ពលរដ្ឋមានជម្លោះដីធ្លីជាមួយក្រុមហ៊ុនចិនមួយក្នុងខេត្តកោះកុង បានជំរុញជាថ្មីទៀតទៅក្រសួងដែនដីឲ្យពន្លឿនដោះស្រាយបញ្ចប់វិវាទដីធ្លីជូនពួកគេ ខណៈវិវាទនោះអូសបន្លាយជាង១០ឆ្នាំពុំមានដំណោះស្រាយ។
តំណាងពលរដ្ឋជាង៣០នាក់ដែលមានជម្លោះដីធ្លីជាមួយក្រុមហ៊ុនចិន ញូញៀន ឌឹវើលុបមែន គ្រុប (Union Development Group) ស្ថិតក្នុងស្រុកបុទុមសាគរ និងស្រុកគីរីសាគរ បាននាំគ្នាប្រមូលផ្តុំគ្នាឈរលើកបដាមុខក្រសួងរៀបចំដែនដីនៅថ្ងៃនេះ ដើម្បីតាមដានញត្តិ និងជំរុញទៅរដ្ឋមន្រ្តី លោក ជា សុផារ៉ា ដោះស្រាយបញ្ចាប់វិវាទដីធ្លីរបស់ពួកគេ។
អ្នកស្រី សាំង ពុយ ដែលអះអាងថា ជាតំណាងពលរដ្ឋនៅឃុំកោះស្តេច ប្រាប់ វី.អូ.ឌី ថា អ្នកភូមិសម្រេចនាំគ្នាមកតវ៉ាជាថ្មីនៅក្រសួងរៀបចំដែនដីនេះ ដោយសារពួកគាត់បានដាក់ញត្តិទៅស្ថាប័ននេះឲ្យជួយដោះស្រាយវិវាទដីធ្លីជាច្រើនខែហើយ ប៉ុន្តែ ពុំឃើញមន្រ្តីណាម្នាក់ចុះទៅដោះស្រាយជូនពួកគាត់ឡើយ។
អ្នកស្រី សាំង ពុយ ថា៖«ឲ្យពួកយើងរង់ចាំគ្មានថ្ងៃកំណត់ហ្នឹងជាង១០ឆ្នាំហើយ។ ពូកខ្ញុំចេះតែចាំរហូត ដល់ពេលពួកខ្ញុំឡើងមកសួរ ថាឲ្យពួកខ្ញុំចេះតែមកៗ ប៉ុន្តែ អត់មានឃើញដោះស្រាយជូនពួកខ្ញុំសោះ។ បើឲ្យពួកខ្ញុំទៅចាំនៅផ្ទះធ្វើម៉េចសុខ ប្រសិនបើមានក្រុមហ៊ុនមករករឿង អ្នកនេះអ្នកនោះមករករឿងឲ្យពួកខ្ញុំធ្វើម៉េចទៅ។»
តំណាងពលរដ្ឋរូបនេះបន្តថា ការអូសបន្លាយមិនបានដោះស្រាយបញ្ចប់វិវាទដីធ្លីនេះ បានធ្វើឲ្យពួកគាត់មានការភ័យខ្លាចពីសកម្មភាពរំលោភយកដីធ្លីពីសំណាក់ក្រុមហ៊ុនម្តងទៀត និងបង្កឲ្យពលរដ្ឋមានបញ្ហាជីវភាព ដោយសារពុំមានដីធ្លីបង្កបង្កើនផល រួមទាំងជំពាក់បំណុលធនាគារទៀតផង។
អនុប្រធានរដ្ឋបាលនៃក្រសួងរៀបចំដែនដី លោក អុស សុខយស បានឆ្លើយតបទៅពលរដ្ឋនៅមុខក្រសួងរៀបចំដែនដី ថា ក្រសួងកំពុងដំណើរការដោះស្រាយវិវាទដីធ្លីពូកគេ។ លោក បញ្ជាក់ថាករណីដំណោះស្រាយមានការយឺតយ៉ាវ ដោយសារបញ្ហាវិវាទដីធ្លីនេះមានច្រើនករណីពេក។
លោក បន្ថែមថា៖ «ឯកសារដែលបងប្អូនដាក់មកហ្នឹង បានទៅដល់គាត់ [លោក ជា សុផារ៉ា] ហើយ គាត់ឃើញគាត់ជ្រាបហើយ។ អ៊ីចឹងហើយបានជាខ្ញុំហៅទៅមើលឯកសារ ដើម្បីយល់ទាំងអស់គ្នា ព្រោះថា ញត្តិបងប្អូនដែលដាក់មកហ្នឹង គឺក្រសួងកំពុងដំណើរការទៅតាមនីតិវិធី។»
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន ធ្លាប់បានជំរុញទៅរដ្ឋាភិបាលឲ្យពន្លឿនការដោះស្រាយជូនពលរដ្ឋឲ្យបានឆាប់ ដើម្បីបញ្ចប់វិវាទដីធ្លីមួយនេះ។
លោក មានប្រសាន៍ថា៖ «អាជ្ញាធរគួរតែបង្ហាញឆន្ទៈក្នុងការដោះស្រាយជម្លោះជូនប្រជាពលរដ្ឋឲ្យបានចប់ទៅ ព្រោះថា ជម្លោះនេះកើតឡើងដោយសាររដ្ឋាភិបាលផ្តល់ដីទៅឲ្យក្រុមហ៊ុន ហើយនៅពេលជម្លោះកើតឡើងហើយ យើងជាអាជ្ញាធរមានសមត្ថកិច្ច ជាពិសេស ក្រសួងបរិស្ថានហ្នឹង មិនមានការខិតខំប្រឹងប្រែងដោះស្រាយទេ ដោយបណ្តោយឲ្យប្រជាពលរដ្ឋរងគ្រោះបែបហ្នឹង។»
កាលពីឆ្នាំ២០០៨ រដ្ឋាភិបាលបានសម្រេចផ្តល់ដីសម្បទានសេដ្ឋកិច្ចទំហំ ៣ម៉ឺន ៦ពាន់ហិកតា ស្ថិតនៅក្នុងស្រុកបទុមសាគរ និងស្រុកគីរីសាគរ ខេត្តកោះកុង ទៅដល់ក្រុមហ៊ុនចិន ញូញៀន ឌឹវើលុបមែន គ្រុប (Union Development Group) ដើម្បីធ្វើការអភិវឌ្ឍពាណិជ្ជកម្ម និងរមណីយដ្ឋានទេសចរណ៍ស្របតាមស្តង់ដារអន្តរជាតិ។ ការផ្តល់ដីសម្បទានសេដ្ឋកិច្ចនេះ បានធ្វើឲ្យប៉ះពាល់ដីធ្លីទំហំជាង ៦ពាន់ហិកតារបស់ប្រជាពលរដ្ឋជាង ២០០គ្រួសារ ប៉ុន្តែ ក្រុមហ៊ុន និងរដ្ឋាភិបាលបានដោះស្រាយជូនពលរដ្ឋបានមួយចំនួនធំហើយ។
ទោះជាយ៉ាងណា តំណាងពលរដ្ឋអះអាងថា អ្នកភូមិប្រមាណ ៧៧គ្រួសារទៀត ស្ថិតក្នុងឃុំតានូន ឃុំកោះស្តេច ឃុំភ្ញីមាស ឃុំព្រែកខ្សាច់ និងឃុំថ្មស ដែលមានដីទំហំជិត ១ពាន់ហិកតាទៀត នៅមិនទាន់ទទួលបានដំណោះស្រាយនៅឡើយទេ៕
