ក្រសួងមហាផ្ទៃ ថាខ្លួនបានសម្រេចបញ្ជូនជនជាតិចិន ៣នាក់ទៅតុលាការ បន្ទាប់ពីសង្ស័យថាជនទាំងនេះពាក់ព័ន្ធនឹងឧក្រិដ្ឋកម្មលាងលុយកខ្វក់។
ក្នុងសេចក្ដីប្រកាសព័ត៌មានចុះថ្ងៃទី២៦ ខែមេសានេះ ក្រសួងមហាផ្ទៃឲ្យដឹងថា ជនជាតិចិនទាំង៣នាក់នោះត្រូវបានសមត្ថកិច្ចឃាត់ខ្លួនតាំងពីថ្ងៃទី២៣ ខែមេសា នៅអាកាសយានដ្ឋានអន្តរជាតិភ្នំពេញ ជាមួយលុយដុល្លារចំនួន ៣លាន ៥សែន ២ម៉ឺនដុល្លារអាមេរិក ដោយពុំបញ្ជាក់ប្រភពច្បាស់លាស់ពីទីក្រុងហុងកុងចូលមកកម្ពុជា។ សេចក្ដីប្រកាសនោះក៏បានឲ្យដឹងផងដែរថា នៅពេលនេះជនសង្ស័យទាំង៣នាក់ត្រូវបានរៀបចំបែបបទបញ្ជូនទៅតុលាការរាជធានី ដើម្បីបន្តនីតិវិធី។
VOD មិនអាចទាក់ទងអ្នកនាំពាក្យក្រសួងមហាផ្ទៃ លោក ខៀវ សុភ័គ និងលោក ផាត សុផានិត ដើម្បីបញ្ជាក់បន្ថែមបាននោះទេ ខណៈអ្នកនាំពាក្យអយ្យការរាជធានីភ្នំពេញ លោក លី សុផាណា ថានៅមិនទាន់ទទួលបាននៅឡើយទេ។
ក្នុងសេចក្ដីណែនាំចុះថ្ងៃទី២២ ខែមេសា រដ្ឋមន្ត្រីក្រសួងមហាផ្ទៃ លោក ស ខេង បានណែនាំដល់មន្ត្រីព្រំដែនឲ្យពង្រឹងការត្រួតពិនិត្យបន្ថែមទៀត ជាពិសេសទៅលើបទល្មើសគ្រឿងញៀន និងការសម្អាតប្រាក់ បន្ទាប់ពីលោកសង្កេតឃើញមានការប៉ុនប៉ងលួចធ្វើសកម្មភាពឧក្រិដ្ឋកម្មឆ្លងដែននៅភូមិសាស្ត្រមួយចំនួនដែលមានការធ្វេសប្រហែស និងខ្វះការប្រុងប្រយ័ត្ន។
កាលពីថ្ងៃទី២២ ខែកុម្ភៈ ឆ្នាំ២០១៩ អង្គការឃ្លាំមើលការលាងលុយកខ្វក់អន្តរជាតិ Financial Action Task Force បានដាក់កម្ពុជាក្នុងបញ្ជីពណ៌ប្រផេះរបស់ខ្លួន ដោយនឹងត្រួតពិនិត្យលំហូរហិរញ្ញវត្ថុ វិនិយោគ និងពាណិជ្ជកម្ម ចេញ និងចូលប្រទេសកម្ពុជា។ ការដាក់កម្ពុជាក្នុងបញ្ជីឃ្លាំមើលរបស់ FATF អាចនឹងបង្កការលំបាកដល់ក្រុមហ៊ុន ក៏ដូចជាបុគ្គលទូទៅក្នុងការប្រើប្រាស់ប្រព័ន្ធហិរញ្ញវត្ថុអន្តរជាតិ៕
