ក្រសួងកសិកម្មអះអាងថា ទិន្នផលស្រូវប្រាំងក្នុងឆ្នាំ២០១៩នេះ បន្តកើនឡើងលើសឆ្នាំមុនស្ទើរតែទ្វេដង ខណៈកម្ពុជាប្រឈមនឹងបញ្ហាក្ដៅហួតហែងខ្លាំង ហើយរដ្ឋាភិបាលស្នើកុំឲ្យពលរដ្ឋធ្វើស្រែប្រាំងជាលើកទី២។
ក្នុងរបាយការណ៍សភាពការណ៍កសិកម្មប្រចាំត្រីមាសទី១ ឆ្នាំ២០១៩ ក្រសួងកសិកម្មអះអាងថា គិតត្រឹមដើមខែមីនា ឆ្នាំ២០១៩ កម្ពុជាប្រមូលផលស្រែប្រាំងលើផ្ទៃដីជិត ៥សែនហិកតា និងបានទទួលបរិមាណសរុបប្រមាណ ២លាន ១សែនតោន កើនលើសឆ្នាំមុនជិត ៩សែនតោន។
អនុប្រធាននាយកដ្ឋានដំណាំស្រូវនៃអគ្គនាយកដ្ឋានកសិកម្ម លោក គង់ សំអឿន មានប្រសាសន៍ថា បរិមាណនេះគឺជាការប្រមូលផលស្រូវប្រាំងទាំងពីរលើក មុនការធ្វើស្រែរដូវវស្សាដែលនឹងចាប់ផ្ដើមនាខែឧសភាខាងមុខ។
លោកថា៖ «តាមកន្លែងនីមួយៗ គេធ្វើទាល់តែមានទឹកគ្រប់គ្រាន់បានគេធ្វើ។ […] បើនិយាយទៅ វាមិនមែនតែលើកទី២ទេអាហ្នឹង មានទីមួយខ្លះ ទីពីរខ្លះ លាយចូលគ្នាបន្តបន្ទាប់គ្នា។ ព្រោះពីខែ១១មក ចាប់ផ្ដើមសូវប្រាំង យើងប្រមូលផលក្នុងខែមួយ ខែពីរ ហើយបន្តបន្ទាប់ យើងធ្វើលើកទីពីរនៅខែ១ និងខែ២ យើងត្រូវច្រូតនៅខែ៣ និង៤ អស់រលីងហើយ។»
រដ្ឋាភិបាលកម្ពុជាបានចេញសេចក្ដីសារាចរមួយកាលពីចុងឆ្នាំកន្លងមកនេះ ដោយបានណែនាំទៅពលរដ្ឋកម្ពុជាឲ្យប្រើប្រាស់ទឹកសន្សំសំចៃ និងធ្វើស្រែប្រាំងតែមួយលើក ខណៈដែលរដ្ឋាភិបាលប្រកាសថា កម្ពុជានឹងទទួលរងអាកាសធាតុក្ដៅហួតហែងខ្លាំងនៅចន្លោះខែមេសា ដល់ខែឧសភាខាងមុខនេះ។
អគ្គលេខាធិការរងនៃសម្ព័ន្ធសហគមន៍កសិករកម្ពុជា លោក ម៉ឺន រតនា យល់ថា របាយការណ៍នេះហាក់មិនឆ្លើយតបទៅនឹងទិដ្ឋភាពជាក់ស្ដែងនៃការប្រមូលផលស្រូវប្រាំងឆ្នាំនេះនោះទេ ដោយលោកមើលឃើញថា នៅឆ្នាំនេះមានភាពរាំងស្ងួតខ្លាំង ហើយពលរដ្ឋមួយចំនួនបានបោះបង់ដីស្រែរបស់ខ្លួនទៅធ្វើចំណាកស្រុកនោះ។
លោកថា៖ «ទន្ទឹមនឹងដីស្រែទុកចោល ហើយមួយចំនួនទៀតគាត់បានលក់។ ភាគច្រើនដែលយើងបានចេញទៅដល់ខេត្តមួយចំនួន យើងមើលឃើញថា ដីស្រែគឺគាត់ (កសិករ) អត់សូវធ្វើទេ ព្រោះធ្វើហើយអត់សូវបានទិន្នផល ហើយខ្ញុំគិតថា របាយការណ៍នេះប្រហែលជាមិនអាចទេ។»
ក្នុងសន្និបាតបូកសរុបការងារកសិកម្មឆ្នាំ២០១៧-២០១៨ ក្រសួងបានឲ្យដឹងថា កម្ពុជាសម្រេចទិន្នផលស្រូវបានជាង ១០លានតោន ក្នុងនោះបរិមាណផលស្រូវវស្សាទទួលបានជាង ៨លានតោន និងបរិមាណស្រូវរដូវប្រាំងទទួលបានជាង ២លានតោន កើនប្រហែល ៥,៦១% បើធៀបទៅនឹងការប្រមូលផលនាឆ្នាំ២០១៦៕
