ប្រជាពលរដ្ឋជាង ១០០នាក់ បានប្រមូលផ្ដុំគ្នានៅមុខការិយាល័យក្រុមហ៊ុន 7NG នៅថ្ងៃនេះ ដើម្បីទាមទារទៅក្រុមហ៊ុននេះ ឲ្យបង្ហាញដីជាក់ស្ដែងដល់ពួកគេ ក្រោយពីពួកគេអះអាងថា បានទិញដីឡូតិ៍ពីក្រុមហ៊ុនជាច្រើនឆ្នាំមកហើយនោះ។
អំឡុងប្រមូលផ្ដុំនៅមុខការិយាល័យក្រុមហ៊ុន 7NG ស្ថិតក្នុងស្រុកវិហារសួគ៌នៅព្រឹកថ្ងៃនេះ លោក ហ៊ូវ យូហ័ន្ត បានឲ្យដឹងថា លោក និងបងស្រីរបស់លោក បានទិញដីចំនួន ៣ឡូតិ៍ពីក្រុមហ៊ុននេះ ប៉ុន្តែ ពុំទាន់ទទួលបានដីជាក់ស្ដែងនៅឡើយទេរហូតមកដល់ថ្ងៃនេះ។
លោក យូហ័ន្ត ប្រាប់ថា៖ «យើងបានតែក្រដាសលិខិតផ្ទេរកម្មសិទ្ធិ និងប្រើប្រាស់ដីធ្លីទេ ប៉ុន្តែ ដីពិតប្រាកដមិនដឹងនៅណាទេ។ យើងបានមកសួរក្រុមហ៊ុនមួយដងជាពីរដង គឺក្រុមហ៊ុនចង្អុលទៅលិចទៅកើតៗ។ អញ្ចឹងវាអត់មានដីពិតប្រកដ»។
ពលរដ្ឋម្នាក់ទៀតអ្នកស្រី ប៉ា ចត្តា និយាយថា គ្រួសារគាត់បានទិញដីពីក្រុមហ៊ុន 7NG ចំនួន ៥ឡូតិ៍រយៈពេល ១០ឆ្នាំហើយ ដើម្បីទុកសង់ផ្ទះ ប៉ុន្តែ ទទួលបានតែប្លង់ប៉ុណ្ណោះ ហើយមិនដឹងដីពិតប្រាកដកនៅទីណានោះទេ។
អ្នកស្រី ចត្តា ប្រាប់ថា៖ «គោលការណ៍របស់ក្រុមហ៊ុន កាលដែលយើងទិញហ្នឹង គាត់ថា មានរោងចក្រ មានសាលារៀន មន្ទីរពេទ្យឲ្យយើង ហើយបង់រំលោះតិច មានទឹកមានភ្លើងអីសព្វបែបយ៉ាង ដោយមានការបង់តិចៗ។ អញ្ចឹង បានជាយើងអ្នកធម្មតាហ្នឹងព្យាយាមបង់ជាមួយគាត់»។
ម្ចាស់ក្រុមហ៊ុន 7NG លោក ស្រី សុធា ត្រូវជាឪពុកលោក ស្រី ចាន់ថន បានសន្យានៅចំពោះមុខអតិថិជនថា លោកនឹងដោះស្រាយបញ្ចប់បញ្ហានេះយូរបំផុតនៅត្រឹមចុងឆ្នាំនេះ។
លោក ស្រី សុធា ប្រាប់ថា៖ «កាលណាខ្ញុំដោះស្រាយអត់បាន ឧទារហ៍ថា នៅសល់១០ឡូតិ៍ ២០ឡូតិ៍ ៣០ឡូតិ៍ ខ្ញុំនឹងសង់លុយទៅពួកគាត់វិញទៅតាមតម្លៃទីផ្សារដែលមានការវាយតម្លៃពីក្រុមហ៊ុអចលនទ្រព្យផ្លូវការជូន ពីព្រោះការងារបច្ចេកទេសនេះមិនមែនគិតតែខ្ញុំទេ គិតពី ៥០ឆ្នាំទៅ ១០០ឆ្នាំទៅមុខទៀត ព្រោះបងប្អូនជឿលើខ្ញុំ បើខ្ញុំធ្វើខ្ជីខ្ជារត់ទៅបាត់ បងប្អូនទៅពឹងអ្នកណា? ត្រូវចាំថា បើអត់ពីខ្ញុំ មានកូនខ្ញុំ ៧នាក់ទៀត»។
នាយកក្រុមហ៊ុន 7NG លោក ស្រី សុធា និងកូនៗរបស់គាត់ ត្រូវបានពលរដ្ឋប្ដឹងទៅតុលាការរាជធានីភ្នំពេញកាលពីខែមេសាឆ្នាំមុន ពីបទឆបោកនៅក្នុងជំនួញដីធ្លី ស្ថិតក្នុងឃុំវិហារសួគ៌ ស្រុកខ្សាច់កណ្ដាល តាំងពីជាង ១០ឆ្នាំមុនមកម៉្លេះ៕
