ក្នុងសេចក្តីថ្លែការណ៍នេះ រដ្ឋាភិបាលកម្ពុជាក៏បានថ្កោលទោសចំពោះអំពើហិង្សាដ៏ឃោរឃៅនេះ។
ជាថ្មីម្តងទៀត រដ្ឋាភិបាលកម្ពុជាប្តេជ្ញាចិត្តក្នុងការប្រយុទ្ធប្រឆាំងនឹងអំពើភេរវកម្ម និងជ្រុលនិយមតាមគ្រប់ទម្រង់ និងរូបភាព។
កាលពីម្សិលមិញ មានការវាយប្រហារបំផ្ទុះគ្រាប់បែកនៅវិហារគ្រឹស្តសាសនាចំនួន ៣ ក្នុងប្រទេសស្រីលង្កា និងសណ្ឋាគារចំនួន៤ បានសម្លាប់មនុស្ស ២៩០ នាក់ ក្នុងនោះមានជនបរទេស ៣២នាក់ និងជាង ៥០០នាក់បានរងរបួស។ អាជ្ញាធរស្រីលង្កា អះអាងថា ជនសង្ស័យ១៣នាក់ ត្រូវបានចាប់ខ្លួនក្នុងករណីបំផ្ទុះគ្រាប់បែកនេះ។
