ក្រសួងអប់រំ យុវជន និងកីឡា ណែនាំឱ្យគ្រប់គ្រឹះស្ថានសិក្សាទាំងអស់ដូរម៉ោងសិក្សាបណ្តោះអាសន្នរហូតផុតរដូវក្ដៅ ដើម្បីទប់ស្កាត់ហានិភ័យ និងចៀសវាងជំងឺផ្សេងៗ ដែលអាចប៉ះពាល់ដល់សុខភាព ការរៀនសូត្រ និងការបំពេញការងាររបស់លោកគ្រូ-អ្នកគ្រូ។
ក្នុងសេចក្ដីប្រកាសរបស់ក្រសួងអប់រំ យុវជន និងកីឡា ចេញផ្សាយកាលពីម្សិលមិញ ឱ្យដឹងថា ក្នុងរដូវប្រាំងឆ្នាំ២០១៩ អាកាសធាតុក្ដៅហួតហែងខ្លាំង និងអាចមានសីតុណ្ហភាពលើសពី៤០ អង្សារ ជាពិសេសនៅចន្លោះពីម៉ោង១០:០០ ព្រឹក ដល់ម៉ោង១៤:០០ រសៀល ។
ករណីនេះ ក្រសួងស្នើទៅគ្រប់គ្រឹះស្ថានសិក្សាចាត់ចែងអនុវត្តម៉ោងបង្រៀនគឺ ពេលព្រឹក ចូលរៀននៅម៉ោង ៧:០០ ចេញម៉ោង ១០:៣០ ហើយសម្រាប់ពេលរសៀល ចូលរៀននៅម៉ោង ១៣:៣០ ចេញម៉ោង ១៧:០០ ។
កាលពីថ្ងៃទី២២ ខែមេសា កន្លងទៅ ក្រសួងធនធានទឹក និងឧតុនិយម បានណែនាំឱ្យប្រជាពលរដ្ឋត្រូវមានការប្រុងប្រយ័ត្នដោយសាររលកម្តៅបន្តឡើងពី៤០ ទៅ៤១អង្សា។
